36 млн теңге тұратын Ford Bronco

Kolesa.kz порталында бесінші буындағы Ford Bronco сатылады. 1993 жылғы машинаның бағасы — 36 млн теңге.

1 / 6

• 
• 
• 
• 
• 
• 

1 / 6

Иесі көлік осы конфигурациядағы жалғыз Ford Bronco дейді. Сырттай 35 дюймдік бұдырлы дөңгелегімен және 6 дюймдік лифтісімен ерекшеленеді.

Дегенмен бар қызық «Бронко» ішінде, ол су жаңа көрінеді әрі стандарт салонға ұқсамайды. Батырмасы көп рөлі ағашпен әрленген. Оны рестомод авторы Ford F250-ден немесе Lincoln Navigator-дан алған сияқты.

Климат бақылау блогы да бірден көзге түседі, өйткені ол модельдің бесінші буынында болмаған. Хабарландыру мәтінінде шеберлер жаңа панель жасап қана қоймай, толыққанды климат-бақылау орнатты деп жазылған.

Тағы бір қызық деталь — орындықтарының орналасуы. Стандарт Bronco-ның алдыңғы жағында екі адамдық орын, арасында ұсақ-түйек салатын ірі жәшік тұрады, ал мына көлікте екі орындықтың ортасына тағы біреуін қойыпты. Оны бүктеп қойса, стақан қойғышы бар шынтақ тірегішке айналады. Бұл әдетте F сериялы пикаптарда кездеседі, сондықтан алдыңғы қатар солардың біріне тиесілі болуы мүмкін.

Хабарландыру мәтінінде капот астында 3.8 литрлік қозғалтқыш тұр деп жазыпты, алайда модельдің мотор гаммасында ондай агрегат жоқ. Бұл қате мәлімет болуы мүмкін, машина 4.9 литрлік V8-бен жүретін сияқты. Зауыттан шыққанда ол 188 ат күші мен 366 Нм момент береді, бірақ иесінің сөзінше қозғалтқыш қуаты екі есе артқан. Тек оған қалай қол жеткізгені белгісіз.

Реставрацияға келер болсақ, сатушы мамандар көлік рамасын бояп, шанақ панельдерін ауыстырғанын және тоттан қорғайтын қоспамен өңдегенін атап өткен. Қысқасы, машинаны түгел бөлшектеп, ескісін тастап, жаңа бөлшектерге ауыстырған.