Мопедшілер сақтауға тиіс жол ережелері

Биыл 5 сәуірден бастап мопед механикалық көлік қатарына кіріп, иесі толыққанды жүргізуші атанады. Олар сақтауға тиіс ереже көп.

Мопедпен қай жерде және қалай жүруге болмайды?

Жүргізуші веложолақпен, жол жиегімен және тротуармен жүре алмайды.

Кемінде бір қолымен рөлді ұстауы керек. Телефонды гарнитурамен ғана қолдануға болады.

Скутер арнайы жабдықталмаса, жолаушы тасымалдай алмайды. Техникалық паспортта орын саны екеу деп көрсетілсе, артына бір адам отыра алады.

Мас және 16 жасқа толмаған жолаушыларды тасымалдауға тыйым салынады.

Жүк таситын арнайы құрылғы болмаса тасымалдауға тыйым салынады. Жүк көлік габаритінен 50 см-ден артық шығып тұрмауы керек. Басқаруға кедергі келтіретін жүкпен жүруге болмайды.

Мопедті бір дөңгелегін көтеріп жүргізуге және оны басқаруға арналмаған жерге жайғасуға рұқсат жоқ. Жолаушылардың қозғалыс кезінде аяқ тірегішке не отырғышқа тұрып алуына тыйым салынады.

Скутермен автомагистральге шығуға рұқсат берілмейді.

Мопедті сүйрегіш ретінде пайдалануға немесе басқа көлікпен сүйреуге болмайды. Бірақ мопедпен бірге пайдалануға болатын арнайы тіркемені қолдануға рұқсат етіледі.

Мопедте отырып жаяу жүргінші өткелімен жүруге тыйым салынады. Тек жаяу жүргінші ретінде өтуге болады.

Мопедистің киіміне қойылатын талаптар

Жүргізуші жолға шыққанда бекітулі шлем киюге міндетті. Жолаушысы болса, ол да бұл ережеге бағынуға тиіс.

Мопед жүргізушілері жол ережесін, жол белгілері мен таңбаларын сақтауға, бағдаршам сигналы мен реттеушінің талаптарын орындауға міндетті.

Мопедшілерге арналған жол ережесі

Мопед басқару үшін қандай жүргізуші куәлігі қажет?

А1 категориясындағы мототехниканы басқару үшін осы санаттағы жүргізуші куәлігі керек. Бірақ В санатындағы құжат та жарайды. Қазақстанда мопедке 16 жастан бастап отыруға болады.

Жүргізуші өзімен қандай құжат алып жүруі керек?

Скутермен жалпы жолда жүру үшін ол міндетті түрде тіркелген және артында мемлекеттік нөмірі болуға тиіс.

Жүргізуші куәлігі мен техникалық паспорттың өзі немесе телефонда электронды нұсқасы болуы керек. Жеке куәлік те жарайды.

Құжат пен техпаспортсыз жүрген жағдайда қанша айыппұл салынады?

Әкімшілік кодекстің 612-бабына сәйкес куәліксіз скутер басқарған жүргізуші 5 АЕК (2025 жылы 19 660 теңге) мөлшерінде айыппұл төлейді.

Жүргізуші куәлігінен айырылған адам рөлге отырса 50 АЕК (196 600 теңге) төлейді немесе 10 тәулікке қамалады.

Мопедті куәлігінен айырылған немесе куәлігі жоқ адамға беру — 50 АЕК.

Мемлекеттік нөмірі жоқ немесе дұрыс тіркелмеген мопед тізгіндеу — 10 АЕК (39 320 теңге);

Жалған немесе қолдан жасалған мемлекеттік нөмір тағу — 15 АЕК (58 980 теңге);

Мопед техбайқаудан өтуі керек пе?

5 сәуірден бастап техбайқаудан өту ережесі өзгереді, ал шыққанына бір жылдан аспаған мопедті тексерудің қажеті жоқ. Скутерлердің VIN-коды бар болса құжатқа енеді, жоқ болса арнайы ХҚКО-да рамаға басылады. Осы процедурадан кейін олар жаңа техника саналады және иесі бір жыл техникалық тексеріссіз жүргізе алады. Мопедтің шыққан жылы құжатта көрсетілсе және тіркеу кезінде шыққанына бір жыл болса техникалық тексерістен өтеді.

Әкімшілік кодекстің 590-бабына сәйкес техбайқаудан өтпеген жағдайда айыппұл мөлшері — 5 АЕК (19 660 теңге). Диагностикалық картаны қағаз түрінде алып жүрудің қажеті жоқ, өйткені мәлімет онлайн базада сақталады.

Мопед жүргізу үшін сақтандыру қажет пе?

Сақтандыру полисі болмаса скутер жүргізуге тыйым салынады. Оны әлден рәсімдеуге болады, мопедшілер қатарына жаңа қосылғандар 7 сәуірге дейін кәдімгідей ақша үнемдей алады. Сақтандыру тек тіркелген техникаға рәсімделеді.

Сақтандыру алмағандар Әкімшілік кодекстің 230-бабының 2-тармағына сәйкес 10 АЕК (39 320 теңге) айыппұл төлейді.

Мопедші мас күйде көлік жүргізсе не болады?

Алкогольге, есірткіге және (немесе) токсинге мас күйде, сонымен қатар зейін мен реакцияға кері әсер ететін препарат қабылдаған кезде, ауырып не шаршап тұрған жағдайда мопед тізгіндеуге рұқсат жоқ.

Полиция жүргізуші мас па деп күдіктенсе, оны куәландыруға жібере алады. Бұдан бас тартқан кісі көлік басқару құқығынан айырылуы мүмкін.

Жүргізуші апатқа түскеннен кейін, сонымен қатар полиция мастығын анықтау мақсатында куәландыру үшін тоқтатқан соң алкогольді ішімдік ішіп, есірткі не психотроптық заттар қабылдамауы керек.

Мопедтің техникалық жағдайына қойылатын талаптар

Тежеуіш жүйесі не рөлі істемейтін техниканы тізгіндеуге болмайды.

Қараңғыда жарық шамдары жоқ жолдарда не төңірек жақсы көрінбейтін кезде мопедтің фары мен артқы габариттік шамы істеп тұруы керек. Ал жарық уақытта күндізгі жүріс шамы не жақынға түсетін фары қосулы болуға тиіс.

Мопедке қызметтік көліктердікі сияқты жыпылықтайтын құрылғылар мен сирена орнатуға және арнайы түстерге бояуға тыйым салынады. Жарық беретін аспаптар қоюға да болмайды.

Мемлекеттік нөмір белгіленген орында тұруы қажет.

Мопедті қайда қоюға болмайды?

Мопедшілер де жеңіл көлік иелері сияқты техникасын жол ережесінде аталған жерлерге қоя алмайды. Одан бөлек мототехниканы электрокар қуаттайтын станцияның қасына (егер қуаттамайтын болса), көгалға және балалар алаңына қалдыруға рұқсат жоқ.