Қымбат жиынтықтарында Corolla кілтсіз ашу және қозғалтқышты іске қосу жүйесімен жабдықталады. Салпыншақтың өзі қарапайым әрі функционалды: құлыптарды ашуға және жабуға арналған екі батырмасы және жүксалғышты ашуға болатын жеке батырмасы бар. Қажет боп қалатын жағдайлар үшін, кілттің ішіне әдетттегі кілт жасырылған.
«Королланы» кім алады екен осы? «Камри» алуға ақшаң жетпей қалды ма не? — деп күлкі қылады ғой… Қазақстанда әдетте осылай болады. Себебі, жақсы жабдықталған Toyota Corolla қарапайым жиынтықтағы Camry-ден сәл ғана арзан. Ал бұл іс үшін жетпей тұрған сомманы несиеге ала салуға болады емес пе?
Ал Оңтүстік-Шығыс Азия мен Солтүстік Америкада жағдай мүлде басқаша. Онда Corolla-ның танымалдығы сонша, Toyota әр нарық үшін өзіндік нұсқасын шығаратын, және шығаруын әлі жалғастыруда. Және дәл осы нарықтардың арқасында, «Королла» Гиннестің рекордтар кітабына енген. Мұның құпиясы неде? «Тойотаның» бірнеше жақсы қасиеттері «Королланың» бойына жинақталған.
Ең алдымен сенімділік. О, дәл осы аңызға айналған сенімділік! Жапон компаниясы алдымен шешімнің тиімділігін тексеру қажет деген оймен, жаңалықтар енгізуге асықпайды. Мына біздің «Королламызда» да ерекше ештеңе жоқ. Тек барлық әйнек көтергіштерде пайда болған автоматты режимді есепке алмағанда.
Сұр түс оған сондай жарасады
Corolla ешқашан автомобиль құрастыру үрдісінің алдыңғы қатарында болған емес. Оған мұның қажеті де жоқ, оның өзінің рөлі бар. Және бұл үшін сұр түс айтарлықтай орынды. Бірақ, сұр түс қандай да бөліктерді жасырады деп ойламаңыздар, шамасы, барлығы керісінше.
Екіншіден, көзге түспейтін сырт келбет. Қазір Toyota Corolla жаңадан стиль шығарушы болмаса да, есесіне 5 жылдан кейін ол тым ескі болып көрінбейді. Үшіншіден, жақсы өтімділік. Біздің елде бұл бәсекелестерінің ішін күйдіретіндей-ақ, «тойоталардың» қанында бар қасиет.
Енді «Королламызға» оралайық. Бет әлпетінің өзгергеніне алданбаңыздар, бұл жаңа үлгі емес, жәй ғана рестайлинг. Және мұндағы басты мақсат үлкен премиалдылыққа қол жеткізу болды. Ох, бәрі талпынатын осы премиум. Осы үшін бағалар асқақтауда, қарапайым көліктер тіпті қалған да жоқ. Бірақ сатып алушылар өз «Королласында» «Лексустың» бір кішкене бөлігі болғанын қалайды, ал «Тойота» олардың қалауынан бас тарта алмайды.
Дәстүрлер мен тұрақтылық
Салон қандай-да бір түбеегйлі өзгерістерге түспеген, және бұл жақсы. Ол кең әрі эргономді, дегенмен, мінсіз де емес.
Сырттай қарағанда, рестайлигтен кейінгі седан заманауилау көріне бастаған: жарықдиодты шамдар, бампердегі ауа өткізгіштең кең аузы, тартымды артқы оптика көлікті алдыңғысынан ұтымды ерекшелейді. Бірақ кескіні бұрынғы қалпында қалған, және ол айрықша қарқынды немесе кербез көрінбейді.
Салон онша өзгермеген, тек аспаптар панелі жаңа борткомпьютер экранына ие болған, климат-бақылау блогы өзгерген, ал бүйірлік дефлекторлар домалақ болған. Дәл көк түсті көмескі жарық сияқты, бұл қашан өзекті болудан қалған?
Ал қалған жағынан, «Королла» дәл сол кең салонды және тамаша аспалы, қарапайым әрі көнбіс седан болып қалыпты. Расымен де салонда бес адам тіпті қысқы киіммен де емін-еркін отырады. Алдыңғы орындықтарды күйге келтіру диапазоны айтарлықтай кең, ал орталық тоннельдің жоқтығы үшін артқы орындықтың ортасына жайғасқан жолаушы алғыс айтады.
Кең жайлылық
«Королла» салонын дәл осылай суреттеуге болатын сияқты. Сол себепті де корпоративті парктерге мыңдаған «королла» аттанады.
Ал енді, аспа туралы жеке абзац. Қала ішінде жүрудің қандай жайлы екенін сөзбен жеткізу мүмкін емес. Кунг-фу Панда туралы мультфильм кейіпкерлері айтқандай: ішкі тыныштық күйі… Шұңқырлар мен төмпешіктер азайған сияқты, алайда, мен оның олай емес екенін білем. Жайлылығы класы жоғары көліктердегідей. Дегенмен, рельстерден немесе біздің жол жөндеушілер жақсы көретін асфальттің кесілген жерлерінен жаймен өткен дұрыс. Аспа мұндай бұдыр жерлерді шамалы қаттылау өңдейді. Дыбыс оқшаулауы жарап тұр. Аркадағы құм аса сезілмейді, аэродинамикалық шуылдар жүйкеге тимейді, ал мотор дыбысы онша естілмейді, тек оны бекер айналдыра берудің қажеті жоқ. Оның үстіне, 1.6 литр екпінімен не жүргізушімен қандай да бір ерекше сергек байланысымен қайран қалдырмайды. Сондықтан да, ішкі тыныштық күйі туралы ұмытпаймыз, сонда бәрі орнына келеді. «Королла» драйвердің қанын жүгіртуге арналмаған ғой. Ол белгіленген нүктеге асықпай жеткізіп, келесі сапарды байыппен күтуге арналған. Сіз мұны неғұрлым ерте түсінсеңіз, «Королланы» соғұрлым ерте ұнатасыз.
Жүк тасымалдау
«Королла» көп жағдайда отбасындағы жалғыз көлік болатындықтан, оның үй шаруасына көмектесуі де қажет. Үлкен жүксалғыш пен салондағы ыңғайлы жасырын орындар бұған кәдімгідей жағдай жасайды.
Қорытындылайық
Қазақстанда «Королланың» өте жауапты міндеті бар: клиенттердің бір бөлігі үшін алғашқы «тойота» болу, ал екінші бөлігі үшін — шамалы «Камри» болу. Қазақстандықтар үшін Toyota — бұл Camry, Prado және «екі жүздік» екендігі өкінішті әрине. Кіші «Королла» айтарлықтай жақсы, бұған дәлел оның әлемдік танымалдығы. «Королланың» 50 жыл ішіндегі 40 миллион сатып алушысының жаңылысуы мүмкін емес қой.
Артықшылықтары
— 80-жылдардағы сағат әлі де бізбен бірге. Және бұл ертеңгі күнге сенімділік қосады
— Жарықдиодты басты жарық. Бұл класстағы автокөліктерде сирек кездеседі
Ұнады:
- жүрісінің бірқалыптылығы
Шайқалусыз не артық базданусыз жайлы жүріс. - сыйымдылығы
Жолаушыларға да, жүкке де орын жеткілікті. - жақсы өтімділік
Алдыңғы буындарының тәжірибесі «тойотаның» бағасы төмендеп келе жатқандығын аңғартады.
Ұнамады:
- көк түсті көмескі жарық
Көк түсті сандар мен таңбаларды қабылдай алмадым,оған қоса жүріс кезінде. - желісті динамика
Солай екені анық, дегенмен жүзге дейінгі 11.4 секунд қазіргі өлшемдер үшін көптеу болады. - мультимедиа жүйесі
Сенсорлы батырмалар — бұл күшті шығар, бірақ ең болмаса дыбыс күшейтуді бұралатын етіп қалдырулары керек еді.
Сатып алмай тұрып, сату туралы ойлану
Сырттан көзқарас
Павел Ким
Жеке автокөлігі Renault Duster.
Белсенді өмір салтына арналған автокөліктердің табынушысы.
Егер болашақ жұбайлар үйлену тойынан бұрын, ажырасқанда мүлікті бөлудің ерекшеліктері жайлы ойлауды бастаса, онда олардың некесіне не болады? Еш жақсылық болмайтын сияқты. Ал егер автокөлікті сатып алмай тұрып, оны сату туралы ойланса ше? Онда Toyota сатып алынатын шығар. Corolla-ның драйв-сынағы мені осындай ойға қалдырды. Седанның артықшылықтары жайлы ойлана отырып, мен ең алдымен мұндай көлікті жылдам әрімді тиімді сатуға болатындығын еске түсірем.
Неге ойға дәл осы келеді? Жаңартылған Toyota Corolla-ның рөлінде отырған бір-екі күн ішінде санада бірнеше нәрселер қалды. Ыңғайлы, түсінікті, шамалы заманға сай көлік. Қандай да бір айтарлықтай кемшіліктері жоқ, сол себепті де «көлік қалай екен?» деген сұраққа бірден: «Жақсы екен, ұтымды сатып жіберуге болады» — деп айтқың келеді. Шынымен де, екінші нарықта 4 жасар жапондық седанның бағасы шамамен 4 млн теңгені құрайды, бұл негізгі корейлік бәсекелестерден қымбат. Hyundai Elantra бағасы жарты миллионға төменірек белгіленеді, ал Kia Cerato-ны сату барысында, миллионнан қағылуыңыз мүмкін.
Дегенмен, көңіл түсірер бір нәрсе бар: жоғары баға және әлсіз динамика. Оның үстіне, алдыңғысымен де, кейінгісімен де Қазақстанда ештеңе істей алмайсыз. Біздің седан топтық нұсқада (алайда, былғарысыз, үлкен дөңгелектер мен төбесіндегі люксіз қайдағы топ) 7.5 млн теңге тұрады. Дәл осы соммаға 2012 жылғы екі «королла» алуға болады. Егер ең төменгі шек ретінде 1.6 мотор мен вариатордың болуын қарастырсақ, онда бұл «Комфорт Плюс» нұсқасы ең кемі — 6 710 000 тұрады. Бәрібір де аз емес.
140 күші бар 1.8 моторлы көліктер бізде жоқ, ал жүзге дейін екпін алудағы 0.9 секунд, механиканың пайдасына вариатордан бас тартуға мүлде татымайды. Оның үстіне, жұп матор болса — мұндағы қорап тамаша жұмыс істейді. Жоғарғы бағасына көніп, әрі қарқынды жүрістен бас тартқан кезде, көліктен рахат ала бастайсың. Бұл тамыр соғысы жылдамдап, еріндерің өздігінен күлімдей бастайтын кездегі рахат емес, кешке қарай жұмсақ диванға құлай кетуді ойлап келе жатқандағы күйді еске салатын рахат сезімі. Ештеңе мазаламайды және ешқайда асығудың да қажеті жоқ.
Дыбыс оқшаулағышы біреуді күштік агрегаттың уілімен басып оза бастағанша жақсы. Жүріс бірқалыптылығы да кейітпейді, ал энергияның сыйымдылығы сондай, басқа көліктерді тоқтауға мәжбүрлейтін бұдырларға жақындағанда, жүріс жылдамдығын жылдам бәсеңдетуді қоясың. Салон мен жүксалғыштың кеңдігі жақсы, дегенмен жүксалғыш бір түйнекті бекітетін торды немесе органайзерді қажет етеді, себебі үлкен орында кез келген сөмкелер ары-бері ұшады.
Егер оған тек ұтымды сатуға болатын көлік ретінде ғана қарамайтын болсақ, онда Toyota Corolla деген не? Үй — балабақша — мектеп — офис — үй бағытымен жүретіндер үшін тамаша таңдау, ал демалыс күндері балаларды мерзімді міндетін өтеу орындарына жеткізудің орнына, базарға, дүкенге баруға болады. Бірақ мұндай бағада, тек осы үлгінің табынушылары ғана автоматымен және толық жетегімен 7 миллион тұратын кроссоверлер жаққа бұрылып та қарамайды…
Тарих кезеңдері
Алғашқы Toyota Corolla осыдан тура 50 жыл бұрын пайда болған, және бұл үлгінің он бір буыны жайлы өте ұзақ әңгімелеуге болады. Ал біз әлемдегі ең танымал көліктің тек шешуші сәттеріне тоқталамыз. 1966 жылы жарыққа шыққан алғашқы буыны шағын (ұзындығы бар болғаны 3 845 мм), шамдары домалақ артқы жетекті көлік болатын. Corolla әр буынында өсе түсті (қазіргі буын ең алғашқы «Королладан» 80 см-ге ұзын), моторының көлемі артты (1966 жылы 1.1.-1.2 болса, қазір 1.3-2.0), шанақтарының гаммасы кеңейді.
Алғашқы түбегейлі өзгеріс 1983 жылы бесінші буында орын алды — жетек алдыңғы болды. 17 жыл бойы үлгінің ерекшелігі саналған домалақ фарлар да келмеске кетті. Соңғы артқы жетекті АЕ85 және АЕ86 жүргізуші үшін қымбат емес көліктер ретінде әлі күнге дейін миллиондардың есінде, тіпті қазір де олар дрифті ұнататындар үшін икона іспетті.
«Королланың» әр алуандығы
Седанмен қатар 2012 жылдан бері дизайны мүлде басқа Corolla Hatchback (Е180) те шығарылып келеді, ал Жапонияда және кейбір елдердің нарығында үшінші Corolla (E160) нұсқасы да кездеседі.
1995 жылдан бастап Toyota түрлі нарыққа арналған сегізінші буынның дизайн нұсқаларын шығару жөнінде шешім қабылдады. Сөйтіп, Еуропада «үлкен көзді» Corolla пайда болды, ал басқа нарықтарда көлік дәстүрлі тікбұрышты фарларға ие еді. Үлгінің қазіргі, седан (Е170) шанағындағы он бірінші буыны 2013 жылы жарық көрген, ал 2016 жылы жаңартуды бастан өткерді.
Класстастары
Егер С классындағы седанды сатып алғыңыз келсе, онда сізге таңдау жасау қиынға соғады. Бізде әдетте седандарды жақсы көреді, оның үстіне ықшам класс кең таралған. Ондай көліктерді отбасындағы жалғыз автомобиль ретінде де, корпоративті парктерге де алып жатады. Салыстыру үшін біз 1.6 атмосфералық моторы мен автоматты ББҚ-ы бар көліктерді алдық.
Жиынтықтама
Қазақстанда Corolla бірнеше жиынтықта ұсынылады. Базалық көлікті қосқанда, барлық көліктер АВS, күндізгі жүру жарықтарына және Isofix бекіткішіне ие. Біздің нарыққа бейімделу барысында «королла» қозғалтқыш картерінің болат қорғағышымен жабдықталған.
Ең қолжетімді «Комфорт» нұсқасы тек 1.3 литрлік кіші мотормен және механикалық ББҚ-мен ұсынылады әрі тек алдыңғы орындықтарды жылытқышпен, желдеткішпен, алдыңғы әйнек көтергіштерімен және фронтальді қауіпсіздік жастықтарымен ғана мақтана алады. Дөңгелектері болаттан жасалған, 15-дюймдік. Мұндай көлік 5 640 000 тұрады.
Егер бүйірлік қауіпсіздік жастықтары мен электр жетекті әйнек көтергіштерді қосса, онда 6 240 000 тұратын «Комфорт Плюс» нұсқасы шығады.
Қос педальді иеленгісі келетіндерге 6 560 000 теңге жұмсауға тура келеді, және қосымша Corolla 16-дюймдік дөңгелектерге (болаттан жасалған), тұманға қарсы шамдар мен жылытылатын былғары рөлге де ие болады. Жеңіл балқытылған дискілі нұсқасы 150 000 теңгеге қымбатырақ.
«Элеганс» нұсқасы тек вариатормен ұсынылады. Жабдықталуы сәл көрнекілеу: курстық орнықтылық, 6 қауіпсіздік жастығы, жарықдиодты фарлар мен артқы шамдар, әйнек тазалағыштар аумағын жылыту, тачскрин-экраны бар аудио жүйе мен Bluetooth, артқы көрініске арналған камера және климат-бақылау. Бағасы 7 240 000 теңге.
Біздің Corolla топтық «Престиж» жиынтықтамасында болған. Ол «Элеганстен» алды-артынан парктрониктердің болуымен, кілтсіз ашу мен қозғалтқышты іске қосу батырмасымен ерекшеленеді. Бағасы 7 510 000 теңге.
Моторлар гаммасы
Қазақстанда «Королла» бензинді моторлардың екі нұсқасында қолжетімді. Моторлардың екеуі де шынжырлы ГТМ (газ тарату механизмі) және газ тарату фазаларын өзгерту жүйесі бар төрт цилиндрлі. Базалық 1.3 литрлік 2NZ-FE 99 а.к мен 128 Нм күшін арттырады. Анағұрлым қуатты 1.6 литрлік 1ZR-FE қозғалтқышы 122 а.к мен 154 Нм береді.
Ресей мен Беларусьте қолжетімді 1.8 моторы (140 а.к., 173 Нм) біздің елге жеткізілмейді. Ал седанның басқа нарықтарында 2 литрлік бензинді агрегатымен (145 а.к) кездестіруге болады, екі дизель де бар — 1.4 және 2.0.
Трансмиссиялық шаруалар
Toyota Corolla беріліс қорабының екі нұсқасымен ұсынылады: 6 сатылы механика және вариатор.1.3 литрлік мотор тек механикамен жинақталады, ал 1.6 ББҚ-ның екі типімен қолжетімді. Жетек тек алдыңғы дөңгелектерінде болады.
Шасси
Шассидің қағидалық сұлбасы бірнеше он жылдықта өзгерген жоқ — алдыңғы жағында берік «Макферсон» және арт жағында жартылай тәуелді арқалық. Орын үнемдеу үшін оңтайлы нұсқа, тіс қаққан автомобиль әуесқойларын қуанта қоймаса да, құрылымы қарапайым әрі сенімді. Рөлдік басқаруда электрлі күшейткіші бар.
Қауіпсіздік жайлы
Жаңартылған автомобильдердің краш-сынағын Еуропада әлі өткізіп үлгерген жоқ, бірақ күштік құрылымының бұрынғы қалпында қалғанын ескерсек, онда қауіпсіздігі 2013 жылғы нұсқасына ұқсас деуге болады. Рестайлингке дейінгі Corolla EuroNCAP рейтингінде қауіпсіздігі үшін ең жоғарғы 5 жұлдызға ие.
Техникалық сипаттамасы
| Автомобиль | |
| Маркасы, үлгісі | Toyota Corolla |
| Өндірісі | Түркия |
| Шығарылған жылы | 2016 |
| Шанағы | тасымалдаушы |
| Типі | седан |
| Есіктер саны | 4 |
| Орын саны | 5 |
| Қозғалтқыш | |
| Типі | бензиндік |
| Орналасуы | алдында көлденең |
| Қуаттану жүйесі | үлестірілген бүрку |
| Цилиндрлер/клапандар саны | 4/16 |
| Жұмыс көлемі, см текше | 1 598 |
| Ең жоғарғы қуаты, а. к. (кВт)/айн/мин | 122(90)/5 200 |
| Ең жоғарғы айналу сәті, Нм/айн/мин | 154/5 200 |
| Экологиялық классы | Евро-5 |
| Динамикалық сипаттамалары | |
| Ең жоғарғы жылдамдығы, км/сағ | 185 |
| 100 км/сағ дейін екпін алу уақыты с | 11.4 |
| Трансмиссия | |
| Жетек | алдыңғы дөңгелектерге |
| Беріліс қорабы | вариатор |
| Аспа | |
| Алдыңғы | тәуелсіз серіппелі McPherson |
| Артқы | жартылай тәуелсіз серіппелі |
| Тежегіштері | |
| Алдыңғы | дискілік желдетілетін |
| Артқы | дискілік |
| Өлшемдері мен салмағы | |
| Клиренс, мм | 145 |
| Ұзындығы/ені/биіктігі, мм | 4 620/1 775/1 485 |
| Дөңгелектік база, мм | 2 700 |
| Шина өлшемдері | 205/55 R16 |
| Жарақталған массасы, кг | 1 310 |
| Толық массасы, кг | 1 775 |
| Жүксалғыш көлемі, л | 452 |
| Жанармай шығыны | |
| Қала ішінде, л/100 км | 8.2 |
| Қала сыртында, л/100 км | 5.2 |
| Аралас цикл, л/100 км | 6.3 |
| Жанармай багының көлемі, л | 55 |