Lexus LS 500 - 2017

Жаңа Lexus LS 500-дің драйв-сынағы

Жаңа Lexus LS-ті сынақтан өткізген күндері Головкин мен Канело арасындағы жекпе-жек өтті. Үш мыңнан аса қазақстандық Лас-Вегасқа келді.

Жекпе-жектен кейін көпшіліктің бесінші буындағы LS-тің таныстырылымы өтіп жатқан Сан-Франциско қаласына саяхатын жалғастыратыны таң қалдырар жәйт емес. Тіпті серия алды седандардың бірін дәл таныстырылым кезінде сатып алу жайлы ұсыныс та болды. Қалталы қазақстандықтардың жапон маркасына деген құмарлығының қаншалықты күшті екендігін түсіндірудің қажеті бар ма? Ал жапондар мұндай флагман енді, бұрын болмағандай спорттық көлік болып табылатынын айтты.

«Лексус» бізді алғашқы драйв-көрсетілімге Штаттарға алып келді, бұл марка үшін жақын нарық. Көліктер серия алды, ал бұл оның параметрлерінің әлі де жетілдірілетінін білдіреді.

Lexus LS 500 - 2017
Сан-Францискодағы Алтын қақпа аясындағы техасстық нөмірлі LS

Тіпті цифрларынан да толық түсінікті болған жоқ. Біз екпін алу сипаттамасына көңіл тоқтату үшін ғана бір апта уақыт жұмсадық. Әзірше қолда бар ақпарат мынадай: LS 500 AWD толық жетекті нұсқасы 100-ге дейін 4,9 секундта, артқы жетекті LS 350 — 6.5 секундта жетеді.

Рөлде ме әлде арт жақтағы диванда ма?

LS пен спорт? Не үшін? Таныстырылымда мұны былай түсіндіреді: GA-L платформасындағы автокөлік аласарақ, кеңірек және ұзынырақ болып шыққанынан бастаған жөн. Ауырлық ортасы бәсеңдеген, алдыңғы дөңгелектері бамперге жақындатылған, ал қозғалтқыш керісінше, базаға қарай ығысқан, мұның барлығы рөлде отырғанда спорттық сезімге көбірек бөлейді.

Lexus LS 500 - 2017
Сіз бұл фотосуреттен ескі LS-ке тән бір де бір затты тани алмай тұрсыз ба? Мұнда уақыт мүлде басқаша сезіледі. Жаңа буынның тізгінінде отырып: бүгін 2018 жыл- деп нақты айтуға болады. Негізгі батырмалардан жоғары тұрған мүйізшелерге (қосымша құрылғылар) назар аударыңыздаршы. Олар трансмиссияның жұмыс режимдерінің, трэкшн-бақылаудың «жылдам» баптауларына жауап береді

Көліктің өзі де тұмсығынан ұшына дейін 5 235 мм шанағынан күтілгендей-ақ, анағұрлым драйверлік боп көрінеді. Таныстырылымнан кейін бұл үлгінің бас дизайнерімен таныстым. Коичи Шуга бәріне бірдей көңіл бөле алмайды, сондықтан да менің сұрақтарыма тез-тез жауап беруге тырысты. Бірақ бұл оның қолынан келмеді. Мен одан скетч сұрадым. Нәтижесінде жапондық тізерлей отырып, бес минут ішінде нобайын жасап берді. Дәл осы мезетте мен де жағаласа қойдым:

— Шуга-сан, міне тіпті сіздң скетчіңізде де LS арыны қатты фастбэккке ұқсап тұр ғой…
— Йә-йә, дәл солай: аласа спорттық флагман! Менің де көздегенім осы болатын.

Lexus LS 500 - 2017
Шуга-санның седанды серпіндірек кейіпте көргісі келетіні суреттен анық байқалады. Бірақ, келісіңіздерші, сериялық шамада расымен спорттық көлік болып шыққан ғой

Мүмкін, ең басты жаңалық — созыңқы және қысқа нұсқаларының жақын арада болмайтындығында болар. Шанақтың бірі алдыңғы лонг-нұсқасынан 35 мм-ге асатын дөңгелекті базалық нұсқада. Бәрінің көңілдерінен шығуы тиіс. Мен ең басты бәсекелестердің ұзын негіздік орындаудағы үлгілерінің өлшемдерін нобайлап шықтым. Қарап көріңіздер.

Марка/үлгісі Дөңгелектік база, мм Ұзындығы, мм Ені, мм Биіктігі, мм
Audi A8 L 3 128 5 302 1 945 1 488
BMW 750 L 3 210 5 238 1 902 1 485
Lexus LS 3 125 5 235 1 900 1 450
Mercedes-Benz S-Класс L 3 165 5 271 1 905 1 450

LS алғаш рет қырынан қарағанда үш терезеге ие болды, үшіншісі — саңылаусыз, ол қарқынды седандық емес суретті жалғастырады. Алайда, артқы орындықта ол басыңды бұрып қарамайынша байқалмайды.

Lexus LS 500 - 2017
Қызыл түсті шанақ жаңа LS-тің жинақы өлшемін, әрі спорткарлар сияқты, алдыңғы осьтің салоннан қалай алшақтағанын айқындап тұр

Жалпы еш зеріктірмейтін сурет шыққан сияқты. Жанында тұрақта алдыңғы генерация тұр. Көңілсіз, тым көңілсіз! Lexus ең консервативті сегмент — Ғ класста да жұртты таң қалдыруға тырысады. Бұл жаңалық!

Lexus LS 500 - 2017
Бұрынғы LS жаңасының қасында қарапайым әрі жемделгендей көрінеді

Дөңгелек дискілер өлшемінің ашасы енді 19-дан 21-ге дейін. Соңғы санды өкілдер зауықсыз растайды, әзірше қазақстандық нарықтағы максимум — R20. Бірақ опция ретінде — дөңгелектер қақталған. F SPORT нұсқасында дискілер шиналардан шығатын күшейген шуылдың бір бөлігін сіңіруге мүмкіндік беретін қуыс шеңберге ие. Керемет! Кезекті шұңқырда мен оның сағыз сияқты жалпайып қалғанын қаламас едім.

Дизайн ілгері жылжыған
Автокөліктің жүрісіне қарағанда, сырт келбеті спорттық көлікке көбірек ұқсайтынын сезінуден арылар емеспін. Бірақ не десе де, келте құбыр тығындарынан шанағының агрессивті тартымдылығына дейін LS өте және өте байыпты өнім болып шыққан. Неміс бәсекелестері соншалықты нандырмайды.

Екінші қатардағы аяқ қоятын орын айтарлықтай (+86 мм) кеңейген, және енді бойыңыз тіпті екі метрге жуық болса да, аяқтарыңызды барлық ұзындығына созсаңыз болады, ал бұл 1022 мм. Менің жолым болды: шамамен күні бойы жүргізушілік қызмет атқарып, рөлде отырдым. Ал бастық болып бойы 202 см болатын әріптесім отырды. Ол шефтің орнында емін-еркін отырғанымен, аяқ қойғыш алға жылжып тұрғанда (Ottoman орындықтары бар нұсқа) аяқтарын айқастыра алмады.

Екі метр +
Артқы орындықтың жайлылығы 2 метрлік құрдасымның көмегімен тексерілді. Барлығы да флагманның бекітілген деңгейіне сай, жалғыз кемшілік — бұл аяқтарды айқастырғандағы ыңғайсыздық. Артқы орындықтардың электр реттегіші (Ottoman) — опция.

Қазақстанға арналған түстер палитрасы әлі де анықталып жатыр, алайда, Autumn Shimmer реңкінің «қола түстес күзі» үлкен седанмен үйлесетіні соншалық, қара және ақ түстер екінші орынға ығысады, дегенмен, дәл осылар біздің нарықта сұранысқа ие болатыны анық. Кейін Алматыда «Тойота Мотор Казахстан» президенті Кит Симмонспен кездескенге дейін мен солай ойлағанмын. Алғаш астаналықтардың алдын ала тапсырысымен жеткізілген екі LS 500 — бұл Liquid Platinum түсіндегі көліктер екенін білгенде, мен таң қалдым. Айтпақшы, біздегі LS 500 тек толық жетекті, және мұндай лекс 49 240 000 теңгеден басталады. F SPORT нұсқасының бағасы едәуір орташа — 45 040 000. Артқы жетекті LS 350 — 32 930 000-нан басталады.

Lexus LS 500 - 2017
Салон әрлеуінің хрустальмен жасалуы мүмкін! М-м-м… қызық. Мұндай қорғалмаған жердегі әйнек қаншалықты берік болуы мүмкн? Өндіруші оның жаңа технология көмегімен шыңдалғанына сендіреді. Бірегейлігімен келісіңіздерші

Атмо. Битурбо. Және гибрид

Еуропалық мотор құрастырушылардың турботартым жасап жүргендері түсінікті, ал консервативті жапондық брендке LS қозғалтқышындағы атмосфералық ауаны өз өндірісіндегі турбина қалақтарымен ығыстыратын уақыт тек енді келді. Йә-йә, Lexus төл туындысы — LS 500-ге арналған көлемі 3.5, қуаттылығы 421 күшке және 600 Нм айналу сәтіне тең битурбо алтылықтарды шығарады. Алдыңғы буынның күштік көрсеткіштерімен салыстырып көрейік пе? 4.6 литр атмосфералық қозғалтқыш 382 а.к. мен 493Нм беретін. Жапондықтар литрден бәсекелестерге қарағанда көбірек — 118.9 күш түсіргендерін айтады. BMW 750 4.4.л турбоматордан 102.3 шығарады. Таң қалдыратыны, бұл айналу сәтінің платосы: 600 ньютон 1 600-ден 4 800 айн/мин ауқымына жайылатыны. Ал бұл тартым көп, және қозғалыс режимдерінің басым бөлігінде ол максималды болып табылады.

Lexus LS 500 - 2017
Капот астында пеш бар. Ол қолжетімді екі жағдайдың кез келген біреуінде алты цилиндрлі болады. Қосымша екі турбина (+106 а.к.) — және бұл 12 млн теңгені құрайды. Соңғы жағдайда автокөлік үнсіз келісім бойынша AWD болады

Жапондар даунсайзингке ұзақ жүрді, бірақ игі болғанда елігіп кеткен жоқ. Ешқандай төрт цилиндрлі моторлар жоқ! Одан да мұнымен немістер айналыссын, оның үстіне үш өкілдің бәрі де өз топтамаларында түрлі орындаудағы төрт цилиндрге ие. Жаңа LS-тің дәл сондай көлемдегі, бірақ атмосфералық моторы бар, ол LS 350 (315 күш пен 380 Нм тар ауқымда 4800-ден 4900-ге дейін) деп аталады.

Гибридті Н-нұсқасы да негізінде Аткинсон циклі бойынша жұмыс істейтін 295 күші бар атмосфералық алтылыққа, қуаттылығы 177 а.к, айналу сәті 300Нм тұрақты магниттердегі электрлі қозғалтқышқа және литий-ионды батареяға ие. Және бұл 354 физикалық күш беріп, седанды 5.4 с-та жүзге дейін үдетеді.

Дегенмен, бұл сапарда бізді қызықтырған битурбо ІЖҚ болды. Дәл сол Қазақстанда ең көп сатылады деп күтілуде, ал гибридті нұсқаларын бізге жеткізу жоспарланбаған да.

Lexus LS 500 - 2017 Жаңа LS-тің кілтінің пішіні бір уақытта әсемдік пен спорттық қасиеттерді үйлестірген. Ішінара металлдан жасалған. Бұл ұнамды шағын дүние әдеттегі қызметке ие: есік құлыптарын ашып-жабу, жүксалғышты ашу + дабыл.

Көлікке жақындаймын да, салпыншақпен ашамын — шанақ үш сантиметрге көтеріледі. Бұл бізде пневмалы нұсқа екендігін аңғартады, ал бұл, жайлы кіру/шығу жүйесінің белсендірілгенін білдіреді. Бұл жүйе өзекті болатындай LS қаншалықты аласарған, мысалы, соған ұқсас Range Rover Velar-мен салыстырғанда. Тек соңғы жағдайда бәрі керісінше — автокөлік отыруға ыңғайлы болу үшін аласарады.

Рөл тізгініндегі алғашқы екі сәт. Жүрісі тыныш, салонның өз атмосферасы бар. Қозғалтқыштың даусы тіпті бес мыңға дейін де естілмейді, жоғарғы ауқымдағы даусын да агрессивті деп айта алмайсың. Барлығы жоғары классты көлік рухында. Бұдан басқа, Active Noise Reduction айлалы жүйесі қозғалтқыш жұмысының жағымсыз дыбыс жиіліктерін кесіп тастайды. Егер электрокарда синтезатор ІЖҚ (іштен жанатын қозғалтқыш) дыбысын тыңнан жасаса, мұнда керісінше, санды «дыбыс оқшаулағыштар» көмегімен оны басады.

Lexus LS 500 - 2017
LS-тің рөлінде өзіңді жеке шопыр сияқты сезінуден арылу қиын екен, әсіресе жолаушы орындығы алдыңғы жағына тіреле жылжып тұрғанда. Бүгін — сен жүргізушісің…

Енді, ең басты сұраққа жауап беру керек: қалай, көлік зулай ма?

Көліктің жүйткуі аса сапалы. Жастарға тән агрессия бар болса да, ол тек сыртынан ғана көрінеді, ал ішінде бәрі артық өткір сезімдерді болдырмау үшін жұмыс істейді. Екпін алуы өзінің жоғарғы санатына тән дәстүрді сақтаған. Төменгі екпін алуда кідіріс болады.

Бірақ динамика артуының мерседестік қасиеті мұнда тосын қаталдықпен іргелескен. Және бұл екінші сәт. Сан-Франциско көшелері алматылық сапаны еске салады. Ана жерде де, мына жерде де ойдым-ойдым, ландшафт үнемі бір көтеріліп, бір түседі. Жалпы айтқанда, LS Normal-дан Sport S±ке дейінгі кез келген режимде жүруі қатаң. Мен енді аспадан тартып оң жақ педальдің жауабына дейінгі ондаған баптауларды конфигурациялауға болатын Custom режимін қостым. Одан пайда болмады. Сонда бәрі нашар болғаны ма? Тым болмағанда, аспа жайлылығын жарылуға төзімді шиналардан бас тарту арқылы шамалы арттыруға болады, себебі олар қаттылау жүреді. Әрі қарай, он тоғыздық дөңгелектерге таңдау жасауға болады, ал біздің көлікте жиырмалықтар орнатылған.

Lexus LS 500 - 2017
Дискілердің ең үлкен көлемі — алдыңғы генерациядағы R 19-ға қарсы 21 дюйм. Алайда бізге фотосуреттегі жиырмалықта да қаттылау болды. Қазақстандық ерекшелік — R20 жоғарғы шегі. Ал егер, қатты қаласаңыз тапсырыс беруге болады

Он сатылы қораптың бірсарынды жұмыс істейтіні соншалық, мұнда гидротрансформатордың бар екенін ұмытып кетесің.

Кең автожолдағы бағытының орнықтылығы керемет. Дегенмен, спорттық режимде тиісінше, жолға мұқият қарауға тура келеді, себебі рөл сүйірлене түседі. Мұнда жылдамдықты сезіну шынымен де бәсеңдейді — 150-ді 30-40 км/сағ сияқты сезінесің. Екінші көліктегі әріптестер екі жүзден асырып, «мұнда бәрі тұрақты» деп сендірген еді. Біз расымен сенеміз.

Lexus LS 500 - 2017
Кең әрі аласа LS бағытты тамаша ұстайды! 150 км/сағ бір рет те олай сезілген жоқ

Джордж Лукас ранчосының маңындағы тар әрі бұралаң жолдардағы рөлдің әрекеті маған онша ұнамады: нөл бостау, ал әрі қарай күш салу үдей түседі. Мұндай басқаруға үйрену қиын. Мен бұл баптауды түсінбедім. Ал автомобиль ауқымы мені мазаламайды — LS класы төмендеу седанға сәтті икемделе алады. Дәл осы сәтте мануалға өтіп, қызыл зонаға дейін айналым қоры әлі де жеткілікті болса да, қораптың төмен жылжығанына таң қалдым. Рөл астындағы «-» белгісі бар шифтерді шырт-шырт еткізем, ал жауап ретінде біз үшіншіде қалып қоямыз.

Lexus LS 500 - 2017
Мұндай LS-тің рөлінде қарынды көлік иесінің отырғанын елестету қиын. Бірақ елігудің қажеті жоқ. Мұндағы спорттық сипат көлік иесінің рөлге отыруы әбден орынды болатынын аңғартады. Бұл «лексустегі» спорт өзінше дұрыс. Көрнекі

Қате түсініп қалмаңыздар, LS 500 әлдеқайда серпінді снарядқа айналған: Дарт Вейдер (айбарлы жалған тор мұндағы басты спорттық дәлел) сияқты көрінеді, моторы мезеттілеу, тежегіштері тиімді әрі түсінікті, трансмиссия жұмысын ауыстырып қосатын және трекшн-бақылауды өшіретін түтіктер орынды әрі қолдануда ыңғайлы, отыру серпінде «ұстайды». Бірақ, екінші нарықта оны жүрісі, сапасы және қымбат бағасы үшін бағалайтын үлкен седанға бұл қаншалықты қажет? Шамасы, седанның аудиториясы жасарып келе жатқан сияқты, сол себепті спорттық имиджсіз болмайды.

Lexus LS 500 - 2017
Қазақстанда орындықтар әрлеуінің түсін стандартты түстермен және қосымшалардың бірнеше нұсқасымен шектеуді ұйғарған. Қызыл салонды LS-ке тапсырыс беріп, қанша хайп жинауға болатынын елестете аласыздар ма? Бұл алюминийден жасалған қосымшаларға толы F SPORT болар еді. Модельдің америкалық қалталы аудиториясы қарқынды түрде жасарып келеді

Екі жүз шақырымнан кейін біз LS-тің төртінші буынымен де жұмыс істеген жобаның бас инженері Тошио Асахимен әңгімелестік:

— Дроссельмен басқарудың кейбір режимдерінде қорап төмен қарай ауырсына жылжиды…
— Бұл серия алды көліктер, мұндағы софт та әлі жетілдіріледі.
— Мануалдағы қорап төмен жылжығысы келмейді, дегенмен жіберіп, екі сатыға төмен түсіру үшін айналымдар жеткілікті.
— Бұл қайта сақтандыру режимі, біз сериялық өндіріс алдында барлығын да қайта баптаймыз.

Сонымен, тағы бір-екі сұраққа біз жалғыз ғана жауап алдық — серия алдындағы көліктер бірсарынды жүріс тұрғысынан да біршама жетілдіріледі.

Кілтті бердім де темір тұлпарды тағы бір айналып шығып, бұл өнімнің қанша мүмкін болса, сонша сериялық сипатта көрініп тұрғанын түсіндім. Енді кейбір тұстарын баптау ғана қалды. Жолдық сипаттамалары шыңдалған неміс бәсекелестерінің барын ескерсек, бұл аса маңызды. Әрі қарай, флагман 100 мың ш.б. бағасына сай болуы тиіс. Және, егер «жүргізуші үшін де» десе, онда сөзінде тұруы қажет. Бұл автомобильдердің 5 метр+ сегменті, және бұл қалжың емес.

Жаңа LS шанағы туралы

GA-L жаңа платформасы — бұл бүгінгі күні «лексус» тарихында ең жоғарғы шекті қаттылыққа ие LC 500 созыңқы арбаша купе.

Дөңгелектік базасы едәуір 3125 мм-ге ие, және бұл алдыңғы буындағы лонг-нұсқасынан + 35 мм-ге артық. Стандартты (қысқа) нұсқасы енді қарастырылмаған. Жаңа платформа ауырлық ортасын бәсеңдетіп, осьтердегі өлшемін оңтайландырған.

Шанақ құрылымында ыстық қалыптағы аса берік (қауіпті аумақтарындағы созылу беріктігінің шегі 590-нан 1180 МПа-ға дейінгі аралықта түрленеді) болат қолданылады. Құрылымындағы аса берік болаттың үлесі 30%-ға артқан(суретте көк түспен белгіленген), алдыңғы буын 14,1% мәнінде тоқтаған еді.

Шанақтың алюминийден жасалған құраушылары пайыздық мәнде көрсетілмеген, бірақ суретте бампер панелінің, капоттың, алдыңғы қанаттарының, есіктерінің, жүксалғыш қақпағының осы металлдан жасалғаны көрсетілген.

Сонымен қатар, жапондар алюминий құймасынан жасалған артқы аспаның бағана тіректерін мақтанышпен таныстырады. Мұндай шешім шанақтың осы бөлігіне жоғарғы (болатпен салыстырғанда 1.5 есе) қаттылық пен жеңілдеу салмақ береді. Алюминийден жасалған бөліктердің болат шанақпен буындасуы үшін, неміс концерні үшін таңсық емес өзгеше технология қолдануға тура келген, бұл шегендеу мен аса берік желімді біріктіру.

Lexus LS тарихы

LS-тің алғашқы генерациясы Lexus маркасы сияқты 1989 жылы Детройттық автосалонда жарық көрді. Luxury Sedan (LS) нарыққа қуаты 250 ат күшіне тең 4 литрлік V8 қозғалтқышы, төрт берілістік автоматты қорабымен және артқы дөңгелектер жетегімен шыққан болатын. Ол кезде ең жоғарғы 250 км/сағ жылдамдық тіпті BMW және Mercedes-Benz сынды бәсекелестері үшін де қол жетпейтін белес еді. Жүзге дейін үдеу 8.5 с. уақыт алатын. Қосымша құрылғылар тізімінде пневматикалық аспа болатын. Ең қызығы — жүрістік таныстырылымы Германияда, марканың негізгі бәсекелестерінің отанында өткен еді. Алғашқы буынның бірінші сатып алушыларының арасында Microsoft компаниясының негізін салушы Билл Гейтс те болған.

1994 жылдың қазан айында үлгінің екінші буыны жарыққа шығып, алғашқысының шығарылымы тек бір айдан кейін ғана тоқтады. Ұзынша база, қозғалтқыштың жақсартылған сипаттамалары, жанармай шығынының кемуі, кеңейтілген опционал, центнерге түсетін салмақ аздау болды. Бірақ, қазіргі автоөнеркәсіптің өлшемдері бойынша, жаңа буынға жетіңкіремейді, бұл седанның 1992 жылы рестайлингті өткергенін ескерсек, бұл тереңдетілген жаңару десе болады. Алайда жапондар дәл осы көлікті генерация деп санайды. 1997 жылы LS 400-ге жаңа бес сатылы автомат қорап салынды.

Үлгінің үшінші генерациясы тағы да Детройттық көрсетілім аясында 2000 жылы алғаш таныстырылды. Өндіруші: «Интерьер дизайны The Ritz-Carlton қонақ үйінің лакшери-апартаменттерімен рухтанған, ал орындықтары British Airways әуе желілерінің алдыңғы классын қайталайды »- деп сыпайы мәлімдеген еді. Мұнда бейімделгіш круиз-бақылау, Mark Levinson саунд-жүйесі, артқы орындықтар массажы бар. 4.3 литрлік атмосфералық V8 күшін 290-ға дейін арттырып, LS 430 6.7 секундта 100-ге дейін от алатын. Шанағын «Синкансен» атты жүрдек пойыздарды ұқсас аэродинамикалық сынақтардан өткізетін тоннельде үрлеп тазартқан. Ауа өткізу кедергісінің коэффициенті Cd 0.25 (S-Class W220 мәні 0.27-ге тең). 2003 жылы седанда алты сатылы автомат қорап пайда болды. Бұл шанақтың жеке орындалуының соңғы буыны.

2006 жылы дәл сол АҚШ-та, шанағы екі түрлі — стандартты және ұзынша базалы нұсқада орындалған үлгінің төртінші буыны таныстырылды. Жаңа платформа үш мотормен ұсынылды: көлемі 4.6 және 5 литрлік бензинді, сондай-ақ LS 600h L (Женевалық автосалон таныстырылымы — 2006) гибридті. 2008 жылы Мәскеу халықаралық автосалонында толық жетекті LS 460 және LS 460L AWD үлгілері алғаш таныстырылды. 2012 жылы флагмандық седан «ұршық» түріндегі жаңа дизайнерлік тұжырымдаманы өлшеп көрді, әрі осы жылы рестайлинг аясында нарыққа 6 мың жаңа бөлшектерге ие F-Sport нұсқасын шығарды.

Lexus LS-ке арналған жаңа қозғалтқыш

Екі турбинасы және 3.5 литр көлемді интеркулері бар V пішінді толықтай жаңа алтылық 421 күш пен 600 Нм айналу сәтін 1 600-ден 4 800-ге дейінгі айналым ауқымында үдетеді. Көлемі 4.6 литрлік атмосфералық V8 алдыңғы генерациясында 388 үрлемесіз ат күші мен 493 айналу сәтін беретін.

Lexus LS 500 - 2017

Энергиямен жарақталуы жағынан бұл V35A-FTS моторы BMW 750i мен Mercedes S 560 седандарына орнатылатын агрегаттарға жетпейді, бірақ соңғылары — сегіз цилиндрлі.

Ықшам көлем, өз өндірісіндегі турбиналар, тиімді салқындату — өндірушінің айтуынша, осы мотор үшін жасалған көптеген технологиялық шешімдер Формула-1 тәжірибесінен алынған.

Электрлік қайта өткізу клапандары турбинадағы қалақшалардың айналу жылдамдығын нақтырақ мөлшерлеуге мүмкіндік береді, бұл өз кезегінде мотордың анағұрлым «жіксіз» серпуіне әсер етеді. Интеркулер қозғалтқыш жүйесінен салқындайды, әр турбинаның өз радиаторы бар.

Жаңа D 4ST қуаттану жүйесі жаңа мотордың турбиналы бөлшектерінің есебінен дайындалды. Бұл алты тік бүркитін бүріккіштер мен үлестірілген бүркудің дербес бүріккіштерінен тұратын құрама бүрку.

Lexus LS трансмиссиясы

Бұл класстағы алғашқы он сатылы қорап LC 500 купесінде жарық көрген. Өндірушінің айтуынша, бұл торап гидротрансформатордың жайлылығын екі дискілі трансмиссияның жылдам атылғыштығымен жақсы қиыстырады. Жақындатылған беріліс саны кез келген шарт үшін мінсіз. Алюминийдің кең көлемде қолданылуы ББҚ-дағы айналу массасын азайтып қана қоймай, жарақталған массаны алдыңғы сегіз сатылы қораппен теңестірген.

Al-Shift Control жүйесінің софты акселерометрлердің, тежеу тетіктерінің және G-сенсорлардың деректерін оқып, нақты бір сәтте тиімді ауыстырып қосудың жылдамдығын/бірсарындылығын жағдайға байланысты береді. Мысалы, BMW-дегі сияқты мұнда ешқандай ландшафтық геолокацияға байланыстыру жоқ.

Lexus LS шассиі

Алдыңғы қостетік Рөлді болмашы қозғалтқанда көбірек бақылау мен нақтылықты қамтамасыз ететін жоғарғы және төменгі тетіктердегі қос шарлы қосылыстарды пайдаланады. Артқы көптетікті аспа LC 500 купесінен алынған, мұнда тек анағұрлым жайлы жүріс үшін төлкелер сипаттамасы ғана қарастырылған.

Lexus LS 500 - 2017

Аспалардағы серіппе салынбаған массаларды кеміту үшін алюминий кеңінен қолданылады. Алдыңғы/артқы аспалардың баған тіректері содан құйылған.

Lexus LS 500 - 2017

Алдыңғы буындағы сияқты мұнда да пневматикалық аспа( екі фотосуретте де) қолжетімді. Adaptive Variable Suspension (AVS) үнемі жолмен жұмыс жасайды, және егер бұрын жүйе демпфирлеудің тек тоғыз баптауына ие болса, қазір спектр 650-ге дейін ұлғайған. Сонымен қатар, пневматикалық аспа автомобильді (алдыңғы және артқы бөліктерін) кіруге/шығуға ыңғайлырақ болу үшін 3 см-ге көтереді.

F SPORT айырмашылықтары

F SPORT нұсқасы әлдеқайда спорттық экстерьерге ие, және бұл тек алдыңғы жағынан көбірек байқалады. Ұршыққа ұқсас радиатор торы мұнда өзгеше, осындай 7100 беттен тұратын аса күрделі «ұршықты» жасау үшін CAD-операторларға 5 ай қажет болған. Егер бұл мәлімет қызықтырса, онда LS-тің «гриль» сынды стандартты торында бұл көрсеткіш — небәрі бес мың.

F SPORT үшін жасалған бірегей дизайнды 20 дюймдік дискілер оның агрессивті образын толықтырады. Бұл әртүрлі көлемді: алдыңғы дөңгелектер үшін — 245/45RF20 және артқы дөңгелектер үшін — 275/40RF20, жарылуға төзімді шиналарға да қатысты. Интерьер ойықталған және алюминийден жасалған панельдермен өзінше жарқырайды. Мұндағы виртуалды құрылғылар панелі де ерекше — LF-A лимитті суперкардың визуалды «көңіл күйімен». Ұсақ бөлшектер жайлы да ұмытпаймыз — сол аяқтың демалуына арналған платформаны қосқанда, трансмиссия селекторы мен педальдер алюминиймен әрленген.

Техникалық жағынан айырмашылықтар бар. Тежегіштері өнімдірек: алдынан — алты поршеньді және артынан — төрт поршеньді, ал стандартта бұл механизмдер төрт және екі поршеньді болып келеді. Алдыңғы желдетілетін тірек дискілерінің көлемі 400×36 мм (стандартты нұсқа 357×34), ал артқысының көлемі F SPORT деген жазуы бар нұсқаның 335×25-ке тең көлеміне қарсы — 359×30.

Спортнұсқасы, сонымен қатар, басқа баптауларға да ие. Мұнда ауыспалы беру қатынасы бар рөлдік басқару, рөлді бұратын артқы аспа және белсенді стабилизатор қолжетімді. Сондықтан, F SPORT — бұл жәй ғана өзге бамперлерден тұратын пакет пен спорттық стильде безендірілген салон ғана деп айтуға аузың бармайды.

Техникалық сипаттамасы

Автокөлік
Маркасы, үлгісі Lexus LS
Нұсқасы LS 500 AWD
Өндіріс Жапония
Шығарылған жылы 2017
Шанағы тасымалдаушы
Типі седан
Классы F
Есіктер саны 4
Орын саны 4 *
Қозғалтқыш
Үлгісі V35A-FTS
Типі бензинді V-іспеттес турбиналанған
Орналасуы алдында көлбеу
Қуаттану жүйесі құрама бүрку
Цилиндрлер/клапандар саны 6/24
Жұмыс көлемі текше см. 3 444
Ең жоғарғы қуаты, а. к. (кВт)/айн/мин 421 (310)/6 000
Ең жоғарғы айналу сәті, Нм/айн/мин 600/1 600–4 800
Динамикалық сипаттамасы
Ең жоғарғы жылдамдық, км/сағ 250
Екпін алу уақыты с. 100 км/сағ дейін 4.9
Трансмиссия
Жетек тұрақты алдыңғы жетек
Беріліс қорабы автоматты 10 сатылы
Аспа
Алдыңғы дербес қостетікті пневматикалық
Артқы дербес көптетікті пневматикалық
Тежегіштер
Алдыңғы дискілік желдетілетін
Артқы дискілік желдетілетін
Көлемдері мен салмағы
Ең төменгі жол саңылауы, мм 144
Ұзындығы/ені/биіктігі, мм 5 235/1 900/1 450
Дөңгелектік база, мм 3 125
Шиналар өлшемі 245/45 RF20
Жарақталған массасы, кг 2 105–2 290
Толық массасы, кг 2 670
Жүксалғыш көлемі, л 480
Жанармай шығыны
Қалада, л/100 км 13.5
Қала сыртында, л/100 км 7.8
Аралас цикл, л/100 км 9.9
Жанармай багының көлемі, л 82

* Ottoman жайлы артқы орындықтарын қосатын Executive пакетімен.

Комментариев: 0

Чтобы оставить комментарий, вам необходимо зарегистрироваться или авторизоваться.