Kia дизайнерлерінің соңғы он жылда жасап, өндіріске батыл түрде жіберген жұмыстары жәй ғана жетістік емес. Сілкініс! Ең болмаса, азиялық ауқымда. Тіпті автоөнеркәсібі дамыған жапондардың өзі желкелерін қасып, қарындаштарын ұштап, жаңа күшпен суреттер мен бөлшектерге назар аудара бастады емес пе. Алайда, енді кәрістерді тоқтату мүмкін емес. Және оларды артта қалған деп айтуға болмайды.
Бірақ олар Sportage-дің шанағына не істеген?
Бәрі қалай сәтті жалғасып еді! Kia шанақтары мен салондары дәстүрлі шығыстық та, еуропалық та мотивтерді үйлестірген өзіндік стильге ие болды. Мен 2010 жылғы үлгідегі Sportage-ді (SL шанағы) ең сәтті жобалардың бірі ретінде санайтынмын. Ал рестайлингтен кейін ол қандай болып шықты! Бір кездері мен тіпті осы көлікті сатып алу жайлы да ойлап едім. Бірақ алмадым. Себебі мен автокөлікті дизайны мен құны үшін бағаламаймын. Оның техникалық күйі, сапасы мен қоры мен үшін маңыздырақ. Мен ол кезде «Сәл күтейін, жапондық көлікті міне тұрайын» — деп ойлағам. Дегенмен де жаңа Sportage-бен кездесуді асыға күттім. Мүмкін расымен де алуға бел буармын!
Тауарлық Sportage-дің жаңа,төртінші буынының (QL) суреттерін көргенде, басыма келген бірінші ой — «көңілімнің қалғаны» болды. Бақа тұмсық. Сен қайдан шықтың? Шрайер соңғы жылдары жолбарыс тұмсығын тұспалдаушы еді, ал мұнда — қисынсыз фар, және созыңқы радиатор торы…
Әрі Cayenne мен Tribeca-ның алғашқы буынының қосындысы жөнінде де әркім сөз еткен еді. Дизайнерлер құлақтары қызарып отырған шығар, және рестайлингке не істеу керегін түсінетін болар деп үміттенем. Немесе жаңа идеялар іздестірер.
Дегенмен, Sportage-дің қырынан және артынан қарағандағы көрінісі сеп-сергек! Ойымда тағы бір қарама-қайшылық пайда болды: «алды онша емес қой», ал арты … керемет! Және, шындығын айтқанда, мен Sportage сатып алғысы келетіндерді түсінем: олар бұл көлікті бір уақытта қалауы не қаламауы мүмкін. Жалпы, мен Kia Sportage-ді сатып алудан тағы да бас тарттым. Бұл жолы дизайн үшін. Ал әкем бас тартқан жоқ. Ол даулы тұмсықты біраз айналшықтағанымен, алғашқы сатып алушылардың бірі атанды.
Айтпақшы, шанағынан бір тұрмыстық кемшілік табылды — ол есікті жабуға қажет күш. Біз «жигули» есіктерін қалай жабатынын ұмытып та қалғанбыз, сондықтан мұны қолдың жеңіл қимылымен жүзеге асырамыз. Ал мұнда — шылп еткен қатаң дыбыс, — бірақ есік соңына дейін жабылмады. Мұның себептерінің бірі — салонның желдеткіш клапандарының шамасы келмеуінде болуы мүмкін. Есікті жапқан кезде ауа ешқайда кете алмайды, ал есіктер салыстырмалы түрде жеңіл, міне сондықтан да қарсылыққа кезігеді. Sportage-дің дымқыл ауа райында әйнектерінің терлеуімен байланысты да мәселелері бар болғандықтан, осы нұсқа шындыққа жанасатын сияқты.
Sportage салоны маржан тәрізді
Ал интерьері бұрын болмағандай тамаша! Оның алдындағы типтік корей стилінен 10 ұпайға асып түскен. Сәнді әрі ұстамды. Аспаптар панелі түзу сызықтар мен ортасында экраны бар, шамамен 90 градусқа еңкейген алдыңғы панельдің және стильді жиектемелі тік дефлекторлардың арқасында өзіндік кескінге ие болған.
Торпедоның жоғарғы жағы қолға ең жағымдысы, ол былғарыға ұқсас жұмсақ материалдан жасалған. Төменірек — батырмалы блок пен климат-бақылау жүйесі бар аздап ісінген белбеу орналасқан. Барлығы да өте ұқыпты. Көз қуантады, ал қол ұмтыла береді.
Отыра сала, керегі дәл осы сияқты көрінді. Рөлдің диаметрі мен шеңбер мінсіз өлшемге ие, баптау ауқымы жақсы колонка, басқыш және кресло. Алайда, бір-екі сағат жүргеннен кейін бағдаршамға тоқтағанда, мен жастықша баптауларын түрте бастадым. Сәл жақын, алысырақ, ээ… жоқ, тағы да сәл… Ой, бұл немене өзі?! Тас жолдағы келесі сағатта тіпті денем ыңғайлы қалып таба алмай, тынышсыздана бастадым. Орындықтың өзін баптауды қойып, біресе төмен сырғып, біресе жоғары көтеріле бердім. Менің байқағаным, орындықтарға жастықшаның алдыңғы жақ шетінде болатын баптаулар жетіспейтін сияқты.
Айтпақшы, әкем де бір-екі айдан кейін орындықтар баптауын таба алмағанын айтып, шағымданды. Оның тұлғасына маған әлі алыстау, оның үстіне менің бойым да одан ұзын. Ендеше, әйтеуір бір жерінде жаңсақтық бар болғаны.
Қаріптер және типографика
Сіздерге қалай екенін білмеймін, бірақ мен үшін межеліктегі мәтіннің немен жазылғаны, батырмалардың жазуы мен олардың бірге жақсы көрінуі маңызды. Kia мен үшін «азиялықтар» арасында осы тұрғыда бір эталонға айналып бара жатқандай. Межеліктегі сандар мен батырмалардағы , дисплейдегі әріптер өте әдемі. Мәтіндер оңай оқылады, ал бұл қозғалыс кезінде маңызды.
Өте маңызды бір жәйт: салонда «кәрісте» кетіп бара жатқандай сезім жоқ. Және іштей:"Kia-ны Audi ала алмаған соң алдым" — деген жағымсыз жазғыру да жоқ. Sportage іш жағынан өз бағасынан қымбатырақ көрінеді. Эргономика бойынша, орталық консольдегі батырмалардың үш қабатты ұзын қатары мен мультимедиа экранына жасырылған климат баптау көрсетілімін айтып, қазбалай беруге болады. Сынақ кезеңінде мамандар бұл сәтті шегеріп тастаған сияқты, бірақ бірдеңені өзгертуге кеш болған. Содан, олар басқанда экранда жүргізушіге баптауларды көрсететін CLIMATE батырмасын жасау жеңілірек деп шешкен болуы керек. Бұл ішінара мәселені шешеді, ал әрі қарай — әдеттің ісі.
Ал басқа жағынан супергуд — батырмалары кері байланысымен қуантады, реттегіштер мен тетіктер сындарлы күшпен айналады/қайта қосылады. Сапасы жақсы сезіледі.
Тас жолға шығамыз
Еуропалық дағдыларын Sportage қозғалыста да көрсетті. Әрі, жылдамдық неғұрлым жоғары болса, соғұрлым кроссоверді құрметтей бастайсың. «Sokol-ға» барар жолда 140 км/с жүргенде бір буыны да қимылдаған жоқ. Рөлі жағымды ауырлықпен қаныққан, Sportage түзу жолда да, бұрылыстарда да өз бағытынан тайып кетуге тырыспайды. Дегенмен, дөңгелектері зауыттық — бастапқы жиынтықтағы кореялық Hankook Ventus Prime 2.
Өскеменде құрастырылған тестілік көлік капотының астында 2 литрлік мотор бар. Бұл біздің нарыққа келетін автокөліктерде болатын жалғыз мотор, әрі қуаттылығы фантастикалық қуаттан айтарлықтай алыс — мұндай көлем үшін 155 күш мүлде неміске тән қасиет емес. Қалалық абыр-сабырға жарайды, алайда газ басқышындағы «ауа» бәріне бірдей ұнай қоймас.
Тас жолда алдын ала ойлануға тура келеді, 6-сатылы автоматты тірілту үшін моторды айналдыру қажет. Егер Sport режиміне қосылса, әрекет жылдамырақ жүзеге асады. Белсенді жүрісті ұнататындарға спортрежимді үнемі қосып қою керек бола ма деп қорқам. Айтпақшы, Sportage біздің нарықтағы механикамен жабдықтала алатын кроссоверлердің бірі.
Төмпешіктер мен бұдырларға қатысты айтсақ. Біздің көлікте он жетіліктер тұрған, және әдеттегі төмпешіктерді Sportage толық төртке еңсерді. Аспа шымыр, бірақ ызыңсыз қозғалады. Егер осы класстағы заманауи кроссоверлермен салыстырсақ, онда жайлылығы орташадан жоғары. Менің әкемнің пікіріне келер болсақ: оған тіпті R17-дегі Sportage қатты көрінеді. Онымен ішінара келісем — жылдамдық бәсеңдеткіштен өткенде арт жақтағы жолаушыларды сілкіп жібереді. Арты сәнді, қысқа әрі жеңіл.
Бұл жүрісіне қатысты жалғыз ескерту болар. Әрі мен үшін Sportage-дің бұрылыстарда өзін өзі ұстауы мен басқарылуы маңыздырақ. Және мұнда ештеңеге мін таға алмайсың — жарап тұр. Жоқ, одан да артығырақ — оны басқарудан ләззат аласың. Рөлі де ыңғайлы, алдыңғы панелінің дизайны көрнекі, әрі темір тұлпар да тіліңді алады. Kia-ның драйверлер жүрегінен орын алуға тырысатындығы сезіледі.
Енді тек Қазақстанның қалаларына Алматыдағы Әл-Фараби көшесіндегідей жолдар төсеуін күту ғана қалды, сонда жұмсақтық пен аспаның тесілмейтіндігі сынды сипаттамаларға мән берудің де қажеті болмайды.
Шығындары жөнінде не дейміз?
Sportage қомағай. Біздің облысқа тестілік сапарымызда орташа шығын мөлшері — 100 км-ге 10 л-ді әрең сақтадық. Ал қалада екі литрлік Sportage шамамен 5 литрге артық жанармайды қажет етті. Менің әкемнің есебі бойынша, қалада оның көлігі 100 км-ге 14,3 литр тоқсан бесінші жақсы жанармайды тұтынады екен. Жазда сәл аздау — шамамен 13,5. Жалпы алғанда, 62 литр орта есеппен 420-450 км-ге жетеді.
Сыйымдылығымен, Sportage тіпті де көңіліңізді қалдырмайды. Бес адамды бортқа емін-еркін алады, және бұл өте жайлы сыйымдылық. Арт жақтағы жолаушылар иін тіресе, бірақ жартылай бұрылып емес, арқасын сүйеп отырады. Жүксалғышқа 30 келілік шабадан мен көптеген шағын сөмкелер сыйып кетеді. Айтпақшы, орындықтардың арқасы бейімдеуге келеді. Тіпті салоны матадан жасалған орташа жиынтықталғандарының өзінде арт жағында жылытқыштары бар.
Дыбыс оқшаулау қабілеті орта деңгейде. Тек басып озу кезінде күш салғанда болмаса, мотор даусы қатты тықылдайды деуге келмейді. Қайта, дөңгелектері көбірек шуылдайды, әсіресе қыста бұдырлы дөңгелектер жақсы естіледі. Салонда бәрі тамаша болуы үшін аркалардағы шуылды жою ғана қалды.
Көпшілік «Спортаж» атап жүрген темір тұлпар бірнеше шешімдер қатарымен жақсырақ және күштірек болған. Интерьері, ойланып жасалғандығы, сапасы, басқарылуы — барлығы ұтымды үйлескен. Бірақ дизайнерлер алдыңғы бөлігінің дизайнын дұрыс жасамаған. Мен тестілік көлікте де, әкемнің көлігінде де аз уақыт өткізбедім. Бәрібір бұл дизайнға үйрену мүмкін болмады! Дәл осы базада жасақталған Hyundai Tucson анағұрлым ұтымды және бірегей көрінеді. Дегенмен, алдыңғы ix35-тің қандай ұсқынсыз болғанын еске түсіріңіздерші. Ал Kia-мен бәрі керісінше болды. Басында айтқанымдай, осындай көлікті… эх!
Kia-ның менің гаражымнан орын алуға деген тағы бір талпынысы күтуге тұрарлық па? Мен фейслифтті (автокөліктің сыртқы келбетінің өзгеруін) күтемін. Дегенмен, міне, оның алғашқы фотосуреттері де тарап кетті. Сәл жақсара түскенмен, концептуалды бұлтартпас өзгерістер байқалмайды. Kia, сен мені бесінші буыныңмен тағы да таң қалдыра аласың деп үміттенемін.
Ұнағаны:
- дизайн және интерьердің мықты сапасы
Sportage салоны — нарықтағы көліктің азиялық түрлерінің ішіндегі ең теңгерімдісі. Стиль, жағымды пластик, жақсы текстиль және ұқыпты құрастырылым. - жолда өзін жақсы ұстауы
Бұрылыстарда ауытқымай, тік жүреді. Рөлдік басқару жүргізуші үшін түсінікті. Аспаның қаттылығына қатысты шағымдар негізді, бірақ тіректері соққыларды жақсы игереді. - кең салон
Ішінде классы жоғары көлікте отырғандай күйде боласың. Дизайн мен интерьер сапасынан бөлек, Sportage-дің үйлестіру тәсілі де сауатты. - ойластырылған жабдықтау
Жабдықталуы аса бай болмаса да, жабдықтары көңілге қонымды құрастырылған. Тек МБҚ нұсқаларынан басқасының, себебі оларда тіпті АБҚ нұсқаларында базалық жабдықтауда болатын алдыңғы орындықтар мен рөлдің жылытқыштары да жоқ. - еуропалық эргономика
Батыстық мектеп дизайнда ғана емес, басқару құралдарының орналасуында да сезіледі. Бірақ мүлтіксіз, тұтас алғанда, толық төрттікке лайық!
Ұнамағаны:
- экстерьерінің даулы дизайны
Көбі талғаммен талас жоқтығын айтады, бірақ, күмәнді алдыңғы бөлігі жайлы мамандар да, қатардағы жүргізушілер де жағымсыз пікір білдіруде. - әлсіз екпін динамикасы
Капот астындағы екі литр үшін 155 күш қазіргі өлшемдерге сай аздық етеді. Динамика тек Sport режиміне ауыстырғанда ғана пайда болады. - жоғары жанармай шығыны
Екі литрлік мотор тіпті зейнеткерлік режимде де 100км/13л тұтынады. Ал егер рөлде белсенді драйвер отырса, онда шығын мөлшері 15-16 литрден асып кетеді. Абырой болғанда, 92-бензинді құюға болады. - жоғары баға
Жоғары сапа — жоғары баға деген ұғымға түсіністікпен қарауға бола ма? Теориялық жағынан, иә, болады. Бірақ, Sportage баға жағынан VW Tiguan-ға жеткенде, сана: бұл жәй ғана Kia емес пе!- деп қарсылық танытады. Бастағы көп нәрсені өзгерту керек. - тиімсіз вентиляция
Жаңбыр мен аязда әйнектері терлеуге бейім. Салонның әлсіз вентиляциясы жөнінде есікті, әсіресе артқы есіктерді жабудағы қиындықтар да хабар береді.
Sportage-дің Қазақстандағы баламасы
Ықшамды кроссоверлер сегментінде Қазақстан нарығында түрлі талғам мен қалтаға сай ұсыныстар жетерлік. Мұнда корейлік өндірушілер де, «қытайлар» да, бірнеше «жапондар» мен «немістер» де бар. Қазақстанда жаңа Sportage (QL) 7 840 000 теңгеден бастап 10 300 000 теңгеге дейінгі бағада сатылады. Материалда көрсетілген бағалар жарияланым сәтінде өзекті болып табылады.
Kia Sportage тарихы
Бүгін Sportage — ықшамды кроссовер немесе көпшілік айтатындай, паркет көлігі. Ал оның алғашқы буыны (JM) қатты артқы белдемесі мен part-time толық жетегі бар жақтаулы көлік болған. Шағын, бірақ бесінші есігінде қосалқы дөңгелегі бар жол талғамайтын көлік мәртебесіне ие Sportage нарыққа 1993 жылы шықты. Сол жылдары автомобиль басылымдарын оқитындар сол кезде сәнді болған биостильдегі джипті байқамауы мүмкін емес еді.
Алғашқы Sportage ұзақ жасады. Бірінші маңызды жаңартуды 6 жылдан соң, және одан кейін 2001 жылы өткерді. Шығарылым Калининградтағы зауытта 1999 жылдан 2007 жылға дейін жалғасты. JM өндірісі 2004 жылы екінші буынның таныстырылымынан кейін де жалғасын тапты.
Ал екінші туынды (КМ) — бұл енді паркет көлігі. Жақтау өткенде қалып, толық жетек артқы редуктордағы тұтқыр муфтаны қосты, артқы аспасы дербес болды. Есесіне, капот астына көлемі 2,7л қуатты V6-ны қойды. Мұндай көлем мен алты цилиндр Sportage тарихында болмаған еді. Екінші буын 1999 жылы Kia-ны сатып алған Hyundai Motor-мен бірге жасалған болатын, содан бері Sportage бен Tucson бауырларша, бір платформаны, моторларды және барлық техниканы бөлісіп келеді. Айырмашылықтары тек дизайн мен жайғасымында.
2006 жылы Kia-ның дизайн-бюросының басшылығына Петер Шрайер келді, 2007 жылы Sportage сыртынан да ішінен де жаңартылды. Осы буындағы фирмалық «жолбарыс тұмсықтың» алғашқы белгілері 2008 жылдан кейін «спортейдждердің» радиатор торынан байқала бастады.
Sportage-дің ең көп сатылатын буыны — үшінші (SL) — Шрайердің төл туындысы, ол әлемдік нарыққа 2010 жылы шықты. Мұнда ықшамды кроссовер тұжырымдамасы сақталды, алайда, көлік шанағын ауыстырып, техникалық жағынан терең жаңартудан өтті, ал ең бастысы — фирмалық стильді иеленді. 2011 жылдың 24 наурызынан бастап, Sportage Өскемендегі зауытта құрастырыла бастады.
SL генерациясы 2013 жылдан 2014 жылға дейінгі аралықта түрлі нарықтарда түрлі кезеңдерде жаңартуды басынан өткерді. 2015 жылы Қазақстанға тек 2017 жылы жеткен төртінші буын (QL) пайда болды.
Kia Sportage-ге арналған моторлар гаммасы
Қазақстан нарығында Kia Sportage тек бір ғана — 4 цилиндрлі 16 клапанды 2 литр көлеміндегі (Nu 2.0 MPI сериясы) бензинді мотормен ұсынылған. 155 күшке (Ресейде қуаты 149-ға дейін басылған) және 192Нм айналу сәтіне ие.
4GNA — 4G тобындағы жетілдірілген мотор басқа үлгілерге (Cerato, Soul) де орнатылады. Ол тарихи бастауын Hyundai Motor-дан алады, Creta және Tucson кроссоверлерінің капоттарының астына да дәл осы мотор қойылған. Үлестірілген бүріккіш арқасында 92 бензиннен қорықпайды (дегенмен өндіруші 95 жанармайға кеңес береді), қыңыр емес, шынжырдағы ГТМ (газ таратушы механизм), механикалық беріліс қорабымен агрегаттала алады. 4G моторлары өзінің төзімділігі жөнінде жақсы пікірлерге ие болған, бұл жалпы Қазақстан мен ТМД елдері үшін маңызды.
Ресей нарығында тағы екі мотор бар. Бірі — көлемі 1,6 литр (4GFJ) турбиналы үрлемі бар, қуаттылығы 177 күшке және 264Нм айналу сәтіне тең болатын жоғарғы деңгейдегі бензинді мотор. Мұндай қозғалтқышты Sportage, GT-line нұсқасында болады және роботталған 7 сатылы беріліс қорабымен жабдықталады. Екіншісі — 2 литрлік турбодизель (4DHA) — 185 а.к мен 400 Нм береді. Бірақ дизель тек ең топтық: GT-line және Premium нұсқаларында ғана қолжетімді.
Трансмиссиялық шаруалар
Қазақстанда Sportage-дегі толық жетек барлық дерлік, тіпті механикалық 6 сатылы қораптық нұсқаларда да кездеседі. Жүйе автоматты — электрогидравликалық муфта арқылы айналатын сәт жол жағдайына, рөлдің орналасуына, жылдамдық пен үдеуге байланысты алдыңғы және артқы дөңгелектер арасында үлестіріледі. Тұрақты толық жетекті АБҚ-ның иінтірегіндегі батырма көмегімен іске қосуға болады, бірақ 40 км/сағ. аса жылдамдықта бұғат өздігінен өшіп қалады.
Техникалық сипаттамасы
| Автомобиль | |
| Марка, үлгісі | Kia Sportage |
| Өндіруші | Оңтүстік Корея |
| Шығарылған жылы | 2017 |
| Шанақ | тасымалдаушы |
| Типі | кроссовер |
| Есіктер саны | 5 |
| Қозғалтқыш | |
| Үлгісі | 4GNA |
| Типі | бензинді қатарлы |
| Орналасуы | алдыңғы жағында көлденең |
| Қуаттану жүйесі | тікелей бүрку |
| Цилиндрлер/клапандар саны | 4/16 |
| Жұмыс көлемі , текше см | 1 999 |
| Ең жоғарғы қуаты, а.к.(кВт)/айн/мин | 155 (114)/6 200 |
| Ең жоғарғы айналу сәті, Нм/айн/мин | 192/4 700 |
| Динамикалық сипаттамасы | |
| Ең жоғарғы жылдамдығы, км/сағ | 180 |
| Екпін алу уақыты 100 км/сағ, с | 11.6 |
| Трансмиссия | |
| Жетек | артқы дөңгелектері қосылатын алдыңғы |
| Беріліс қорабы | автоматты 6 сатылы |
| Аспа | |
| Алдыңғы | McPherson типті дербес серіппе |
| Артқы | көптетікті дербес серіппе |
| Тежегіштер | |
| Алдыңғы | желдетілетін дискілі |
| Артқы | дискілі |
| Өлшемдері мен салмағы | |
| Клиренс, мм | 182 |
| Ұзындығы/ені/биіктігі, мм | 4 480/1 855/1 655 |
| Дөңгелектік база, мм | 2 670 |
| Шиналарының өлшемдері | 225/60 R17 |
| Жанармай шығындары | |
| Аралас цикл, л/100 км | 8.3 |
| Жанармай багы, л | 62 |
Что 4GNA что G4KD один хрен с задирами после 80000 (а может и раньше), ничего не решили, что печально для не самой легкой машины