«Престиж» жиынтығындағы Avensis автомобильді кілтсіз ашу және моторды батырма арқылы іске қосу жүйесімен жабдықталады. Кілттің өзі әдеттегі үш: есік құлыптарын және жүксалғышты бөлек ашу, жабу батырмасы бар салпыншақ сияқты көрінеді. Иммобилайзер, зауыттық ұрлап кетуге қарсы дабыл секілді, барлық нұсқаларында қарастырылған.
Bentley көп ақша тұруы мүмкін. Toyota да. Әрине, бұл мәтіндегі «қымбат» деген түсінікті классқа қатысты ажыратқан жөн — «ағылшындық» пен «жапондықты» салыстырудың түкке де қажеті жоқ, әр сатып алушы көлікті өз қалтасының қалыңдығына сай таңдайды. Себебі, мұнай скважинасының иесі Bentley — қымбат көлік емес деуі мүмкін ғой.
Міне, біздің алдымызда тұрған құны $41 400 болатын Toyota Avensis. Арзан көлік емес! Бірақ, әрине, тек өз классы үшін.
Модельдік қатарда Avensis бар кезең мен халықтың әлемдік бестселлеріне айналған — Corolla мен Қазақстандағы ең танымал үлгі — Camry арасында тұйыққа тіреліп тұр. Баға саясаты да аралық орынға ие. Теңгерім сақталғандай болғанымен, өзіңізден сұрап көріңізші, сіз дәл сол ақшаға не алар едіңіз: шамадан тыс жасақталған «Королланы» ма, әлде орташа жиынтықтағы «Авенсисті» ме? Мүмкін жоғарғы нұсқадағы Avensis немесе қарапайымдау Camry аласыз ба? Екі жағдайда да Avensis қисынды таңдау болар еді. Бірақ, жан-жақты қарасақ, біздің нарықтың ойы мүлде бөлек сияқты. Көлік қымбат тұрады дейді. Неліктен екенін анықтап көрейік.
Avensis-тің универсал сияқты нұсқасы сатып алушылар санын арттыруға қажет қосымша сынды. Әрі өте әдемі. Ал Қазақстанда таныстырылған көптеген маркалардағы сияқты, Camry мен Corolla-да вагон іспеттес шанақ жоқ., бұл «Авенсиске» артықшылық үстейді.
«Авенсистің» дизайны турасында біраз пікір таластыруға болады. Сырт келбеті, әсіресе,алдыңғы бөлігі өзгеше: оптиканың оғаштау пішіні мен олардың шығыңқылығы автокөліктің қабағына сәтсіз ота жасалғандай әсер қалдырады. Бірақ, менің ойымша бұл камриге қарағанда сонылау көрінетін сияқты. Әрі жиынтықта алдыңғы жағы құбыла түседі. Мен оны жыртқыш дер едім. Ал артқы жағы туралы айтар болсақ, онда Еуропалық суретшілердің өнері сұлулыққа таласта «елуіншіні» тіпті шаң қаптыруға зор мүмкіндік береді. «Авенсистің» артқы бөлігі барлық жағынан алып қарағанда Camry-ден әлдеқайда тартымды көрінеді. Осы сәтте айта кетер жәйт, «Авенсис»-седанның артқы бөлігі универсал шанағына керемет түсірілген. Тіпті шамдарын да зақымдамаған.
Ашығын айтсам, кейінгі кездері менде осы универсалдарға деген әлдебір қызығушылық оянғандай. Біреуі де менің назарымнан тыс қалмайды — көліктер ағынында әрқайсысына анықтап қарауға тырысамын. Олардың арасында расымен келістілері аз болған соң ба екен. Менің жаныма жаққаны сигара тәріздес «Авенсис» болды. «Стильді» деген ұғымды Toyota-ға қатысты қолданатыныма өзім де сенер емеспін. Бірақ — йә! Шанақтың қара түсі үлгінің тартымдылығын арттыра түседі, ал оның седанға қалай жарасатыны айтпаса да белгілі — бұл жәй табиғилық. Дегенмен, мені мына мәселе толғандырады, аласалау емес пе? Алайда аласалау. Әрі асылмалары да аса зор. Және алдыңғы бамперлердің төмен жағындағы бір қарағанда осал көрінетін пластмассалар да біздің жолдар мен жиектастарға талай ілініп қалған. Сондай-ақ, универсал аса ауыр сияқты көрінеді: жалпақ бүйір жақтары, биік терезе асты сызықтар мен арт жағына қарай тарылатын әйнектер. Тіпті дөңгелек аркаларының өзі мұнда белгілі бір рөлге ие: дөңгелекті тура шеңбер бойына айқындайды, шина мен қанат арасындағы саңылау азғантай болады.
Бұл универсалдың мені баурап алғанын айтпасам болмас. Оның үстіне, мен есіктің тұтқасын тартқанда, нағыз еуропалық көліктегідей жағымды ауырлықты сезіндім. Танысудың осы сәтінен-ақ бұл қарапйым Toyota еместігін түсіндім.
Шанағы осындай Avensis-ке мен алғаш Финляндияда отырып көргенмін. Және бұл мүлде драйв сынағы емес, әдеттегі такси көлігімен қонақ үйден мейрамханаға дейінгі сапар болатын. Менің «көлік қалай екен?» деген сұрағыма такси жүргізушісінің берген бірнеше жауабы мен алғашқы бақылау менің дәл осы көлікке назар аударуыма ықпал еткен еді, ішкі жағынан ол маған таныс «тойоталарға» ұқсамайды. Бірден «еуропалықтармен» салыстыра бастағанмын сол кезде. Бәлкім бұған дейін қонақ үйде тек Е-классты «мерседестерді» ұсынғаннан кейін бе екен.
Міне, бүгін де «Авенсистің» салонына отыра салып, мен бірден жақсы әрі маркаға тән емес сәттерді белгілеймін: жұмсақ пластиктің көптігі, батырмалардың сәл өзгешелеу жасалуы мен басқару құралдарының орналасуы, талғаммен жасалған хромдалған әрлеу. Мұнда тіпті бактың қақпағы да біршама қымбаттау Camry-дегідей тұрпайы иінтіректің емес, батырманың көмегімен ашылады. Бұл мәнде маған тіпті салонды жасауда лактың қалың қабаты жағылған нағыз ағаш қолданғандай көрінді, дегенмен олай емес әрине, бұл тек пластиктегі сапалы белгі. Не десе де, сурет көзге сондай жағымды. Мұның барлығы жоғарғы тереза асты сызықтарымен, жалпақ бағаналармен және төбесінің, орындықтарының және есік карталарындағы қосымшалардың әрлеу материалдарындағы жұмсақ түстермен бірге интерьердегі үй жайлылығын жасайды.
Жұмсақтық дизайны
Ақиқат болжамға сай келмейді — бұл «Авенсис» салонының дизайнына қатысты. Көліктің интерьері көзге бірден түсетін оның сыртқы келбетінен мүлде өзгеше. Ішінде бәрі үйдегідей, тек «тәпішке жетпей тұр. Егер бір-екі сәнді сызықтар мен сүйір бұрыштар болмағанда, мына архитектураның барлығын 90 жылдардың аяғында аса сәнді саналған биодизайн деп сенімді атауға болар еді.
Басқа мәселе — шолуға кедергі келтіретін бағаналарда, әсіресе шанақтың артқы бөлігінде — артқы жел әйнегінің шағындығы соншалық, оны оқатармен салыстыруға болады. Әрі қарай, отырысты реттеу барысында, рөлдің шығым диапазонының үлкен еместігін және орындықтың аса ыңғайлы еместігін байқадым. Тым болмағанда мен үшін, жастық тарлау — бүйірлік тіреулер сырт жағынан аяққа батады, ал арқалығында, тура иық белдеуіне құдды білікше қойып қойғандай. Қаттылау әрі тайғақ былғарының әсерінен арқа осы білікшемен шайқалақтайды да, дене бірқалыпты болмайды. Айтпақшы, жан-жақты алып қарасақ, бірен-саран саңылаулары көз тартқанымен, былғары жасанды сияқты. Орындықты реттеудің пайдалы қасиеттерінің бірі — жастықтың алдыңғы көтеріңкілеу жиегі.
Басқару құралдарында да шамалы ыңғайсыздықтар бар, бірақ неге екені белгісіз, мен оларға қолымды бір сілтедім. Себебі, маған мына универсал мен жалпы Avensis үлгісі ұнайды. Әрлеуінде көңілге тиетін бір ғана нәрсе — бұл орталық консольдегі пластик. Финдік көлікте отырғанда-ақ, оның сүйкімсіз сызаттарға толы екендігін байқаған болатынмын. Бұл қызметтік көлік болғандықтан, қалай болса солай пайдаланатын шығар деп түйгенмін сол кезде. Бірақ мына жерде де мен соған ұқсас мәселені көріп тұрмын. Алғашқы белгілері аудиожүйенің дыбысын реттегіштің айналасынан анық көрінеді, ал тұлпардың жүрген жолы бар болғаны 12 000 км! Әдемі «ағаш та» ұзақ жарқырамайтын шығар деп қорқам.
Еуропалық Жапония
Басқару құралдарындағы дағдылы тойоталық дәстүрлердің еуропалық қоспалалармен қосындысы елеусіз қалмайды. Автокөлікті инженерлер Жапонияға ұшып бара жатқан және Avensis әзірленген Францияға қайтар жолда ұшақ ішінде жасағандай сезіледі. Эргономикасы жаман емес, бірақ бір-екі майда қателіктер де бар.
Автокөлікпен танысу барысында жақсы сезімдер нашарларымен, нашарлары жақсыларымен араласып кетті. Дегенмен, санамда анық қалып қойған онша жақсы емес ерекшелік бар — тіпті ең қуатты моторы бар Avensis-тің өзін ұлу деп атауға болады. Вариатор селекторының жанында Sport деген жазуы бар құтқарушы батырма бар, бірақ оны қосқан жағдайда ұлуымыз тек жылдам әрі сәл елгезектеу ұлуға айналады. Әрине, бұған қалада бәрібір жылдам жүре алмайсың, орташа жылдамдық 17-20км/сағ. болады. Осы қуатты моторлардың кептелісте кімге керегі бар?-деп сылтау айтуға болады. Солайы солай ғой, бірақ көліктің ұйқышылдығы тіпті тұрақта қозғалғанда да қинап жібереді адамды. Акселератор педалі әлден жартысына жуық басылған, ал көлік мұны енді ғана ұғына бастады. Реттелмейтін қиылыстардан өтер кезде қайта сақтық жасауға тура келеді. Жә, жарайды, анау арттағылар, сигнал беруді қойыңдаршы, мен тез өтіп кететініме сенімді емеспін! Қала сыртында динамикалық жайсыздық арта бастайды. Camry-де көлемі 3.5 литрлік V6-ның болуы, ондай алыппен қуанта алмайтын, яғни капотының астында небәрі 152 күшті 2 литрлік моторы бар «Авенсистің» шанағының алуандығын да көлеңкесінде қалдырады, әрине. Avensis оған еш жауап қайтара алмайды. Оның гаммасында тағы бір мотор бар, бірақ ол әлсіздеу, көлемі 1.8 литр ғана.
Универсал. Ал, жалпы, Avensis қаншалықты әмбебап? Шынымды айтсам, екінші буындағысы сияқты, бұл «Авенсистің» де рейлингі жоқ екендігін бірден байқамаппын. Бұл қалай болғаны? Сонда жүксалғышқа бұранда салынбайды ма? Жо-жоқ, уайымдаудың қажеті жоқ, тек ендігәрі бекіту үшін рельстер қолданылады. Ал артқы бөлімде не бар екен? Әдемі жүксалғыш! Бірақ, меніңше тарлау сияқты. Жақтауларының томпақ қаптамасы орнықты көрінеді, әрине, оған қоса ол жұмсақ түкпен көмкерілген, дегенмен сақтау орнының біраз көлемін алып тұр. Едені жоғарылау, ал артқы әйнектің еңістеу бұрышы мұнда үлкен қорапты есікке дейін жақындатып қоюға мүмкіндік бермейді. Бұл дәл сол сұлулық үшін іштегі бірдеңені құрбан етуге тура келетін сәт. Шыны сол, еденнің қос қақпағының астында түрлі қазыналарды сақтауға болатын сыйымды жәшіктердің екі бірдей қабаты бар. Менің әкем бұған қатты қуанар еді, өйткені ол өзінің «Волгасына» көліктің жарты бөлігін алатын қосалқы бөлшектерді салып алатын. Бірақ «тойотадағы» бұл кеңістіктердің қажеті қанша? Әлде жүксалғышты еден астынан бастап толтырып алу керек пе? Ал егер дәрі қорабы мен басқа керек-жарақтар жайлы сөз етсек, онда шеттерінде оларға арналған екі қуыс бар. Қысқасы, алған әсер екіұшты. Біріншіден, мен жүксалғыштың көлемін арттыру үшін көпқабатты еден астынан бас тартар едім. Екіншіден, дөңгелектің ауасы шығып кеткенін елестеткім де келмейді, бірақ сондай жағдай орын алса, бар байлықты астаушаларымен бірге шығарып, көшеде бөлшектеуге тура келер еді. Жауын астында. Түнде. Бр-р-р.
Отбасылық жағдайы
Барлық ТМД елдеріндегі сияқты, Қазақстанда да универсалдар — жүктелген еңбекқорлар. Осы сәтте Caldina деген арғы әжесі еске түседі, оның тіпті рессорлы аспасы бар түрленімі болып еді. Алайда Avensis-ті қаптармен және гипсті картондармен жүктеудің керегі бар ма? Жоқ. Жүксалғыштың көлемі кәсіби жүк тасығыштардың көңілінен шыға қоймас, ал жұмсақ, мамық дүниелердің барлығы уақыт өте келе былғанып кетеді. Автомобиль тек отбасылық қажеттіліктерге арналған.
Бір жағынан, Camry седаны мен Avensis универсалының жүксалғыш көлемдерін салыстырған дұрыс емес, өйткені вагонның Африкада да вагон екені анық қой. Бірақ мен Camry-дегі 506 литрді Avensis-тегі 543-ке қарсы қойып көруге бел будым. Айырмашылықтары тұп-тура емес қой. ұтып тұрған 37 литр — «жигулилердің» жанармай багындай-ақ. Шындығында, «Авенсистің» артқы арқалықтарын жазу арқылы 1609 литрге қол жеткізуге болады, ал егер төбесіне дейін жүк тиесе, онда бұл класстағы универсалдардың өлшемі бойынша жаман емес нәтиже шығады. Бірақ екінші шабаданды қою үшін, сіз оларды бүктейтін боласыз ба? Қысқасы, универсалдың пайдасы мен бейберекеттігі турасындағы пікірталас та кешке дейін созылып кетуі мүмкін, әрі қарсыласымыз екеуіміздің шіп-шикі мас боп қалуымызға да қауіп бар. Сөз реті келгенде айта кететін жәйт, мен пікірталас кезінде тіс жармаймын, бірақ сіздерге сыбырлап айтайын, дәстүрлі түрде универсал седаннан қымбат болады… «Авенсистің» жағдайында 2300 долларға. Бұл енді осындай аз ғана айырмашылығы бар фургонға көрік бермейтіні анық. Шабадандарды таксимен тасыған арзандау шығады. Өмір бойы!
Міне осылай, армандар баяу бұзылады. Көлем, жылдамдық, және тағы бірдеңелердің бірліктерінің қарапайым есебі бұған дейін біз ұнатқан дүниелерге күмәнмен қарай бастауға мүмкіндік жасайды. Avensis маған ұнай ма? Йә! Алайда қауіпті жағдайдың бетін бұру керек, себебі мен әлден оның өміріме қажеттілігіне күмәндана бастадым. Одан да аспасы мен жайлылығы жайлы баяндайын. Қозғалтқышты батырмамен оталдырдым да, салпыншақты …эмм…орталық консольдегі жалғыз (екіншісі шынтақ қойғыштың жәшігіне жасырылғанын кейін білдім, бұл онша ыңғайлы емес) стақан қойғышқа қойдым. Кеттік, жүргізіп көрейік! Қозғалтқыш қосылған және тұрақтан шыға бастаған сәттен-ақ, мен «Авенсистегі» тыныштыққа назар аудардым. Бұл үйреншікті емес. Шамасы мотор қалқанын, көліктің астын, есіктері мен төбесін де жақсылап жапсырғаннан кейін, дөңгелек аркасына төсеніш жетпей қалды-ау деймін. Онсыз да протектор жырашықтары тым аз, тас жолға арналған жұмыр шиналар, тіпті қалалық жылдамдықта да гуілдей бастайды. Айтпақшы, біздің дөңгелектер ең жоғарғы 17-дюймдік өлшемде болды. Avensis, әрине қаттылау. Оның асфальттың ақауын қалай байқайтынын түсіну қиын емес, бірақ соның өзінде, аспа кедір-бұдыр төмпешіктерді салдырламай, емін-еркін еңсереді. Әл-Фараби не Шығыс айналма тас жолындағы су сепкіштер үшін ең керегі осы аспа сияқты, бұл жолдарда әрі жылдам жүруге, әрі көлікті барлық төрт «аяғымен» сезінуге мүмкіндік бар. Универсал үшін, Avensis жақсы тізгінделеді, жантаю бар, бірақ шанақ көлікті сырғытпайды не бұрылыста итермейді. Берілмейді. Шындығында, мен кей жерлерінде жоғарғы жылдамдықпен жүруге болатын әдеттегі қалаға тән қозғалыс жайлы айтып отырмын. Рөлдегі электр күшейткішке қарамастан, маған көлікті басқару ұнады.
Тежегіштері, айтпақшы, сезімтал: педаль сезгіш, ондағы күшейткіш жеңіл бақыланады, бір жерлері бээмвэ педальдерін еске салады. Басқа-басқа, бірақ универсалдан, оның үстіне жапондық универсалдан дәл осындай тежегіштерді күтпеп едім. Дегенмен, педальден шығатын дырылдағанға ұқсас дыбыс жүйкеме тиді. CVT вариаторы жалпы жаман емес, менің «Авенсистің» ойланғыштығының басты себебін содан көретінімді қоспағанда, ол жайлы. Есесіне рөл астылық ауыстырып қосқыштар бар. Sport режимі мен қолмен басқару мына ұлуды түйреп жіберуге мүмкіндік береді, және ол қозғала байтайды. Бұл ретте, әрине газды жіберуге болмайды — айналым алып, тартып тұрғанда ұстау керек. Мұндай режимде қала ішінде жүрудің қауіпсіз еместігін өздеріңіз де түсінесіздер ғой. Дегенмен күш қорының тек форсаж ашық тұрғанда ғана емес, кез келген сәтте болғанын қалайды екенсің.
Егер мына мотор мен қорап жұбы болмағанда, Avensis дрйвты көлік бола алар еді. Капот астына 3.5 V6-ті қойса ғой, мына универсалды жалынды көліктер қатарына жатқызуға болар еді! Мысалы, Avensis S деген RS-тен күштірек, әрі жағымды естіледі емес пе.
Мен ішінара Avensis-ті мақтап қоям әрине, десе де, камридің жүрістік қасиеті қалыспайды, әрі салоны да кеңірек. Алайда Avensis сонша тар көлік емес. Жасыратын несі бар, Camry дәл біздің жолдарға арналып, дәл біздің клиенттердің қалауы есепке алына отырып жасалған. Avensis сәтсіздікке ұшырай ма?
Қорытындылайық
Расында, бұрынғыдай, Avensis Toyota әулетіндегі бір аластатылған үлгі сынды әсер қалдырады. Тым болмағанда, біздің нарықта. Ол басқаларынан өзінің харизмасымен, бөлшектерінің өзгешелеу болуымен және жолда өзін ұстауымен ерекшеленеді, бірақ біздің тұтынушылар үшін үйреншікті қасиеттер жағынан қалыс қалады.
Бұл сәтте еуропалық тойота жүргізушілері камриді ұнатпай, «Авенсисті» қуана-қуана жүргізуде. Еуропалықтардың «қырқыншыны» түгел сыңғырлаған пластмассадан жасалған, бюджеттік көлік деп, талқылағандарын естігенім бар. Сонда, не себепті оны Қазақстанда сонша жақсы көреді екен? Менталитет пе? Ол әрине рөл ойнайды, дегенмен өз ойымды айтсам, маған Avensis қымбаттау көрінетін сыңайлы. Тіпті белгілі бір қасиеттер жиынтығына ие универсал кейпіндегі көзірдің өзі оны бағаланған межеге жеткізе алмайды. Avensis-седан арзандау болады, бірақ Camry-дің ең арзан нұсқасының өзі көбірек тартады. Ал егер Toyota-дан әмбебап көлік іздесек, онда мүмкін, не дегенмен Venza дұрыс шығар? Ол Camry-ге қарағанда қымбаттау, бірақ менің түйсігіме сай, сатылымы мен нарықтағы орны әлдеқайда жақсы болатын сияқты.
Ал Avensis-ті мен тек оның эстетикалық қасиеттері үшін алар едім. Оның пайдалы болуынан көркемдігі басымырақ, әрі бұл мен үшін айтарлықтай маңызды, себебі ішінара болса да, еуропалық қасиетті бейнелейді. Сатып алудың қажеті бар ма, жоқ па, соны анықтау үшін, оның Toyota екенін, яғни күннің шығысындай сенімді екендігін еске түсірген жөн. Бірақ «Авенсисте» мен өзімді барлық «тойоталардағыдай» емес, өзгеше сезінем.
Ұнағаны:
- шанақтың сәнді дизайны
Avensis, сірә, марканың стиль, әсемдік пен жәй ғана сұлулықты үйлестірген аз ғана үлгілерінің бірі болар. Бұл ретте седан да, универсал да керемет көрінеді. Әсіресе қара түсте. - жайлы интерьер
Салонның әрлеуін, тиісті класс өлшемдері бойынша байсалды деп айтуға болады. Десе де, тіпті осындай деңгейдің өзі жанға жылу сыйлайды. Былғарысы сәл сапалырақ болса, әрі орталық консольдегі сырылғыш пластикті ауыстырса құба-құп болар еді. - шассидің еуропалық баптаулары
«Еуропалық» деген сөздің астарында әрқашан аспа түсініледі. Avensis қаттылау, бірақ сол мезетте тым нашар жолды емін-еркін еңсереді. Артықшылықтарына жолдағы беріктігі мен жақсы тежегіштерін де қосамыз. - лайықты жайлылық деңгейі
Avensis-тің алдыңғы орындықтары да, артқы диваны да жайлы. Тіпті соған ұқсас еуропалық көліктермен салыстырғанда да. Трансмиссиялық тоннель, айтпақшы, арт жағында да жоқ.
Ұнамағаны:
- әлсіз мотор-вариатор жұбы
Дұрысын айтқанда, осылар үшін көркем әрі сәнді автокөлік қарапайым көкөніс тасығышқа айналып шыға келеді. Сондай-ақ, қуаттырақ мотордың болмауы, камридің біздің нарықта әрдайым алдыңғы орында болуына жағдай жасайды. - жоғары баға
универсал үшін $41 400 — қымбаттау. Толық жетекті әрі клиренсі жоғарылау болса, Subaru Outback-ті шаң қаптырып кетер еді. Седан сәл арзан, бірақ біздің елде оны Camry-дің баламасы ретінде қарастырмайды. - жүксалғыштың көп қабатты едені
Мұндай үлкен органайзерді қолайлы деп әсте айта алмайсың, оның үстіне пайдалы көлемді де тарылтқан, ал бұл «Авенсистің» әмбебаптық коэффициентін төмендетеді. - қарапайым жол саңылауы
Бампердің төмен ілініп тұрған иегін зақымдап алмас үшін, сақтық танытып, креслоны жоғары көтеруге тура келеді, ал бұл маған ұнамайды, мұның барлығы көлік клиренсінің біздің соқпа жолдарға сәйкес еместігінде.
Toyota үйреншікті емес кейіпте
Сырттан көзқарас
Павел Ким
Жеке автокөлігі Renault Duster.
Белсенді өмір салтына арналған автокөліктердің табынушысы.
Алғашқы сәттен-ақ мені бұл көлікте бірдеңе алаңдатқан еді. Avensis — «тойота» «тойотасымен», бірақ нәзіктеу әрі жасандылау сияқты ма, оның үстіне оны әдетте Toyota-ға қолданбайтын терминдермен суреттегің келеді. Сондай-ақ универсал шанағындағы Avensis, жапондық марканың басқа үлгілерінің жанында асыранды сияқты көрінеді екен. Және таң қаларлығы — ол маған ұнайды. Дұрыс түсінбей қалмаңыздар, мен тойотаны жек көрмеймін, бірақ бұл марканың көліктерінің аса зор артықшылықтарының өзінде, олар менің сезімдеріме еш әсер етпейді. Ал Avensis әсер етеді — және бұл бір түрлі қызық. Бұл үлгіні Ресей мен Беларусь елінде сатуды сол үшін тоқтатпады ма екен?
Жалпы алғанда, Қазақстанда да бұл автомобиль елден ерек көрінеді. Бұл ағылшындық құрастырымдағы жалғыз Toyota болғаны аздай, оның бәсекелестерін санамалап шығу үшін бір қолдың бір саусағы жеткілікті болады. Бес есікті «Авенсиске» тек дәл сондай еуропалық мәнердегі, ұқсас бағадағы әрі танымалдығы төмен Hyundai i40 қана балама бола алады.
Егер осы екі көлікті салыстырса, Toyota қозғалыс жайлылығы жағынан Hyundai i40-ты артта қалдырады. Avensis-тің аспасы кедір-бұдыр жерлерді жақсы еңсереді, оған қоса жақсы энергия сыйымдылыққа ие. Дыбыс оқшаулауы жақсы деңгейде және жүк салғышы да ыңғайлырақ. Бұлардың теңдігі бағасында, салонның ыңғайлылығы мен шолу мүмкіндігінің төмендігінде (сыртқы айналар өте кішкентай, ал артқы көрініске арналған камера тек ішінара көмектеседі, автокөліктің габариттері жөнінде ешқандай ойға салу жоқ).
і40-тың Avensis-тен басым тұстары да бар. «Корейлік» көліктің динамикасы мықты, 149 күшке ие мотор мен 6 сатылы автомат керемет жұмыс істейді. Жапондық мотордың «Қуаттылығы» бағанында да 150 деген сан жазылған, алайда вариатор бұл жылқыларға көсіле шабуға мүмкіндік бермейтіндей сезіледі. Жылдамдықты күрт арттыру қажет болған жағдайларда, Avensis өзінің ұзақ ойланатындығын танытады. Оның үстіне, корейлік универсал сыртынан әлдеқайда келісті әрі қызықтау болып көрінеді.
Осы сырттай салыстырудың нәтижесінде Toyota Avensis жағында үздік жайлылық, ыңғайлы жүксалғыш, әрі марканың біздің еліміздегі танымалдығының арқасында, қалдық құнының үлкендігі аталады. Hyundai i40 динамикасы мен мәнерлі сыртқы пішіні арқылы басымдылыққа ие болады. Бірақ отбасылық универсал рөліне Avensis сай келетін секілді, сондықтан, бұл жағдайда менің таңдауым Toyota-ға түсер еді.
Ұнағаны:
- жайлы аспа
Аспасы тек ірі кедергілерден ғана тайсақтап, кедір-бұдыр жерлердің көбін жақсы еңсереді. - үлкен әрі ыңғайлы жүксалғыш
Жүкті бекітуге арналған табандар жүйесі, бүйірлерінде қуыстар, сыйымды еден асты мен толық өлшемді қосалқы дөңгелегі бар. - сапалы әрі ыңғайлы салон
Автокөлікте еуропаша салыстыра тексерілген эргономика мен жағымды әрлеу материалдары бар.
Ұнамағаны:
- нашар шолу мүмкіндігі
Кішкентай сыртқы айналар, артқы есіктің тар ойығы, әрі артқы көрініске арналған камерадан да пайда жоқ. - әлсіз динамика
Өсімдіктерді саяжайға аяңдап алып бару үшін автомобиль мінсіз болады, ал екпінді маневр жасау туралы ұмытқан жөн. - зеріктіретін пішін
2011 жылғы рестайлинг автомобильге жылтырлық берсе де, ештеңені түбегейлі өзгерткен жоқ. Көлік сол шабадан күйінде қалып қойды.
Тарих кезеңдері
Avensis-тің үшінші буыны 16 жылдық тарихында өзінің басты қағидасын өзгерткен жоқ, алдыңғы екі буыны сынды, ол да Еуропаға бағытталған, және Англияда шығарылады. Алғашқы Avensis (Т22) 1997 жылы пайда болып, тіпті біздің елде де танымал Carina E (айтпақшы, жақсы көлік еді) үлгісін алмастырды. Сөз реті келгенде айта кетсек, осы «Каринаның» шығарылымы 94 жылдан-ақ Toyota Burnaston қуаттылығында Британияда ұйымдастырылған. Сол себепті «Авенсистің» дәл осы зауытта жарық көруі — бұл жәй ғана өндірісті Жапониядан ауыстыру емес. Оның үстіне, Т22-ні дайындауға еуропалық инженерлер мен дизайнерлер қатысқан. Бұл автокөлік өз отанында да шығарылған, бірақ Caldina деп аталатын универсал шанағында. «Жапондықтың» көзге түсер артықшылықтарының бірі толық жетекті модификациясы мен GT-T 260 күшке ие 3S-GTE турбоқозғалтқышты нұсқасының болуында еді.
Алғашқы Avensis конвейерде үш түрлі шанақта алты жыл өмір сүріп, тек Еуропалықтардың ғана емес, ТМД елдерінің де көңілінен шықты. Бүгінде бұл көліктерді (оның ішінде рөлі оң жақтағы «калдиналарды» да) біздің көшелерден де кездестіруге болады. Кезінде еуропалық мемлекеттер мен Жапониядан ұсталған көліктерді көптеп жеткізген болатын.
Т25 индексіндегі екінші буын Францияның оңтүстігіндегі тойоталық ЕD2 бөлімінің жобасы болды. Ол 2003 жарыққа шыққан болатын. Ал толыққанды жапондық Caldina, 2002 жылы шыққан, және ол мүлде өзге дизайнға ие болып, дербес үлгі сынды көрінетін еді. Жапонияда Avensis T25 еуропадағы сияқты сатылды, алайда тек бір — седан шанағына ие болатын. «Авенсис ІІ-нің» шанақтар гаммасы үш түрлі болды: аталған седан, лифтбек және универсал. Бұл автокөлік , айтпақшы, Қазақстанда да ресми сатылған, бірақ 2007 жылдан бастап (рестайлингте). 2008 жылдың соңына қарай Т25-ті үшінші буын алмастырды.
2001 және 2009 жылдар аралығында Еуропаны қосқанда, кейбір нарықтарда жеті орындық Avensis Verso нұсқасының болғандығын айта кеткен жөн. Әдеттегі «Авенсиспен» бұл үлгіні бір платформа біріктіреді, бірақ жалпы, шанағы мен интерьері әртүрлі, ал автокөлік компактвэндер классына жатады.
Avensis-тің (Т27) қазіргі генерациясы да еуропалық бөлімшеде жасалды. Оның негізінде, бұрынғыдай, Toyota-ның өзге үлгілерінен ерек кейіп, жабдықталу және кішігірім көлемдегі моторлар тұр, бірақ шанақтар гаммасы екі типке дейін азайған: седан мен универсал. Avensis, әсіресе алғашқы буынымен салыстырғанда байсалдырақ бола түскен. 2011 жылы буын сыртқы пішінен көбірек көзге түсетін рестайлингті бастан өткерді. Жаңартылған «Авенсистің» Қазақстандағы таныстырылымы 2012 жылдың ақпан айында Алматы қаласында өтті.
Класстастары
Toyota Avensis нарықта қолжетімділерінен премиумдық көліктеріне дейінгі өкілдері бар D классына жатады. Көбінің модельдік қатарында универсалдар бар, бірақ барлығы біздің нарыққа тапсырыспен де жеткізіле бермейді. Жоқ дегенімен, сатылымда да, біздің көшелерде де көрініп қалатын үлгілерді қарастырып көрейік.
Бағалары АҚШ доллары мен еурода материал жарияланған күнгі (31.10.2013 ж.) бағам бойынша көрсетілген
Жиынтықтама
Avensis, екінші буынынан бастап, тіпті ең қарапайым жинағының өзінде, Toyota-ның басқа үлгілерінен бай жабдықталуымен ерекшеленетін. Алдыңғы қатарда қауіпсіздік жүйесімен әсем жабдықтау — базасында дәл топтық нұсқасындағыдай жиынтық. Орындықтар мен алдыңғы әйнек тазартқыштардың жылытқышы, сыртқы айналар жылытқышы, автоматты режимі бар электрлі әйнек көтергіштер, электр жетекті қол тежегіш, салқындатқыш — осының барлығын бағасы $28 000 (расында, тек 1.8 литрлік моторы, механикалық БҚ мен R16 темір дискілері бар седан шанағында) болатын көліктен табуға болады. Қымбат нұсқасы премиумді функциялармен жасақталған: артқы орындықтарды (екеуін де) және рөлді сервожетектер арқылы реттеу, көлікті кілтсіз ашу, бөлінген климат-бақылау, жарық пен жауын құрылғылары, круиз-бақылау, былғары салон, орталық консольдегі Toyota Touch жүйесінің үлкен дисплейімен және артқы көрініске арналған камерамен (универсал үшін аса қажет) жабдықталған. Топтық нұсқада тез балқымалы 17-дюймдік дискілер, бамперлерінде тұманға қарсы жарық шамдар бар, айналары батырма көмегімен бүктеледі.
Ал енді барлық нұсқалардың түстері бірдей — галогенді, бұл бізді біраз таң қалдырды. Есесіне, толық өлшемді қосалқы дөңгелек кез келген жиынтықтамаға тиісті, «Престижде» ол барлық негізгі дөңгелектер секілді тез балқымалы дискіде.
Мен $34 300 (егер сөз седан туралы болса) тұратын «Сол» нұсқасын таңдар едім. Өйткені, қажетті функционалы бар, орындықтардағы былғары орнына қолданылатын материал маған бәрібір ұнамайды, одан да сапалы мата болғаны жақсы. R16 дискілері — бұл шынымен де кемшілік, «Авенсис» үшін олар кішілеу, бірақ оларды қысқа қалдырып, жазда үлкен диаметрлі дискілерді алуға болады. Кілтсіз ашу мен рөлдік колонканың электр жетегі сынды майда-шүйде әшекейлер енді болмайды. Бірақ $4 700 айырмашылық аясында, бұл бір қайғы деп ойламаймын.
Моторлар гаммасы
Қазақстанға Avensis салыстырмалы түрде жаңа газ үйлестіруші Valvematic жүйесімен жасақталған тек 1.8 және 2 л болатын төрт цилиндрлі екі бензинді мотормен жеткізіледі. Алғашқысы төлқұжат бойынша 147, ал екіншісі 152 «арғымаққа» ие. Айналу сәтіндегі айырмашылық едәуір:180 196 Нм-ге қарсы. 1.8 литрлік мотор тек 6 сатылы механикалық беріліс қорабымен, ал 2 литрлік мотор — жеті виртуалды берілісі бар сына белдікті Multidrive S вариаторымен жеткізіледі. Сөз реті келгенде айта кететін жәйт, универсал біздің елге тек 2 литрлік қозғалтқышпен жеткізіледі.
Еуропа нарықтарында капот астынан көлемі 1.6 литр (132 а.к.) болатын тағы бір бензинді және үш дизельді: 2 литрлік (124 а.к.) және көлемі 2.2. литр, бірақ қуаттылығы әртүрлі екі нұсқасын кездестіруге болады. Сонымен қатар, Еуропада мотордың трансмиссиямен түйісу түрлері шамалы өзгешелеу, механика мен вариатордан бөлек, 6 сатылы автомат та бар, бірақ ол тек ең күшті дизельдік нұсқаға орнатылады.
Автокөлік шассиі
Avensis бастапқыда еуропалық нарыққа арналып жасалғандықтан, ол жақтың инженерлері шассиді де өз стандарттарына сай баптаған. Автокөліктер барлық дөңгелектердің серіппелі тәуелсіз жетектерімен жүрген, ал екінші буынның артқы жетегі тізгіндеу функциясына да ие еді. Қазіргі үлгінің де арт жағында көп иінтіректі аспа бар, тек сиқырлы тізгіндегіш тартусыз, ал алдыңғы жағында McPherson тіреуі бар. Тежегіштерінің барлығы дискілік, алдыңғылары желдетіледі. Рөл күшейткіші электрлік болып табылады.
Қауіпсіздік жайлы
Avensis-тің үшінші буынын 2009 жылы EuroNCAP комитетінің қабырғасында сынақтан өткізген. Сынақтардың барлығынан кейін автомобиль ең жоғарғы бес жұлдызды рейтингке лайық деп танылды. Бетпе-бет және бүйірлік соққылар жасалғанда қорғау жүйелері жолаушылар үшін ең жоғарғы қауіпсіздікті көрсетті. Баллдар тек бүйірінен бағанаға соғылғанда азайтылды — сарапшылар көкірек қуысына зақым келу мүмкіндігінің жоғарылығын анықтады.
Базалық «Терра» жиынтығында Avensis-тің жүргізушінің тізе тұсындағысын қосқанда, қауіпсіздік жастықтарының болуы мүмкін ең көп мөлшерімен жабдықталғандығын айта кеткен жөн. Есепсіз көмек көрсету жүйелері (АБС, EBD тежегіштік күштерді үлестіру жүйесі, Brake Assist жедел тежелуді күшейту жүйесі, VSC+ курстық тұрақтылық жүйесі, TRC тайғанауға қарсы жүйесі) де барлық нұсқалардағы тізімге қосылған. Оған қоса, Avensis алдыңғы орындықтардағы бас сүйегіштермен және балаларға арналған орындықтарды бекітудің екі жүйесімен (ISOFIX және зәкір типті Top Tether) жабдықталған.
Еуропа нарықтарында қауіпсіздік құралдарының тізімі анағұрлым кең. Оның қатарында жүргізуші байқамай қалған кедергінің алдында автомобильді өздігінен баяулататын Pre-Crash Safety жүйесі де бар.
Техникалық сипаттамасы
| Автомобиль | |
| Маркасы, үлгісі | Toyota Avensis |
| Нұсқасы | Wagon 2.0 CVT «Престиж» |
| Құрастырым | Англия |
| Шығарылған жылы | 2013 |
| Шанағы | тасымалдаушы |
| Типі | универсал |
| Есіктер саны | 5 |
| Орын саны | 5 |
| Қозғалтқыш | |
| Үлгісі | 3ZR-FAE |
| Типі | бензинді қатарлы |
| Орналасуы | алдында көлденең |
| Қуаттану жүйесі | үлестірілген бүрку жүйесі |
| Цилиндрлер/клапандар саны | 4/16 |
| Жұмыс көлемі, см текше | 1 987 |
| Ең жоғарғы қуаттылығы, а.к. (кВт)/айн/мин | 152 (112)/6 200 |
| Ең жоғарғы айналу сәті, Нм/айн/мин | 196/4 000 |
| Экологиялық классы | Евро-4 |
| Динамикалық сипаттамасы | |
| Ең жоғарғы жылдамдық, км/сағ | 205 |
| Екпін алу уақыты 100 км/сағ. дейін, с | 10 |
| Трансмиссия | |
| Жетек | алдыңғы дөңгелектеріне |
| Беріліс қорабы | сатысыз вариатор |
| Аспа | |
| Алдыңғы | тәуелсіз серіппелі McPherson |
| Артқы | тәуелсіз серіппелі көп иінтіректі |
| Тежегіштері | |
| Алдыңғы | дискілік желдетілетін |
| Артқы | дискілік |
| Өлшемдері мен салмағы | |
| Клиренс, мм | 140 |
| Ұзындығы/ені/биіктігі, мм | 4 780/1 810/1 480 |
| Дөңгелектік база, мм | 2 700 |
| Шина өлшемдері | 215/55 R17 |
| Жарақталған массасы, кг | 1 560 |
| Толық массасы, кг | 2 050 |
| Жүксалғыштың көлемі, л (мин./макс.) | 509/1 609 |
| Жанармай шығыны | |
| Қалада, л/100 км | 9.2 |
| Қала сыртында, л/100 км | 5.8 |
| Аралас цикл, л/100 км | 7.0 |
| Жанармай багының көлемі, л | 60 |