Бұған дейін ҚР ИИДМ жаңа ақылы жол бөліктері биыл сәуірдің аяғында іске қосылатынын хабарлаған. Бірақ төлем қабылдау белгіленген мерзімде жүзеге асқан жоқ. Мамырда министрліктің баспасөз қызметі тариф әлі нақтыланбағандықтан, жаңа ақылы жолдарда ақша жинау маусымға шегерілгенін мәлімдеді.
Өткен сенбіге жоспарланған жиналыста шенділер төлем мөлшерлемесін бекітіп, ақылы жолдар іске қосылатын нақты күнді белгілеуі керек еді. Ол жиналыстың өткен-өтпегені белгісіз. Бірақ жексенбіде жүздеген жүк көлігін жүргізушілер әр аймақта наразылық шеруіне шықты. Олар Ақтөбе, Орал, Шымкент, Талдықорған, Павлодар және елордада жол сапасының нашарлығы, жолда қызмет көрсетудің жоқтығына наразылық білдірді.
«ҚазАвтоЖол» ҰК" АҚ баспасөз қызметі хабарлағандай, ҚР индустрия және инфрақұрылымдық даму вице-министрі Берік Қамалиев, Ұлттық компанияның басқарма төрағасы Асқар Мұратұлы мен «Атамекен» ҰКП, Kazlogistics Көлік қызметкерлері одағының өкілдері Нұр-Сұлтанда наразылық білдірушілермен кездесті.
Нәтижесінде мынадай шешім қабылданды: бір аптада қоғамдық қауымдастықтар жол қозғалысының барлық мүдделі қатысушыларынан ұсыныс жинайды. Содан кейін ғана жолды ақылы ету жөніндегі бұйрықтың жобасы қаралып, төлем мөлшері мен ақылы жүйені енгізу мерзімі анықталады.
Комментариев: 0