Жүргізуші куәлігін жақында алғандар үшін полис арзандайды

Биыл 7 сәуірден бастап жаңа сақтандыру класы күшіне енді. Жаңа жүргізушілер мен жүргізуші куәлігін алғаш алған мопед иелері үшін полис бағасы бірнеше есе өсті. Мысалы, Астанада ол 56-112 мың теңге аралығында. Сақтандыру реформасы мопедшілерге ауыр соққы болды, өйткені кейбірінің әбден тозған техникасы полистен арзан.

Мәжілісмендер Қаржы нарығын реттеу және дамыту агенттігінен сақтандыру нормативтерін қайта қарауды сұрады. Қаржы нарығын реттеушілер жаңа жүргізуші үшін қолданылатын коэффициентті 40 % азайтуға уәде берді.

Ведомство «бонус-малус» жүйесі бойынша Коэффициент есептеу және қолдану ережесіне түзету енгізуді көздейтін қаулы жобасын әзірледі. Құжатқа сәйкес сақтандыру кластарының жаңа кестесі мынадай болады:

Жобаға сәйкес кестеде А класы енді жоқ және міндетті сақтандыру келісімшартын алғаш жасаған сақтанушыға (сақтандырылушыға) 20 % жоғары коэффициент қолданылып, 3-класс беріледі. Мопед не мотоциклге енді мінген жүргізуші де үшінші класс алады, бірақ коэффициент жоғары болмайды.

Жаңадан рөлге отырған жүргізушілер үшін полис құнын есептеген кезде 1.2 коэффициент қолданылса, мототехника иелерінің полисі 1 коэффициентпен есептеледі. Қазір екі топқа да А класы мен 1.8 коэффициент берілетінін ескерсек, 30 % және 45 % жеңілдік жасалады.

Қаулы жобасында жаңа сақтандыру кластары 2025 жылдың 1 желтоқсанынан бастап күшіне енетіні жазылған.