Жаңа куәлік алған жүргізушілер мен мопедшілерге арналған сақтандыру полисі қашан арзандайды

Қазақстанда жаңа сақтандыру класы биыл 7 сәуірде күшіне енген. Нәтижесінде жаңа куәлік алған жүргізушілер мен мопедшілер алатын полистің құны біршама өсті: Алматыда — 40 мыңнан 78 мың теңгеге, Астанада — 56 мыңнан 112 мыңға. Тіпті жаңа сақтандыру сомасы кейбір ескі мопед құнынан жоғары болып кетті. Автомобилистер полис сомасы неге мұнша жоғары болатынын түсінбей жүр.

Депутаттар осы мәселені шешуді сұрап сауал жолдаған, соған жауап ретінде үкімет жаңадан көлік жүргізе бастағандарға қазір қолданылып жүрген коэффициентті 40 % төмендетуге уәде берді.

«Алматыда жас жеңіл автомобиль жүргізушісі рәсәмдейтін сақтандыру құны 46 мың теңгеден аспайды (жаңа класс күшіне енгенге дейін 40 мың теңге болған), ал Астанада 65 мың теңге болады (бұрын 56 мың теңге еді). Мопед пен скутер жүргізушілеріне сақтандыруды қолжетімді ету мақсатында „бонус-малус“ жүйесіне мототранспортқа арналған бөлек категория қосылады. Ол төмен коэффициентпен есептеледі», — деді премьер-министр Олжас Бектенов.

Қаржы нарығын реттеу және дамыту агенттігі Kolesa.kz редакциясына алғаш рет сақтандыру келісімшартын жасайтын жүргізушіге арналған полис құнын төмендететін қосымша өзгеріс әзірленіп жатқанын хабарлады. Жауапты орган құжаттың соңғы нұсқасын биыл жаз аяғына дейін қоғам талқысына шығаруға уәде берді. Демек жаңа куәлік алған жүргізушілер мен мопедшілер үшін сақтандыру сомасы биыл күзде төмендеуі мүмкін. Жаңа ереже ең кешіккенде 2026 жылғы 1 қаңтарда күшіне енеді.