Жүк көлігі мен автобус үшін жол ақысы қымбатырақ болады

ҚР ИИДМ Автомобиль жолдары комитетінің бұйрығына сай, екінші және үшінші санаттағы төмендегі жол бөліктері ақылы режимге көшеді:

• Атырау — Бейнеу — Өзбекстан шекарасы (Нүкіске дейін);
• Атбасар — Қостанай;
• Орал — Ресей шекарасы (Самараға дейін);
• Ақтөбе — Ресей шекарасы (Оренборға дейін);
• Жетібай — Шетпе — Бейнеу;
• Көкшетау — Петропавл;
• Қызылорда — Арал;
• Нұр-Сұлтан — Атбасар;
• Павлодар — Ресей шекарасы (Омбыға дейін);
• Павлодар — Семей;
• Семей — Қалбатау;
• Орал — Ресей шекарасы (Саратовқа дейін);
• Ақтөбе — Орал.

Жалпы 3.5 мың шақырым, оның 2.5 мыңы екінші санат, қалғаны үшінші санаттағы жолдар.

Жолға шлагбаум қойылмайды, төлем қашықтан жасалады. Жол ақысының мөлшері қазірше белгісіз, бірақ қолда бар ақпарат бойынша, өзге ақылы жолдардан қымбат болмайды.

Мысалы, Ақтөбеден Оралға дейінгі екінші санаттағы тас жолда (449 шақырым) жүру құны:

• орын саны 16-дан аспайтын автобус пен 2.5 тоннаға дейін жүк көтеретін жүк көліктері 900 теңге;
• орын саны 32-ден аспайтын автобус және 5.5 тоннаға дейін жүк көтеретін жүк көліктері 1970 теңге;
• орын саны 32-ден көп автобус пен 10 тоннаға дейін жүк көтеретін жүк көліктері 2880 теңге;
• 10-нан 15 тоннаға дейін жүк көтеретін жүк көліктері 3770 теңге;
• тіркемесі бар техникаларды қоса алғанда, 15 тоннадан артық жүк көтеретін жүк көліктері, ершікті тартқыштар 4850 теңге.

Жаңа ақылы жолдар қашан іске қосылатыны хабарланған жоқ. 2022 жылы қаңтар-ақпан айларында ашылуы мүмкін.

23 қарашада Қазақстанда 7 ақылы жол іске қосылды. Биыл мамырда жүк көлігін жүргізушілер бұған қарсы шықты. Жүргізушілер алдымен жол сапасын жақсартып, инфрақұрылымды дамытуды, содан кейін ғана жолға ақша жинауды талап етті. Нәтижесінде төлем қабылдау мерзімі кейінге шегерілді, ҚР ИИДМ жолдарды ретке келтіруге уәде берді.

Жоғарыда аталған бағыттағы жолдар шынымен жөнделді ме?