Жол апаты туралы материалды сотқа жасанды интеллект жібереді

Пилоттық жоба бір ай бұрын іске қосылды, содан бері ЖИ сотқа 7.5 мыңнан аса материал жіберді. Хабар. kz хабарлағандай, «робот» қазірше Әкімшілік кодекстің 610-бабы, 1-бөлігі (көлік құралының зақымдануына себеп болған жол апаты) бойынша материалдармен жұмыс істеп жатыр. Егер жол апатынан зардап шеккендер болмаса және екі тарап оқиға мән-жайымен келіссе, жасанды интеллект хаттама жасаған полицейдің планшетіндегі деректі әкімшілік сотқа жібереді. Ал судья ақпаратты тексеріп, жаза тағайындайды.

Жоғарғы сот істі жасанды интеллект көмегімен қарау процедураны бұрынғы үш күннен он минутқа дейін қысқартатынын айтты. Ал сот актісі он күннен кейін емес, бірден күшіне енеді.

Сот жүйесі ЖИ көмегімен ай сайын 1.5 мыңнан аса, республика деңгейіне шыққан соң жылына 100 мыңнан аса іс (жалпы сот ісінің үштен бірі) қарауды жоспарлап отыр. Қазір Жоғарғы сот қандай істі жасанды интеллектіге сеніп тапсыруға болатынын талқылап жатыр.