2024 жылы Алматыда 7 000-ға жуық жол апаты болған

Полиция департаменті таратқан ақпарат бойынша былтыр мегаполисте 6785 жол апаты болыпты, ал 2023 жылы 3823 жол-көлік оқиғасы тіркелген. Салдарынан 105 адам қаза тапты, 7370 кісі жарақат алды.

Polisia.kz мәліметінше қайғылы оқиғаның көбеюіне трафиктің артуы әсер еткен, қала көшелерінде көлік саны 1.5 млн-ға жетті, мопед пен электросамокат та қаптап жүр.

Қолда бар мәліметке сүйенсек, тіркелген 6785 апаттың 1221-і скутер және электр жетекті самокатпен байланысты екен. Мұндай оқиға 17 адамның өмірін қиды, 583 азамат зардап шекті.

Тәртіп сақшылары 84 мың мопедші мен самокатшыны әкімшілік жауапқа тартып, 1.7 мың скутерді айыптұраққа қойған. Жалпы былтыр алып шаһарда 4.2 млн жол ережесін бұзу сәті тіркеліпті, 2.5 мың жүргізуші мас күйінде көлік тізгіндеген.