Жеңілдікті автонесиеге ескі бағдарлама бойынша өтініш беруге бола ма?

Шенділер жаңарған жеңілдікті автонесиеге биыл ақпанда онлайн өтінім қабылдады. Бірақ өтініш қабылдау 18 секундта аяқтап, бағдарлама шартын қайта қарауға тура келді. Кезекті пайызы төмен несие биыл жаз аяғында берілуі мүмкін. Жаңарған бағдарлама бойынша жеңілдікті несиені халықтың кей санаты ғана ала алады. Шенділер бағдарламаға осындай өзгеріс енгізуге ниетті.

Мұндай жағдайда жеңілдікпен машина алғысы келген өзге тұрғындар не істейді? Kolesa.kz редакциясына Қазақстан даму банкі ескі бағдарлама әлі жұмыс істеп тұрғанын хабарлады. Қарыз алған азаматтар қайтарған қаражатты пайдаланып, ай сайын несие беріліп жатыр. Бірінші мамырға дейін тұрғындар 33 506 автонесие алды. ҚДБ қызметкерлері 2023 жылғы алғашқы төрт айда несие алған азаматтар орта есеппен ай сайын 2.5 млрд теңге қайтарғанын хабарлады. Бұл ақшаға ай сайын 237 пайызы төмен автонесие беріледі.

Ескі бағдарлама бойынша қалай өтінім беруге болады

Ол үшін бағдарламаға қатысып жатқан екінші деңгейлі банктерге («Еуразиялық банк», «Халық банкі», «Банк ЦентрКредит», ForteBank) өтініш беру керек. Бағдарлама шарттары әлі өзгерген жоқ:

• Автомобиль құны — 15 млн теңгеден аспайды.
• Несие мерзімі — 7 жылға дейін.
• Несие валютасы — теңге.
• Номиналды сыйақы мөлшерлемесі — 4 %-дан аспайды (көлік құралын сақтандыру және тіркеу шығындарын ескере отырып жылдық тиімді мөлшерлеме 7.5 %-дан аспауы керек).
• Бастапқы төлемді бағдарламаға қатысатын банктер белгілейді.

Бағдарламаға қатысу алгоритмі мынадай:

1. Өтініш беруші автосалонда Қазақстанда жасалған, құны 15 млн теңгеден аспайтын машина таңдайды. Алуға болатын автомобиль маркасы мен моделін ҚДБ сайтынан көруге болады. Содан кейін автосалоннан төлем шотын алу қажет.
2. Жеңілдікті автонесие алуға банкке өтініш беріп, мақұлдауын күтеді.
3. Кепілхат алады (өтініш мақұлданса береді).
4. Автосалонда машинаны сатып алу шартын жасап, көлікті өз атына тіркейді. Сақтандыру құжатын дайындайды. Содан кейін банк өтінімді қаржыландырады.
5. Автомобиль алады.

26.05.2023 ж. 18:20-да қосылған мәлімет:

Банктердің call-орталығындағы мамандар ескі бағдарлама тоқтады деп жауап беріп жатыр деген ақпарат шықты. Kolesa.kz-тің осыған қатысты сұрағына ҚДБ мәселе call-орталықтардың дұрыс жұмыс істемеуінде деп жауап берді.

«Жұрт алған қарызын ай сайын төлеп отыр, банктер оны шотта сақтап, жеткілікті қаражат жиналғанда қайта береді. Ал кезекті қалай құратынын және кімге несие рәсімдейтінін әр банк өзі шешеді екен.

«Біз бағдарлама операторы ретінде тек қаражаттың мақсатты жұмсалуын қадағалаймыз», — деді Қазақстан даму банкінің өкілдері. Дегенмен олар қаржы ұйымдарына түсіндіру жұмыстарын жүргізуге және бұл жағдайға не себеп болғанын анықтап, дүйсенбі күні хабарлауға уәде берді. Біздің редакция мұны өз бақылауында ұстайды және мәлімет жеткен бойда хабар береді.