Жеке тұлға 1 желтоқсаннан бастап лизингіге көлік ала алады

Respublica партиясынан сайланған мәжіліс депутаты Олжас Құсбеков түзету жобасы «Ашық НҚА» порталында 2 қарашаға дейін талқыланып, 1 желтоқсанда күшіне енеді деді.

«Автомобиль алу оңай емес екенін Қазақстан тұрғындары жақсы біледі. Қымбат несие алуға немесе бастапқы жарнаны жинауға екінің бірі дайын емес. Бұл мәселені алғаш рет екі жыл бұрын көтергенбіз, бүгін ол іске асып отыр. Бұл — автомобиль алу процесін жеңілдететін маңызды қадам. Біздің мақсат — лизинг автонесиеге айналып кетпей, шынымен адамдар үшін ыңғайлы, икемді әрі тиімді құралға айналуын қадағалау», — деді халық қалаулысы.

Айта кетейік, түзету жобасына сәйкес лизинг мерзімі автомобильдің қызмет ету мерзімінің 75 %-ынан кем болмауға тиіс (көліктің қызмет ету мерзімін лизинг беруші анықтайды. Халықаралық тәжірибе бойынша 5–6 жыл болады). Жылдық сыйақы мен айыпақы мөлшері көлік құнының 46 %-ынан аспауы керек. Төлемді екі есептік кезеңнен артық кешіктіру көлікті қайтарып алуға және келісімшартты біржақты бұзуға негіз болады. Лизинг алушы төлемді кешіктірсе, күн сайын өсімпұл төлейді.

Қазірше екінші деңгейлі банктердің сайтында жеке тұлғаға арналған лизинг бағдарламасына қатысты ресми ақпарат шыққан жоқ. Қазір олар компанияларға коммерциялық техника ғана ұсынады. Бұл бағдарлама туралы тұрақты жазып отырамыз.