Қазақстанда жеке тұлғаға автомобильді лизингке беру бағдарламасы пилоттық режимде 2025 жылы 1 желтоқсанда іске қосылған. Бірақ халық оған аса қызыға қойған жоқ. Өйткені машинаны меншігіңізге ала алмайтыныңыз болмаса, лизингтің автонесиеден еш айырмасы болмады. Соның салдарынан елде небәрі бірнеше автомобиль ғана лизингке берілді, оның өзі жаңа қаржылық қызметтің қалай жұмыс істейтінін көрсету мақсатында бағдарламаның бастапқы кезеңінде рәсімделген.
Енді жеке тұлғаларға арналған автолизинг бағдарламасын жандандыру үшін заңнамаға өзгеріс еніп отыр. Биыл 24 маусымда президент «Машина жасау және транспорт саласын дамыту мәселелері бойынша Қазақстан Республикасының кейбір заңнамалық актілеріне өзгеріс пен толықтыру енгізу туралы» заңға қол қойды. Құжат шеңберінде «Қаржы лизингі туралы» заңға да өзгеріс енді.
Заңда енді «жеке тұлғамен жасалатын лизинг шартының объектісі тек M1 және N1 санатындағы көлік құралы (жеңіл автомобиль мен шағын жүк көлігі), …сондай-ақ бұрын жасалған лизинг шарты бойынша лизингке алған көліктер болатыны» жазылған. Бұған дейін құжатта мұндай норма болмаған.
Заңда жеке тұлғаға арналған лизинг шарты бөлек жазылған:
- лизингке алған затты меншікке беру және (немесе) оны белгіленген бағамен сатып алу құқығы лизинг шартында жазылуға тиіс;
- лизинг мерзімі 84 айдан аспауы қажет;
- айыппұл мен (немесе) өсімпұлдың мөлшері мерзімі өткен берешек сомасының
10 %-нан аспауы керек.
Лизинг шарты бойынша жылдық тиімді сыйақы мөлшерлемесі мен осы тізімде көрсетілмеген өзге де төлемдердің мөлшері өнеркәсіпті мемлекеттік ынталандыру жөніндегі уәкілетті органның (Өнеркәсіп және құрылыс министрлігі — Kolesa.kz ескертпесі) нормативтік-құқықтық актісіне сай белгіленеді.
Бұған дейін бұл талап лизинг беруші мен алушы арасындағы келісімшартта ғана жазылған, кәсіпкерлер оны өз қалауынша өзгерте алатын.
Лизинг берушілерге бөлек талаптар бар:
- заңды тұлғаның жарғылық және (немесе) меншікті капиталы кемінде 100 млн теңге болуға тиіс;
- компания басшысы сотты болмауы, банкрот деп танылмауы және Қазақстан заңнамасына сәйкес басшы қызметін атқару құқығынан айырылмауы қажет.
Заңға енген өзгеріс ресми жарияланған күннен бастап 60 күнтізбелік күннен кейін — биыл жаз аяғында күшіне енеді. Демек жеке тұлғаға арналған автолизингті жаңарту жұмысы басталды. Енді Өнеркәсіп министрлігінің тиісті актілерді әзірлегенін күтеміз. Содан кейін ғана лизинг бағдарламасы бұл жолы сұранысқа ие бола ма, әлде тағы қағаз жүзінде қала ма, белгілі болады.
Комментариев: 0