Елдегі бензин сапасы нашарлап кетті

Жүргізушілер бір-екі апта бұрын АИ-95 пен АИ-98-дің сапасына шағымдана бастаған.

«”Гелиостан” (Абылай хан) бензин құйып едім, w222 s63, 5 бүріккіш ауыстырдым», «Qazaq oil мен “Гелиостан” алсам, екі рет машинам бұзылып қалды. Алғашында моторын ауыстырдым, екінші рет бүріккішін, шамдарын жаңалап, бензинді төгіп тастадық», «Алматыданмын, қазір ғана көлігімді (Volkswagen Tiguan) ТЖО-дан алып кеттім. Сервисте бензин жаман, бұл осы аптадағы төртінші жағдай деді», — деп жазды көлік иелері.

Сауда министрлігі 2026 жылы тексеру үшін бекеттен сатып алған әр он бірінші бензиннің октан саны сәйкес келмеген. Мәселенің мән-жайын анықтау үшін Энергетика министрлігі Павлодардағы мұнай өңдейтін зауытты тексеріп жатыр деп мәлімдеді.

«Расымен қазір әлеуметтік желіде осы мәселе сөз болып жатыр. Кеше орынбасарым, вице-министр Техникалық реттеу және метрология комитетінің төрағасымен бірге Павлодар қаласына кетті. Олар зауытта отын сапасы бұзылды ма, жоқ па, анықтайды. Жанармай бекеттері мұнай өңдейтін зауытқа сілтесе, кәсіпорын бекеттерден көріп отыр. Мотор отынын әзірлеу барысында бір кемшілік кеткен деп ойлаймын. Жуырда бәрін анықтап, нүктесін қоямыз», — деді бүгін ҚР энергетика министрі Ерлан Ақкенженов

Шендінің сөзінше сапалы бензиннің жаңа партиясы 10–12 күннен соң Атыраудағы зауыттан аттанады.

Біраз уақыт бұрын Павлодардағы кәсіпорын биыл емес, келер жылы жоспарға сай жөнделетіні белгілі болды.

26.08.2026 ж. 14:30-да қосылған ақпарат:

Бүгін, 26 тамыз күні Павлодар мұнай-химия зауытының баспасөз қызметі кәсіпорын арбитраж сынамалардың тексеру нәтижесін алғанын хабарлады. Талдауды 115 елде қызмет ететін SGS Kazakhstan (Штаб-пәтері Женевада орналасқан SGS-тің үлестес компаниясы) зертханасына жүктепті. Сынақ барысында сынамалардың 32513 ГОСТ стандартына сәйкес келетіні анықталған.

«Демек, Павлодар мұнай-химия зауыты шығарған АИ‑95 пен АИ‑98 Кедендік одақтың КО ТР 013/2011 және ГОСТ 32513‑2013 талаптарына сай келеді. Зауыт тиеп жіберген бензин партиялары өнімнің сапасын растады», — деп мәлімдеді кәсіпорын өкілдері.

Арбитраж сынама деген не?

Тиелетін мұнай өнімінің әр партиясы паспорттау үшін зауыт аумағындағы SGS зертханасында талдау процесінен өтеді, өнімнің сапасына қатысты дау туған жағдайда тексеру үшін сынама 45 тәулік бойы арбитраж қоймада сақталады.