Жаңа Prelude-ке сұраныс артты

Honda қыркүйектің басында Жапонияда жаңа буындағы Prelude-тің саудасын бастады. Компания айына шамамен 300 автомобиль сатуды көздеп, өндіріс жоспарын осы болжамға сай құрған еді. Дегенмен алғашқы апталардың қорытындысы бойынша Honda шамамен сегіз есе қателесті.

300 тапсырыстың орнына қазанның алғашқы аптасында жаңа өнімге 2.4 мың тапсырыс түскен. Prelude Жапонияда кемінде 6 179 800 иен (22 млн теңге) тұрады. Ол Civic платформасына негізделген жергілікті нарықтағы ең қымбат модельге айналды.

Кейбір дилер жаңа купеге тапсырыс қабылдауды уақытша тоқтатуға мәжбүр болды, ал Honda өндіріс көлемін арттыруға уәде берді.

Күтпеген жайттардың бірі — Prelude-ке қызыққандар. Бастапқыда модельдің негізгі аудиториясы жас, ауқатты жүргізушілер болады деп болжанған, іс жүзінде купені 50–60 жастағы адамдар таңдады. Кейбірі Honda-мен алғаш танысса, енді бірі марканың адал жанкүйері. Модельді көбі екінші көлік ретінде алады.

Honda купенің артықшылықтарын тағы бір еске салды. Prelude иелері автомобильдің тартымды әрі спорттық сырт келбетін, жүріс бөлігін баптау мүмкіндігін және кең жүксалғышын жоғары бағалаған.