Жаңа Nissan Leaf-тің дизайны өзгеше болады

Nissan кроссоверге айналған үшінші буындағы Leaf электрокарын таныстыруға дайындалып жатыр. Жаңа өнімге арналған үш мини-фильмнің біріншісі жарық көрді. Одан электрокардың рекордтық деңгейдегі аэродинамикасы мен қызық опциялары туралы білуге болады.

Nissan Leaf-тің футуристік дизайны көліктің эстетикалық көрінісіне ғана емес, сипаттамасына да әсер етті. Сүйір пішіні машинаның аэродинамикасын жақсартқан. Кроссовердің есік тұтқасы шанаққа еніп тұр, ал төменгі бөлігі тегіс болады, сондай-ақ ол алдыңғы жағындағы жалюзи және оңтайлы профилі бар дөңгелек дискісімен ерекшеленеді.

Нәтижесінде Солтүстік Америка нарығына арналған Nissan Leaf-тің аэродинамикалық кедергі коэффициенті — небәрі 0.26, ал Еуропада 0.25 болады. Дөңгелек пен бүйірлік артқы көрініс айнасының дизайны өзгерген. Nissan дизайнерлері электрокардың марка тарихындағы ең сүйір пішінді сериялы модель екенін айтты.

Жаңа машина технологиялық панорамалы шатыр алған. Оның әйнек панелі электрохромды күңгірттеу функциясына ие және күн сәулесін шағылыстыратын инфрақызыл жабыны бар. Соның арқасында күннен қорғайтын перде немесе қалқа қажет болмайды.

«Бізге жаңа Nissan Leaf-тің дәстүрлі мотормен жүретін автомобильге шынайы балама болғаны керек. Ол өте тартымды көрінеді әрі отбасы үшін ыңғайлы», — деді Nissan вице-президенті Ричард Кэндлер.

Машинаның техникалық сипаттамасы туралы толық ақпарат жоқ, бірақ Leaf-тің Nissan Ariya платформасына негізделетіні және жүріс қоры 500 км болатыны белгілі. Модельдің бірінші буыны 2010 жылы жарық көрген, содан бері Nissan әлемде 700 мыңға жуық Leaf сатты. Компания электрокар иелері жалпы 28 млрд шақырым жүріп өткенін есептеді.