Алуан түрлі функциясы бар мерседестік флагманның жаз бойы бөлшектеп көрсетілген таныстырылымы аяғына жетіп, суреттері жарияланды. Ірі седанның ісінген пішіні мен шамының нобайы елдің бәріне ұнай қоймас. Бірақ Бруно Сакконың қолынан шыққан W220-ның кескінін еске салады.
Таңдалған бағыттың дұрыстығы сатылымның жылдан жылға артуынан көрінеді. S-класс үздік сегменттегі ең көп сатылатын модель десе болады. W221-дің 516 мыңы сатылса, W222-нің сұранысы одан жоғары болатыны анық.
Зиндельфингендегі жоғары технологиялы кәсіпорында шығарылатын көлік E-Active Body Control шассиін иеленеді. Екі бензинді және үш дизельді агрегат 286-435 ат күшін береді және тоғыз сатылы 9G-Tronic автоматымен жұмыс істейді. Кейінірек 8 цилиндрлі қозғалтқыш, ал 2021 жылы қосылмалы гибрид пайда болады.
Адам саны көбейіп, жайлылықты қалайтындар саны артып келеді, оған қоса S-класстың да көлемі ұлғаюда. Жаңа темір тұлпардың ұзындығы алдыңғысынан 54 мм-ге, ал ені 55 мм-ге артық, нақты көлемі 5179×1954×1503 мм. Ұзындау нұсқасының дөңгелек базасы 51 мм-ге артқан.
Машина салонына ақпаратты үшөлшемді деңгейде көрсететін 12.3 дюймдік цифрлы тақта мен екінші буындағы MBUX мультимедиа жүйесінің планшеті орнатылған. Одан бөлек, мұнда проекциялық дисплей, 30 динамигі бар Burmester 4D аудиожүйесі, жылытылатын бас тірегіштер, жарықдиодты шамдар бар.
Функцияларды ишара арқылы басқаруға болады. Нақтырақ айтсақ, төбесін ашу үшін қолды сермесе жеткілікті, ал артқа қарай қозғалғанда электроника жүргізушінің басын бұрғанын байқап, артқы әйнектегі пердені түсіреді. «Эй, Мерседес» деген бас көмекші 27 тілді түсінеді, әр орындықтың астында 9 электрлі мотор (массажға, желдеткішке, бас, шынтақ тірегіштерге, мониторды баптауға арналған) бар. Басқаша айтқанда, ширек ғасыр өткен соң екінші нарықта бұл көлік иесінің бас ауруына айналса, оған қызмет көрсетіндер үшін табыс көзі болады.
Немістер автопилот орнатуға асықпайды. Электроника машинаны тұраққа қашықтан қоюға мүмкіндік береді, дегенмен тізгіншінің қозғалыс үстінде басқа іспен айналысуына (ұйықтауға болмайды) жағдай жасайтын үшінші деңгейлі Drive Pilot тек келесі жылдың екінші жартысында қолжетімді болады.
S-класс өз отанында қыркүйектің ортасына таман пайда болады, ал әлем жұртшылығы оны кейінірек көреді. Өздеріңіз түсінгендей, мүмкіндігі мол көліктің бағасы да арзан емес.
Комментариев: 0