Ресей «Атомды» көптеп құрастыра бастады

«Атом» батареялы хетчбэгі конвейерге тұрды деп жазды РИА Новости. Машинаны «Москвич» зауыты жасап жатыр. Қазір өндіріс көлемі 20 техникамен шектелген, бірақ келер жылы кәдімгідей ұлғаяды, себебі өндіруші 100 мың тапсырыс қабылдап қойған.

Көрші елдегі EV-сала үшін 70 % локализация рекорд саналады. Зауыт электромобильді шанағын бояу, коррозияға қарсы өңдеу, сырлау, құрастыру, механикалық компоненттерін реттеп, электроникасын баптап, толық цикл әдісімен жасайды.

204 ат күшіне ие мотор алғашқы жүздікті 7 секундта алуға мүмкіндік береді. Батареясы толы «Атом» 500 шақырымды еркін еңсереді. Инженерлер толық өлшемді экран орнына алдыңғы әнйекке түсетін проекция мен рөлдегі ықшам тачскрин орнатқан. Кей функцияны дауыспен не смартфонмен басқаруға болады.

Кәсіпорын электромобильге 5 жыл не 150 мың шақырымға дейін (корпоративтік клиенттеріне 3 жыл не 100 мың км), батареясына 8 жыл немесе 160 мың км-ге дейін кепілдік береді. Машинаға ірі желілер мен техникалық орталықтар қызмет көрсетеді, тағы шақырған жерге баратын шеберлер бар.

Зауыт дайын көлікті Мәскеу мен Санкт-Петербургтегі арнайы орындарда бірден тапсырады, басқа өңірлерде серіктестері таратады. Модельді иесіне тікелей жеткізетін сервис те болады. Алғашқы партия сериялық өндіріс ресми басталмай тұрып-ақ тұрғындардың қолына тиген.

Электромобиль мемлекет бөлетін 925 мың рубль субсидияны қоспағанда 3 980 000 рубль (21.1 млн тг) тұрады.