Жаңа Land Cruiser Prado Қазақстанда қанша тұрады

Былтыр тамызда жарық көрген J250 индексті Toyota Land Cruiser Prado Қазақстанға келді. Марка модельдің біздің елдегі тұсаукесері қашан өтетінін хабарлаған жоқ, бірақ комплектациясы мен бағасы белгілі болды.

1 / 10

• 
• 
• 
• 
• 
• 
• 
• 
• 
• 

1 / 10

Қазақстанда Land Cruiser Prado үш түрлі мотормен жүреді. Ең қарапайымы — 163 ат күшіне ие 2.7 литрлік атмосфералы қозғалтқыш. Ол 6 сатылы автоматпен жұмыс істейді. Одан бөлек 8 сатылы автоматпен жұптасатын 2.4 литрлік (278 а.к.) бензинді турбомотор бар. Сондай-ақ топтамада 2.8 литрлік турбодизель болады. Бұл қозғалтқыш біздің елде 204 ат күшін (500 Нм) береді, ол да 8 сатылы автоматпен жұмыс істейді.

LC Prado-ның «Комфорт» деп аталатын базалық комплектациясы 31.5 млн теңге тұрады. Бұл машина 2.7 литрлік мотормен жүреді. Алысқа түсетін шамды автоматты қосу, артқы көрініс камерасы, көрінбейтін аймақты бақылау және жолақта ұстау жүйесін қамтитын стандарт электронды көмекшілер жинағы бар. Сондай-ақ автомобиль екі аймақты климат-бақылау, жүксалғыш қақпағының электр жетегі, жылытуға және желдетуге болатын жүргізуші креслосы, 9 дюймдік экраны мен алты динамигі бар медиажүйе, аспаптар панелінің 7 дюймдік дисплейі, 220 вольтты рәзеткемен жабдықталған. Осы түрленімнің дизельді мотормен жүретін нұсқасын 34.5 млн теңгеге алуға мүмкіндік бар. Басқа комплектацияларда дизельді агрегат болмайды.

1 / 6

• 
• 
• 
• 
• 
• 

1 / 6

Бренд 2.4 литрлік бензинді турбомоторды «Престиж» комплектациясына орнатады. Оның құны — 39.5 млн теңге. Автомобиль ауқымды көмекшілер жинағымен, автоматты тежеу ​​жүйесімен, айнала шолу камераларымен, жолсыз жерде қажет көмекшілер кешенімен (Crawl Control, MTS, MTM), бұғатталатын артқы дифференциалмен, 12.3 дюймдік экраны мен он динамигі бар медиажүйемен, 12.3 дюймдік цифрлы аспаптар панелімен, рөл жылытқышпен, сымсыз қуаттағышпен ерекшеленеді.

Жіңішке тікбұрышты фарасы бар стандарт LC Prado-ның үздік нұсқасы — 43 миллион теңге тұратын «Люкс Плюс». Бұл машинада панорамалы шатыр, 20 дюймдік дөңгелектер, өшіруге болатын алдыңғы тұрақтандырғышты (SDM) қоса алғанда, жолсыз жерде қажет көмекшілердің толық жинағы, 14 динамигі бар аудиожүйе, салондағы цифрлы айна, жүргізуші орындығының жады және алдыңғы орындықтарды электр көмегімен реттегіш, бірінші және екінші қатардағы орындықтарды жылыту және желдету жүйелері, проекциялық экран, ортаңғы консольде салқындатқыш бокс бар.

Ең қымбаты — 45 млн теңге тұратын шектеулі First Edition комплектациясы, оның жабдықтар тізімі «Люкс Плюспен» бірдей, тек сырт пішіні басқа. Мұндай Land Cruiser Prado-ның алды ретро стильде жасалған, шанағы екі түсті. Орындықтары мен есік карталарында нұсқасы жазылған логотиптер бар.

Қазақстандағы Toyota өкілдері модельдің бағасы туралы толық мәлімет бермегенмен, LC Prado-ның құны елімізде 31.5-45 млн теңге аралығында болатыны анық. Ал Жапонияда 2.7 литрлік моторы бар жол талғамайтын көліктің ең арзаны 15.1 млн теңге тұрады, АҚШ-та Land Cruiser деп аталатын автомобиль 25.3-33.9 млн теңгеге сатылып жатыр. Ол жақта машина 2.4 литрлік турбомоторға негізделген гибрид күштік құрылыммен жабдықталады.