Жаңа Changan CS55 Plus Қазақстанға Uni-S ретінде келеді

Алматыдағы AMMKZ зауытында жасалатын Changan топтамасы кеңейеді. Жергілікті реестрде жаңа CS55 Plus-тың құжаттары пайда болды. Бренд бұны кроссовердің төртінші буыны ретінде таныстырып отыр. Алайда автосалондарда жаңа өнім UNI-S атауымен сатылады. Өйткені модельдер қатарында екі CS55 Plus бар.

Автомобильдің ұзындығы — 4550 мм, дөңгелек базасы — нұсқасына қарай 2650 немесе 2656 мм. Кроссовер 181 ат күшіне ие (280 Нм) 1.5 литрлік турбомотормен жүреді. Қозғалтқыш 7 сатылы DCT роботымен жұптаса жұмыс істейді. Жаңа өнімнің алдыңғы және толық жетекті түрленімі шығады.

Uni-S 10.25 дюймдік цифрлық аспаптар панелі, 14.6 дюймдік мультимедиа экраны, панорамалы шатыр, барлық орындықты жылытқыш, алдыңғы орындықтарды желдеткіш, рөл мен алдыңғы әйнекті жылыту жүйесі, электр жетекті орындықтар мен жүксалғыш есігі, алдыңғы және бүйірлік эйрбэг, қауіпсіздік пердесі және жүргізуші ассистенттерінің жинағымен жабдықталады.

Машина нарыққа қашан шығатыны белгісіз. Ресми дилерлік орталықтардағы бағасы туралы да ақпарат жоқ. Бірақ CS55 Plus тақтайшасы бар осындай кроссоверлер жеке импорттаушылардың арқасында Қазақстанға әлдеқашан келіп қойған. Kolesa.kz-те құны 8.9-11.8 млн теңге аралығында.