Қазақстанда жанармай бағасы Ресейдегімен әлі теңеспейді

Қазақстан билігі ЕАЭО-ның бірыңғай отын нарығын құру процесін кейінге шегереміз деп ресми мәлімдемеді. Бірақ бұл ақпарат Ұлттық экономика министрлігі әзірлеген ҚР «Салық кодексін өзгерту және толықтыру туралы» заң жобасында пайда болды. Құжаттағы мұнай өнімдеріне қатысты бірнеше баптың түсіндірмесінде «ЕАЭО Бірыңғай нарығын іске қосу 2030 жылға шегерілді» деп жазылған.

Энергетика министрлігі мерзім өзгергенін растап, жаңасы бәсекелестікті қорғау және дамыту агенттігі әзірлеген Қазақстан Республикасында 2027–2031 жылдары бәсекелестікті қорғау және дамыту тұжырымдамасының жобасында жазылған деді. Бұл шешім ЕАЭО деңгейінде қабылданыпты.

15 жыл бұрын Кеден одағы құрылып жатқанда біздің шенеуніктер Қазақстандағы бензин мен дизельдің бағасын Ресейдегімен теңестіру керек деп айтқан. Кейін олар арзан сұйық отын сату тиімсіз және оның шекарадан заңсыз асуына жанармай бекеттеріндегі төмен баға себеп деді.

Жоспар бойынша бензин мен дизельдің құны былтыр теңесуі керек еді. Кейін оны іске қосу мерзімі 2027 жылғы 1 қаңтар деп белгіленді. Енді сауда алаңын біріктіру тағы кейінге қалған сияқты.