Xiaomi-дің алғашқы гибриді ерекше опция алады

Биыл жарық көретін Xiaomi-дің жаңа моделі соңғы уақытта фототыңшылардың объективіне жиі түсіп жатыр. Бұл жолы прототип қалың камуфляжбен қапталыпты, бірақ қосымша опциясы бар. Кроссовердің үстіндегі элемент шатыр екен.

Жергілікті басылымдар жаңа өнім нарыққа Xun Tian атты жаңа суббрендімен шығып, N90 индексін алуы мүмкін дейді. Бренд атауы «Аспан көшпендісі» дегенді білдіреді және көліктің саяхатқа бағытталған сипатын көрсетуге тиіс.

Техникалық жағынан бұл модель Xiaomi тарихындағы алғашқы гибрид болады. Алдын ала мәлімет бойынша күштік құрылым тізбекті гибрид схемаға негізделеді. Капот астына генератор ретінде жұмыс істейтін 1.5 литрлік дәстүрлі қозғалтқыш жайғасады, ал дөңгелектерді үлкен аккумулятордан қуат алатын екі электромотор айналдырады. Батарея сыйымдылығы 70 кВт·сағаттан асады. Машина электр қуатымен 500 км еңсереді, жалпы жүріс қоры 1500 шақырымға жетеді.

Қытай нарығындағы соңғы үрдісті ескерген жергілікті басылымдар автомобиль пневматикалық аспасы бар толық басқарылатын шасси, үш қатарлы салон алады және бағасы 450 мың юаньнан аспайды (32.4 млн теңге) деп болжап отыр.