Volkswagen жаңа Golf-ті көрсетті

Наурыздың басында IG Metall кәсіподағы Вольфсбургте конвейерге тұратын Volkswagen Golf-тің алғашқы ресми тизерін жариялады. Атауындағы ID қосымшасы электромобиль екенін аңғартып тұр. Қазірше машина жайлы басқа ақпарат жоқ.

Жаңа модельдің бойынан ностальгия елесі есіп тұр. ID.Golf сұлбасынан бұрынғы буындардың, әсіресе томпақ дөңгелек аркасы мен тығыз шанағы бар төртінші буынның стилі байқалады. Алдыңғы бөлігінің доғал пішіні Corrado-ны еске салады.

Тоғызыншы буын өкілі бренд Rivian компаниясымен бірлесіп жасаған SSP (Scalable Systems Platform) платформасына негізделеді.

Дәстүр бойынша стандарт ID.Golf-тен бөлек машинаның GTI және R индексті қуатты түрленімдері шығады. Олар толық жетек жүйесіне ие екі электромотормен жабдықталады деген ақпарат бар.

Батареялы көлік жарық көрген соң да қазіргі сегізінші буындағы Golf VIII өндірісі тоқтамайды. Ол дәстүрлі мотормен жүретін балама ретінде шыға береді, мұндай машина Мексикада жасалады.