2025 жылы Volkswagen Еуропадағы қатаң эконормаға байланысты 1.5 миллиард еуро шығынға ұшырайды. Бұл туралы VW-дің инвесторлармен байланыс департаментінің бастығы Рольф Воллер айтты, деп хабарлады Bloomberg. Мұның бірнеше себебі бар, бірақ оның бәрі электрокарға қатысты.
Volkswagen модельдерінен шығатын орташа зиян газ мөлшері стандартқа сай келмейді. Сондықтан компания ірі көлемде айыппұл төлеуге мәжбүр. Талапқа сай келу үшін ауаға зиян газ шығармайтын электромобиль өндірісін арттыру қажет. Бірақ Еуропада батареялы VW көліктеріне сұраныс аз. Оның үстіне электрокар шығару концерн үшін дәстүрлі мотормен жүретін машина өндірісіне қарағанда әлдеқайда тиімсіз.
Желтоқсанның аяғында Еуропарламентте экостандартты тағы қатаңдау шешімін қайта қарау жөнінде ұсыныс айтылды, өйткені жаңа норма Еуропадағы автоөнеркәсіпті шығынға батыруы мүмкін. Renault бас директоры Лука де Мео 2025 жылы экологияға байланысты айыппұл мөлшері 15 млрд еуроға жетіп, өндірушілер бұл ақшаны стратегиялық инвестицияға арналған қаражаттан алуы мүмкін екенін айтты.
Бірақ Еуропада қазіргі жағдайдан пайда көріп отырған өндірушілер де бар. Олар — Tesla сияқты электрокары жақсы өтіп жатқан фирмалар. Экостандарт оларға да қатысты, бірақ электрокар қатаң нормаға артығымен сәйкес келетіндіктен, «экологиялық кредитті» табысы аз әріптестерге сатуға болады. Tesla осы жолмен бірнеше миллиард табыс тапқан. Ал Volvo мен Polestar экологиялық квота арқылы сауда жасап отыр.
Комментариев: 0