Еуропада Қытай көліктері жапон модельдерінен көп өтті

Еуропадағы клиенттер қытай өнімдерін көп алып жатыр. Биыл мамырда Қытайда жасалған автомобильдің Еуропадағы саудасы алғаш рет жапон брендтерінің нәтижесінен жоғары болды. Мұны Nikkei Asia басылымы Еуропа автоөндірушілер қауымдастығының (ACEA) дерегіне сілтеме жасап хабарлады.

BYD, Chery, Geely, Leapmotor және SAIC компаниялары мамырда 138 410 жеңіл көлік сатқан, бұл былтырғы осы кезеңмен салыстырғанда 65 % көп. Honda, Mazda, Mitsubishi, Nissan, Suzuki және Toyota-ның көрсеткіші 3 % (130 424 машина) төмендеді.

Басылым ACEA статистикасы Қытай брендтерінің Еуропадағы саудасы тұрақты түрде өсіп келе жатқанын көрсетеді деп атап өтті. Мысалы, SAIC 24 айдың 17-сінде сауда көлемін ұлғайтқан.

Қазір Еуропада BYD концернінің үлесі көп. Компания биыл 800 мың автомобиль сатты. Марка басшылары 2026 жылға арналған экспорт жоспарын 1.3-тен 1.5 миллионға ұлғайтуды көздеп отыр.

Еуроодақ Қытайдан келген көліктердің көбейгеніне наразы болғандықтан, былтыр электромобильге қосымша кедендік баж салығын енгізді. Кейбір бренд үшін мөлшерлеме 45.3 %-ға жетті. Дегенмен автоөндірушілер бәсекеге қабілетті баға ұсынып отыр. Мәселен, Германияда BYD Dolphin-нің бастапқы бағасы — 26 990 еуро. Ол сипаттамасы ұқсас Renault 5 E-Tech-тен арзан. Қытайлар гибридке басымдық бере бастады. Қазір Еуропадағы бензоэлектрлі гибридтер сегментінде ең көп сатылатын модель — BYD Seal U. Ол бұрынғы көшбасшыларды артта қалдырды. Бірақ Еуроодақ оның да жолын кесетін сияқты. Handelsblatt басылымы хабарлағандай, Еурокомиссия жаңа норма әзірлеп жатыр.