Volkswagen иелері сотқа арызданды

Бірнеше жыл бұрын Volkswagen рөлге сенсорлы панель орнату қате шешім болғанын мойындап, кейінгі модельдерге үйреншікті батырма орнатуға уәде еткен. Алайда бренд зауыттан шығып, сатылып кеткен машинаның панелін ауыстыра алмайды. Осыны екі АҚШ тұрғыны пайдаланып қалмақ болған сияқты.

Carscoops олар Нью-Джерсидің федералды сотына талап-арыз жолдап, VW ID.4 рөліндегі батырмалар ыңғайсыз ғана емес, адам өміріне қатер төндіреді деп шағымданған деп жазды. Тіпті рөлге қол тигізуге тіксінеді екен. Өйткені тым сезімтал басқару элементі бейімді круиз-бақылауды оңай іске қосады, салдарынан жүргізуші қауіпті жағдайға тап болуы ықтимал.

Арызданушылардың ойынша компания клиенттердің шағымы мен дилерлер берген мәліметтен мәселе барын білді, бірақ тиісінше жөндеу жүргізбеді, панельді тегін ауыстырмады және шығынды өтеуге тырысқан жоқ. Осылайша Volkswagen «әрекетсіздігімен алаяқтық жасағаны, кепілдік шарттарын бұзғаны және негізсіз байығаны үшін» кінәлі.