Қытай билігі автопилоттың көгілдір жарығына тыйым салды

2026 жылы 27 шілдеден бастап Қытайда көгілдір түсті автопилот индикаторымен жабдықталған жаңа жеңіл автомобильді сертификаттауға тыйым салынды. Қытайлар оны «ақылды жүргізудің кішкентай көк жарығы» деп атайды.

Негізі мұндай шамды қолдану жөнінде ресми рұқсат жоқ. Бірақ Li Auto, BYD, Xiaomi, Aito, Geely, Nio, Xpeng сияқты автоөндірушілер модельдерін осындай индикатормен жабдықтап жүр. Мұндай жүйе орнатылған машина саны миллионға жуықтайды. Осыдан кейін мәселеге Қытайдың мемлекеттік реттеуші органдары, соның ішінде Өнеркәсіп және ақпараттық технология министрлігі (MIIT) назар аударды.

Шенділер «кішкентай көк жарық» қолданыстағы GB 4785-2019 («Автомобиль мен тіркемеге жарық сигналын орнату қағидасы») стандартына сай келмейді деп санайды. Онда «автопилот индикаторы» деген ұғым жоқ. Құжат бойынша азаматтық мақсаттағы машиналарға ақ, қызыл, сары және қызғылт сары жарық пайдалануға рұқсат берілген. Ал көк түс (көгілдір соның бір реңкі саналады) полиция, жедел жәрдем, өрт сөндіру сияқты арнайы қызмет көліктеріне ғана арналған. Сондықтан мұндай шамды қарапайым машинаға орнату адамдарды шатастыруы мүмкін.

Оның үстіне автопилот индикаторы жолдағы бұзақылардың нысанасына айналған. Олар көлікті электроника басқарып келе жатқанын байқаған соң автопилоттың мүмкіндігі мен реакциясын сынау үшін әдейі машинаның жолын кесетін көрінеді.

Қытайда «жаңа ереже — жаңа модельдерге арналған» деген қағида бар, демек полиция қазір жолда жүрген техникадан жабдықты алып тастауды талап етпейді. Бірақ MIIT автоөндірушілермен келіссөз жүргізіп жатыр, мамандар көгілдір жарықты физикалық жолмен не бағдарламалық жасақтаманы жаңарту арқылы өшіреді.