Volkswagen екі электрокардың өндірісін кейінге шегереді

Volkswagen электромобиль топтамасын кеңейту және өндіріс қуатын арттыру стратегиясын қайта қарап жатыр. Handelsbalatt басылымы компания ішіндегі дереккөзге сілтеме жасап хабарлағандай, марка кем дегенде екі жаңа модельді келесі онжылдықтың басында өндіреді. Бұған электромобильге сұраныс деңгейін дұрыс есептемеу мен қаржылық қиындық себеп болған.

Инсайдерлер қазіргі T-Roc моделінің батареялы нұсқасы саналатын ID. Roc кроссоверін шығару кейінге қалады деп болжап отыр. Марка ID. Golf моделіне қатысты жоспарын да өзгертті. Әу баста ол бензинді хэтчтің тоғызыншы буынымен қатар шығуға тиіс еді. Енді компания бұл модельдердің өндірісін 2030 жылға дейін шегерді.

Бұған дейін Volkswagen өндіріс көлемін арттыру үшін зауыттарын қайта жасақтайтыны белгілі болған. Атап айтқанда, марка «Гольф» өндірісін Вольфсбургтен Мексикаға көшіріп, оның орнына конвейерге электрлі ID.3-ті қоюды жоспарлаған. Инсайдерлер бұл жоспардың да жүзеге асуы қиын екенін айтты.

Жақында Volkswagen-нің қадағалау кеңесі жиын өткізіп, бес жылға арналған даму стратегиясын бекітеді. Онда мамандар компанияның қазіргі қаржылық жағдайын ескере отырып, инвестиция бөлудің жаңа жолын талқылайды. Дереккөз электрокарға басымдық беру саясаты сәтсіз болды деп жазды, басшылар электромобильдің келешегін дұрыс болжай алмай, осы бағытты дамытуға көп ақша құйған.