ВАЗ-2110-ды пойыз соқты. Теміржолдан қалай өткен жөн

Жол апаты 22 наурызда кешке қарай болды. Алдын ала мәлімет бойынша 41 жастағы ВАЗ-2110 жүргізушісі теміржолдан өтетін жердегі арнайы белгіні елемей, рельске шығып кетіп, № 1216 тепловоздың жолын кескен. Машинист тежеуішті шұғыл басқанымен, алып көлікті бірден тоқтату мүмкін емес еді. Пойыз қаққан жеңіл машинаның жүргізушісі ауруханаға жеткізіліп, алғашқы көмек алған соң үйіне кеткен.

Енді ол жол ережесін өрескел бұзғаны үшін Әкімшілік кодекстің 610-бабы,1-бөлігі бойынша жауапқа тартылады.

Соған ұқсас апат бірнеше күн бұрын Павлодар облысына қарасты Шарбақты ауданында болды. Алексеевка ауылының маңындағы шойын жолдың 544-шақырымында Toyota Camry жүргізушісі бағдаршамның қызыл түсі жанып тұрса да, рельске шығып кеткен, дәл сол сәтте көліктің моторы өшіп қалады. Ол пойыз таяп қалғанда ғана машинасын әрең оталдырып, жолды босатты.

Еске сала кетейік, Жол ережесінің 15-тармағы бойынша:

• шлагбаум жабық тұрғанда және ол жабыла бастағанда (бағдаршамның сигналына қарамастан);
• бағдаршамның тыйым салатын сигналы жанғанда (шлагбаумның орналасуына немесе оның бар екендiгiне қарамастан);
• өтпе бойынша кезекшiнiң тыйым салатын сигналы (кезекшi жүргiзушiге кеудесiн немесе арқасын қарата тұрып жоғары көтерiлген қолында — жезл, қызыл фонарь немесе жалауша, не екi жағына қолдарын созып) кезiнде;
• егер өтпенiң арғы жағында жүргiзушiнi өтпеде аялдауға мәжбүр ететiн кептелістен қозғалыс тоқтап тұрса;
• егер өтпеге көрiну шегiнде пойыз (локомотив, дрезина) жақындап қалса теміржолдан өтуге болмайды.

Бұдан бөлек:

• темiржол өтпелерінен тыс жерден өтуге;
• қарама-қарсы қозғалыс жолағына шығып, жол өтпесi алдында тұрған көлiк құралын айналып өтуге;
  шлагбаумды өздiгiнен ашуға;
• жол өтпесi арқылы ауыл шаруашылығы, жол, құрылыс және басқа машиналар мен механизмдердi алып шығуға;
• темiр жол әкiмшiлiк-техникалық бөлiмше бастығының рұқсатынсыз жылдамдығы 8 км/сағ-тан баяу жүретiн машиналарды, сондай-ақ трактор шана сүйретпелер қозғалысына тыйым салынады.

Өтпе арқылы қозғалысқа тыйым салынған жағдайда жүргiзушi тоқтау сызығының, 2.5 белгiсiнiң немесе бағдаршамның алдында, ал егер олар жоқ болса, темiржол өткелi шекарасында аялдауы тиiс.

Темiржол өтпелерiнен тыс жерден темiржолды кесiп өту, шлагбаум жабық тұрған немесе жабылып жатқан кезде не бағдаршамның немесе өтпе жолдағы кезекшiнің тыйым салатын сигналы берілген кезде темiржол өтпелерiне шығу — 20 АЕК (58 340 теңге) мөлшерiнде айыппұл салуға әкеп соғады. Осындай әрекет бiр жыл iшiнде қайталанса, ереже бұзған азамат 6 ай мерзiмге көлiк жүргізу құқығынан айырылады.