Кез келген көліктің қарбалас сәттерден тыс уақытта және демалыс күндері автобус жолағымен жүруіне мүмкіндік беретін ереже талқыланып жатыр. Жол ережесіне өзгеріс енгізу туралы жобаны президенттің тапсырмасымен ҚР ІІМ Әкімшілік полиция комитеті дайындады. Құжат eGov.kz сайтында жарияланды.
Urban Forum Kazakhstan сарапшылармен бірге талқылаудан кейін жол ережесіне енгізілген түзетулерге қарсы екенін мәлімдеді. Урбанистердің пікірінше, ереженің өзгеруі қоғамдық көлік пен төтенше жағдайлар қызметінің жұмысын қиындатады, автобус, троллейбустардың және велосипед пен самокат мінген азаматтардың қатысуымен болатын жол апаты көбейеді.
Аталған себептерге байланысты ереженің өзгеруіне көптеген қарапайым тұрғындар да қарсы болып отыр. Азаматтар жобаға пікір білдіруде.
«Түзетулер енгізуге қарсымын. Ішкі істер министрлігіне жол белгілеріне өзгеріс енгізуді ұсынамын, мысалы жылдамдықты төмендету жайлы. Сонымен қатар жол-көлік оқиғаларындағы өлім-жітімді азайту және қоғамдық көлік қызметіне кедергі келтірмеу мақсатында жол қауіпсіздігі бағдарламасының басқа ережелерін нақтылау керек», — деп жазды тәуелсіз сарапшы Елена Ерзакович.
Бірақ жобаны қолдаушылар да бар. Мысалы Алексей Арсентьев өз пікірінде бұл өте дұрыс жоба екенін атап өтті. «Арнайы жолақты салған кезден бастап осылай істеу керек еді. Бұл өте қисынды шешім, көптен бері күткеніміз де осы емес пе? Жарайсың, президент! Енді Алматыдағы Тимирязев көшесінің ортасында тұрған аялдамаларды алып тастаңыздар», — деп жазды ол eGov.kz сайтында.
ҚР ІІМ түзетулерді қабылдау не қабылдамау туралы шешім жан-жақты талдап, зерттеуден және қоғамдық талқылаудан кейін ғана қабылданатынын мәлімдеді.
Комментариев: 0