Алматыдағы Момышұлы көшесінде көлік қозғалысы уақытша шектеледі

2026 жылғы 19 маусымнан бастап Мөңке би көшесінен Төле би көшесіне дейінгі аралық уақытша жабылады. Мегаполис әкімдігі жолдың ортаңғы екі жолағында көлік қозғалысы шектелетінін хабарлады. Құрылыс жұмыстары жүріп жатқанда жүргізушілер автобус жолағымен жүре алады. Камера бұл жолаққа шыққан машиналарды тіркемейді.

Жүргізушілер кептеліс болатынын ескеріп, сапарын алдын ала жоспарлаған жөн.

Әкімдік Момышұлындағы шектеу қанша уақытқа созылатынын айтпады.

LRT-ның бірінші кезеңі мына бағытпен жүреді: Момышұлы — Төле би көшесі — Абылай хан даңғылы — Алматы-2 теміржол вокзалы. Депо Алатау ауданындағы индустриялық аймақтың оңтүстік бөлігінде болады. Бірінші кезеңнің жалпы ұзындығы — 18.3 км.