«Урал» классикалық мотоцикл өндірісін тоқтатты

«Урал» басшысы Илья Хайт әйгілі бренд атымен классикалық мотоцикл жасау қаржылық қиындықтарға әкелгенін мойындады. Жағдайға байланысты компания байк құрастырып, АҚШ сияқты басты нарықтарына жеткізу процесін уақытша тоқтатуға мәжбүр болды. Қазір «Урал» Yingang фирмасымен бірге дайындаған жобасына үміт артып отыр. Алғашқы өнім — заманауи әрі арзан Neo 500 мотоциклі.

Ирбит мотозауыты санкцияны айналып өту үшін Қазақстанда өндіріс орнын ашты. Компания осылайша Ресейден тыс жерде жасалған мотоциклді еш кедергісіз экспорттаймыз деп ойлады. Бірақ бұл схема оң нәтиже бермеген. АҚШ-тың жаңа баж салығы да кәсіпорынның жұмысын қиындатты. Негізгі нарықта фирма «Уралды» сата алмай қалды.

Илья Хайтқа тығырықтан шығу үшін танымал брендтің атымен басқа мотоцикл сату туралы ұсыныс түскен, бірақ ол басқа жол таңдады. Енді «Уралдың» негізгі моделінің бірі — Қытай мотоциклі. Ресей инженерлері Yingang платформасын өзгертті, Neo 500 «Уралдың» техникалық талаптарына және заманауи сапа стандартына сай келеді. Ол — жеңіл, оңай басқарылады және арзан. Neo 500 үш дөңгелекті мотоцикл әлемімен танысқысы келетіндер үшін қолайлы болуы керек.

Марка Ural Neo-ны Қытайда құрастырады, бұл АҚШ-қа жеткізумен байланысты қиындықтарды барынша азайтуға мүмкіндік береді. Мотоцикл 35 ат күшін беретін 2 цилиндрлі Zonsen моторымен (446 текше см) жабдықталады. «Урал» Neo 500-дің алғашқы нұсқаларын Америкадағы басылымдарға тест-драйв өткізу үшін бере бастады, мотоцикл сертификат алып жатыр. Жергілікті дилерлер өнімді келер жылы көктемнің аяғында сата бастайды.

Хайт Ирбит мотозауыты шектеулі режимде жұмыс істеп тұрғанын атап өтті. Кәсіпорын мотоциклдердің шағын партиясын қолда бар бөлшектермен құрастырып, Ресейге жібереді және экспортқа арналған кейбір қосалқы бөлшектер жасайды. «Бүкіл құжат, құрал-жабдық және тәжірибелі инженерлер мен білікті мамандарымызды сақтап қалып, өндірісті қалпына келтіруге болады. Біз осы инфрақұрылымды мүмкіндігінше ұзақ қолдауға барымызды саламыз», — деді кәсіпорын басшысы.