Тұрғындардың жол сапасына көңілі толмайды

«Әділдік және өркендеу» қоғамдық қоры биыл 5-25 қараша аралығында жол сапасына қатысты әлеуметтік мониторингті онлайн форматта жүргізді. Сауалнамаға Қазақстанның барлық облысынан азаматтар қатысты. Қатысушылардың жартысын күнделікті көлік жүргізетіндер құраған.

Нәтижесінде тек 40 %-ы соңғы жылда өз елді мекеніндегі жолдың сапасы жақсарғанын атап өтті. Төрттен бірі ешқандай өзгеріс болмағанына, ал 30 %-ы жағдай нашарлағанына сенімді.

68.5 %-ы елдегі жол құрылысының қарқыны тым баяу деп санайды. Ал 70 %-дан астамы жөндеу жұмыстарының сапасын нашар деп бағалады. Пікір білдірушілердің жартысы былтыр жөнделген жолдар қазір жарамсыз екенін атап өткен.

Ең өзекті мәселелердің тізімі мынадай:

• сапалы магистральдың жетіспеуі (58%);
• тұрғын аудандағы нашар жолдар (46%);
• магистральдағы шұңқырлар, жарықтың жоқтығы (39%);
• баяу жөндеу жұмыстары (39%);
• аудан ішіндегі жолда суағар мен жарық жеткіліксіздігі (34 және 31 %);
• қар тазаламау және көктайғаққа қарсы жұмыстардың жасалмауы (29%).

Қоғамдық қор өкілдерінің айтуынша, жұрт өз елді мекеніндегі жолдарды республикалық трассаларға қарағанда жақсы деп бағалады: шамамен 60 %-ы жақсы немесе қанағаттанарлық деп санайды. Дегенмен ауыл тұрғындары жергілікті жолдарға қаладағыларға қарағанда көбірек наразы.

Қатысушылар жолдардың нашар болуына басты себеп сыбайлас жемқорлық пен ұрлық (38.83%) деді. Екінші орында — жергілікті билік органдарының тиімсіз жұмысы (17.31%), ал үшінші орында — үкімет тарапынан тиісті бақылаудың болмауы (12.2%). Бұл тізімді жол қызметінің нашар жұмысы (11.53%) түйіндеді.