Sputnik.kz хабарлағандай, оқиға өткен түні Алматыдағы Саин көшесінде болған. Toyota Land Cruiser-ді тізгіндеген азаматтың айтуынша, оның алдынан жол жиегінен шықпақ болған көлік кенет шыға келген, соққыдан қашпақ болып рөлді солға қарай бұрып жібергенде, өзге көліктің жолына шығып кетіп, соңғысы оны дөңгелегінен соққан.
Соққыдан жүргізуші рөлге ие бола алмай қалады. Тротуарға шығып кеткен көлік жарық бағанасын, жарнамалық билбордты және автотұрақтың қоршауын қиратып, күзетшілер тұратын дүңгіршекке бір-ақ соғылады. «Тойотаны» соққан көлік оқиға орнынан ізін суытқан. Жол апатынан зардап шеккен жүргізуші мен оның екі жолаушысы дәрігерлер көмек көрсеткеннен кейін ауруханаға барудан бас тартты. Оқиғаның мән-жайын тәртіп сақшылары анықтауда.
Комментариев: 0