Төртінші мұнай өңдейтін зауытты салуға Еуропа көмектеседі

Биыл маусымның аяғында Қасым-Жомарт Тоқаев Еуроодақ басшыларымен келіссөз жүргізу үшін Брюссельге барып, бірқатар құжатқа қол қойды. Солардың ішінде Samruk-Kazyna Ondeu ЖШС мен Genesis Oil & Gas Consultants Limited (Нидерланд/Ұлыбритания) компаниясы арасындағы келісімшарт бар. Соңғысы елімізде жаңа мұнай өңдеу зауытын салу жобасының алдын ала техникалық-экономикалық негіздемесін әзірлейді.

Болашақ кешен жылына 10 млн тонна мұнай өңдейді. Бұған дейін МӨЗ 2030–2040 жылдары салынады деген ақпарат тарады, себебі қазіргі зауыттар жаңарған соң 2030 жылға дейін елдің жанармайға сұранысын толық қамтамасыз ете алады.

Қазақстанға төртінші мұнай өңдейтін зауыт қажет екені алғаш талқыланып отырған жоқ. Бұл мәселе 15 жылдан астам уақыт бойы ел назарында. Президент биыл ақпанда үкіметке жоба бойынша түпкілікті шешім қабылдауды тапсырғаннан кейін бұл мәселе қайта өзекті бола түсті.

Қазір елде үш мұнай өңдейтін зауыт (Атырау, Павлодар және Шымкент) жұмыс істеп тұр.