Илон Маск бұған дейін жаңа бюджеттік электромобиль шығаруға уәде еткен, бірақ оның орнына Tesla Model 3 седаны мен Model Y кроссоверінің қарапайым түрленімін таныстырды.
Модельдің ең қолжетімді комплектациясы Standard деп аталды, бұрынғы Long Range нұсқасы Premium атанса, үздік көлік Performance атауын сақтап қалды.
Tesla әр модельдің құнын шамамен 5000 доллар түсірген. Атап айтқанда, енді Model 3 Standard Америкада — 36 990 доллар, Model Y 39 990 доллар тұрады.
Екеуі де артқы осьтегі жалғыз электромотор (Model 3 — 286 ат күші, Model Y — 300 ат күші) және сыйымдылығы 69 кВт·сағ батареямен жабдықталған. Аккумулятор сыйымдылығы азайғандықтан, машинаның жүріс қоры кеміді. Standard 521 шақырымды еркін еңсерсе, Premium нұсқа 567 км қозғала алады. Машиналардың динамикасы нашарлағанмен ең жоғары жылдамдығы (200 км/сағ) өзгермеді.
Машина динамикасы кемігенін жылдамдықты жақсы көретін жүргізушілер ғана сезуі мүмкін, басқа өзгерістерді көп адам байқайды.
Standard енді қарапайым 18 дюймдік дөңгелек дискісін алады, бейімді аспа болмайды, үш түрлі шанақ түсі ғана бар (сұр — стандарт, ақ және қара — қосымша ақыға). Model Y панорамалы шатырынан айырылды.
Екі модельдің де салоны өте қарапайым. Компания Autosteer (жолақта ұстау), алдыңғы орындықты желдету және артқы орындықты жылыту функциясын өшіріп, былғары орнына матамен қаптаған, рөл электр ккөмегімен реттелмейді, артқы сенсорлы экранды да алып тастады, аудиожүйенің динамигі аз, сабвуфері жоқ. Машинада FM/AM радио, салон жарығы және HEPA сүзгісі де болмайды. Бүйірлік айна тек қолмен реттеледі.
Комментариев: 0