Тараздағы арнайы ХҚКО-ға арнайы жасақ басып кірді

12 ақпанда құқық қорғау қызметкерлері Тараздағы мамандандырылған ХҚКО-ға, сондай-ақ орталықтың басшылары мен кейбір лауазымды тұлғаның пәтеріне күтпеген жерден басып кірді. ҚР ІІМ баспасөз қызметі хабарлағандай, тәртіп сақшылары оқытпай және көлік жүргізу тәжірибесін өткізбей жүргізуші куәлігін ұзақ уақыт сатып келген күдіктілерді ұстауға барды. «Азаматтарға арналған үкімет» таратқан ақпаратқ сүйенсек, пысық мамандарды корпорацияның қауіпсіздік қызметі ұстап берген екен.

«Азаматтарға арналған үкімет» ҰК тексеріс нәтижесінде заңсыз жүргізуші куәлігін беру фактісін анықтады. 2023 жылдың 14 қыркүйегінде ішкі қауіпсіздік қызметкерлері мұны растайтын құжаттарды құзырлы органға жолдады. Қазір заттай дәлел жинау және тәркілеу шарасы жүріп жатыр. Тергеу жүріп жатқандықтан, басқа мәлімет жарияланбайды» – деп мәлімдеді корпорацияның баспасөз қызметі.

Полицияның мәліметінше қылмыстық топтың құрамында Жамбыл және Түркістан облыстарында, Алматы мен Шымкентте тұратын халыққа қызмет көрсету орталығының қызметкерлері, оның ішінде басшылар мен «делдалдар» болған. Делдалдар осы өңірлерде клиент іздесе, Тараздағы қызметкерлер жүргізуші куәлігін беріп, құжаттарын базаға тіркепті.

Бұл айла-амал қалай іске асқаны қызық, өйткені жол ережесінің соңғы 3.0 нұсқасы курсантты биометриялық сәйкестендіруді талап етеді.

Қазір заңсыз құжат берудің 35 фактісі анықталып, қылмыстық схеманы әзірлеушілер мен орындаушылар уақытша ұстау изоляторына қамалды.

Осыдан екі жыл бұрын арнайы жасақ Ақтөбедегі ХҚКО-ға да дәл осындай себеппен басып кірген еді.