Tank 500 Қазақстанда қанша тұрады

Бірнеше ай бұрын Қазақстан нарығына Tank 300 шыққан, қытайлық бренд енді екінші моделінің бағасын жариялады. Ол — 299 ат күшіне (500 Нм) ие 3 литрлік турбомотормен жүретін 500 индексті рамалы жол талғамайтын көлік.

5 метрлік Tank 500 Қазақстанда екі комплектацияда 5 және 7 орынды нұсқада сатылады. Ең арзан Premium түрленімі 26.7 млн теңге тұрады. Дәл осы жиынтықта, бірақ қосымша орындығы бар машинаны 27.5 млн теңгеге алуға болады.

1 / 4

• 
• 
• 
• 

1 / 4

Автомобильдің стандарт жабдықтар тізіміне алдыңғы және бүйірлік қауіпсіздік жастығы, автоматты тежеу жүйесі, бейімді круиз-бақылау, жол белгісін тану, жолақта ұстау, жүргізуші күйін бақылау және айнала шолу камерасы сияқты электронды көмекшілер жинағы кіреді. Сондай-ақ машинада үш аймақты климат-бақылау, кілтсіз ашу жүйесі, жарықты автоматты басқару, жылытуға болатын алдыңғы әйнек пен бірінші және екінші қатар орындығы бар. Жүргізуші мен жолаушы орындығы электрлі реттеледі, бұдан бөлек цифрлы аспаптар панелі (12.3 дюйм) мен 14.6 дюймдік медиажүйе экранын айтуға болады.

Үздік Tech Plus комплектациясының 5 орынды нұсқасы 28.7 млн, 7 орынды нұсқасы 29.5 млн теңге тұрады. Автомобиль интерьері алькантарамен қапталған. Екінші қатардағы жолаушылар массаж функциясын пайдалана алады, барлық орындықта желдету мүмкіндігі бар. Электронды көмекшілердің толық жинағы бар. Сондай-ақ Tech Plus түрленімінде стандартты люк орнына панорамалы шатыр, сегіз динамигі бар аудиожүйе орнына 12 динамигі мен сабвуфері бар Infinity кешені орнатылған.

Биыл көктемде Шанхай автосалонында Tank 500 Hi4-T гибриді жарық көрді. Бірақ бұл нұсқа қазірше Қазақстан нарығына шыққан жоқ.