Тамызда жанармай айтарлықтай қымбаттады

Билік кеңінен қолданылатын жанармай маркаларының бағасын реттеуден бас тартқалы бері тамызда сұйық отын бағасы ең айқын өсім көрсетті. АИ-92-нің құны 9 теңгеге жоғарылады. Алматыда бағасы 225-231 теңге аралығында. Ірі желілер ішінде Royal Petrol ең арзан бензин ұсынады. Ең қымбаты Qazaq Oil бекеттерінде, ал Helios пен Sinooil 1 литрін 227 теңгеге беріп жатыр.

Сұйық отын құны бірден емес, кезең-кезеңмен көтерілді. Бекеттерде баға жиі өзгеріп отырды. Мәселен, Helios тамызда 92-нің бағасын кемінде бес рет өзгерткен.

АИ-95-тің бағасы тіпті шарықтап кетті. Мысалы, Helios-та 272-ден 275 теңгеге өссе, Royal Petrol бірден 10 теңге қосып, 275-тен 285-ке өзгертті.

Алматыда 29 тамыздағы жағдай бойынша дизельдің 1 литрі 321–323 теңгеден сатылып жатыр. Бұл өткен аймен салыстырғанда 4–8 теңге жоғары құн.

Республикалық маңызы бар басқа қалаларда да өсім байқалды. Астанада АИ-92 қазір 227–228 теңге (бұрын 218–222 теңге) тұрады, АИ-95-тің литрі 266–276 теңге (+1–6 теңге), ал дизель 318–319 теңге (бұрын 314–315 теңге) болды.

Шымкентте жанармай әлі арзан. Дегенмен АИ-92 мұнда 4–9 теңгеге қымбаттап, литрі 211–212 теңге болды. АИ-95 те 3–5 теңгеге өсіп, 258–262 теңгеге жетті. Дизель 214-тен саудаланып жатыр, бұл шілдеге қарағанда 4 немесе 7 теңгеге қымбат.

Билік отын құнын көрші елдермен теңестіру үшін бағаны реттеуден бас тартты.