Таксистер салық органына тіркеле бастады

Мемлекеттік кірістер комитеті «Яндекс.Таксимен» бірлесіп, Астана мен Алматыда жүргізушілерді платформада жұмысқа орналастыратын сынақ жобаны іске қосты. Комитет қазірге дейін агрегатор арқылы 500-ден аса адам тіркелгенін хабарлады.

Таксистер қандай артықшылыққа ие болады:

• Таксопарктің делдалдық қызметін жойып, ақша үнемдеуге және оны салық пен әлеуметтік төлемдер төлеуге пайдалануға мүмкіндік алады. Жүргізуші агрегатормен тікелей жұмыс істеп, әлеуметтік қамсыздандыру жүйесіне қатысады.
• Жеке кәсіпкер ретінде тіркелу жеңілдейді. Салық органына бармай-ақ «Яндекс» платформасы арқылы жеке кәсіпкерлікті тіркеуге болады.
• Салық ретінде жалпы табыстың 1 %-ын төлейді, ал қызметкер табысының 10 %-ын төлеп жүр.
• Салық және әлеуметтік төлемдерді есептеу міндеті болмайды. Жүргізуші келісімімен салық пен әлеуметтік төлемді «Яндекс» арқылы ұстайды. Әлеуметтік төлем таксистің табыс көлеміне қарай белгіленеді.

Салықшылар алда жобаға Glovo, Wolt, InDrive және т.б. компанияларды қосады.