2024 жылы айыппұл, утиль алымы және көлік тіркеу ақысы қанша болады

2024 жылы бір АЕК 3 692 теңге болады. Жүргізушілер мен көлік иелері үшін не өзгереді?

Айыппұл өседі

Жылдамдықты 10–20 км/сағ асырғаны үшін салынатын 5 АЕК айыппұл 18 460 теңге болады. Жүргізушілер белдік тақпаса, көлік тоқтату ережесін бұзса және шлем тақпаса дәл осындай мөлшерде айыппұл төлейді.

Жүргізуші бағдаршамның қызыл түсіне өтсе, 10 АЕК (2024 жылы 36 920 теңге) айыппұл арқалайды.

Жаяу жүргіншіге жол бермеген, жылдамдықты 20–40 км/сағ асырған, мүгедектерге арналған тұраққа көлік қойған азаматтар да 36 920 теңге айыппұл төлейді.

Жол ережесін бұзғаны үшін салынатын ең жоғары айыппұл — 50 АЕК (184 600 теңге), жүргізуші куәлігінен айырылған адам рөлге отырса, қазынаға дәл осындай мөлшерде ақша құяды. Сондай-ақ ол 10 тәулікке қамалады. Оқиға орнынан кетіп қалған жүргізуші де осынша айыппұл арқалайды немесе бір жылға көлік басқару құқығынан айырылады.

Утиль алымы қымбаттайды

Алымды есептеуде қолданылатын базалық мөлшерлеме (50 АЕК) 172 500 теңгеден 184 600 теңгеге өседі. Коэффициентке байланысты мотор көлемі 1000 текше см-ден аспайтын жеңіл автомобиль әкелу үшін 276 900 теңге төлеуге тура келеді. Ал моторы 2000 текше см-ге дейінгі машина үшін — 646 100 теңге, 3000 текше см-ге дейін — 923 000 теңге төлейсіз. Көлемі 3 литрден асатын машина үшін алым 2 122 900 теңге болады.

Елге электромобиль кіргізетіндер үшін ештеңе өзгермейді, мұндай машина утиль алымынан босатылған.

Көлікті есепке қою құны қалай өзгереді?

Машинаға төленетін ең арзан бастапқы тіркеу ақысы (0.25 АЕК) 862.5-тен 923 теңгеге өседі. 3 жасқа дейінгі машина үшін 172 500 емес, 184 600 теңге төлеуге тура келеді. Ал үш жастан асқан көліктерді тіркеу ақысы (500 АЕК) 1 725 000-нан, 1 846 000 теңгеге жоғарылайды.

Бұл төлемге электромобиль немесе гибрид болса да, мотор көлемі әсер етпейді. Машинаның шыққан жылына қарайды.

Дәстүрлі мотормен жүретін автомобиль үшін көлік салығы да қымбаттайды, өйткені ол да АЕК-ке байланысты. Салық калькуляторы арқылы 2024 жылғы 1 қаңтардан бастап салық мөлшері қалай өзгеретінін есептеуге болады.