Subaru Outback жаңарды

Нью-Йорк автосалонында Subaru алтыншы буындағы Outback-ты көрсетті. Автокөліктің алдыңғы бөлігі өзгерген, атап айтқанда оптикасы, радиатор торы және бампері басқаша. Дөңгелек аркасында үлкенірек болат қаптама болады. Артқы жағы негізінен өзгеріссіз қалды.

Салонның дизайны бұрынғыдай, бірақ жабдықтар сәл жақсарды. Мультимедиа Apple CarPlay және Android Auto-мен жұмыс істейді. Опциялар тізіміне экраны мен компасы бар айна енді.

Техникалық жағынан маңызды жаңалық — EyeSight жүйесі. Қарапайым универсалдағы камераның көру бұрышы жақсарды, ал үздік түрленіміне (Touring) жаяу жүргіншілер мен велосипедшілерді анықтайтын қосымша объективі бар жаңа буындағы EyeSight жүйесі орнатылған. Outback 80 км-ге дейінгі жылдамдықта жүргізушіге рөлді басқаруға көмектесе алады. Кешен Automatic Emergency Steering деп аталады.

Капот астында өзгеріс жоқ. 185 ат күшіне ие 2.5 литрлік атмосфералы мотор базаға, 264 ат күшін беретін 2.4 турбомотор қымбат нұсқасына қойылады. Екі агрегат та тек вариатормен және толық жетек жүйесімен жұмыс істейді.

Жаңарған Outback АҚШ-та 2022 жылы күзде сатылымға шығады. Қазақстанда саудаланып жатқан нұсқасы қашан жаңаратыны белгісіз. Модельдің алтыншы буыны біздің елге былтыр ғана келді, ал АҚШ-та 2019 жылдан бастап сатылады.