Subaru флагман электрокар шығармақшы

Subaru топтамада флагман спорткар ретінде көшбасшы болатын электромобиль жасауға ниетті. Бұл туралы Auto Express басылымына сұхбат берген Subaru-дың Еуропадағы басшысы Дэвид Стритто айтты. Ол Еуропада Subaru спорткарларын ұнататындар көп емес, бірақ олар белсенді әрі жаңа өнімге қызығатыны анық, ал электромобильдің танымалдығы көк-сары машиналардың қайта жандануына мүмкіндік береді деді.

Компаниядағы дереккөздер Subaru басшылары спорткар жарысына қайта оралу қажет екенін түсініп отыр дейді. Алайда әзірге техникалық мәлімет жоқ, тіпті қандай шанақ түрін қарастырып жатқаны белгісіз.

Subaru электромотор орнатып, бұрынғы спорткарлардан әлдеқайда қуатты модель шығара алады. Брендтің кейбір кроссовері WRX STI көрсеткіштерінен асып түседі. CarBuzz басылымы хабарлағандай, компания жаңа спорткарды Toyota көмегінсіз, өзі жасап жатқан сияқты. Тамызда Subaru бірнеше жаңа сауда белгісін тіркеді, олар болашақ модельдердің атауы болуы ықтимал. Мәселен, ACX, VPX және ZPX аббревиатуралары бар, әрқайсысы STI таңбасымен бірге жеке-жеке патент алды.