Алматы полициясы: 1 қыркүйекте көлікпен жүрмеген жөн

Оңтүстік астана полициясы ұзын-сонар кептеліс болуы мүмкін екенін ескертті. ПД хабарлағандай, оқу жылының басталуына орай әдеттегідей мектептер мен балабақшалар маңында қозғалыс қарқыны артады.

Оқушылардың ата-аналары, студенттер және жаздан кейін үйреншікті жұмыс кестесіне оралған тұрғындар бір уақытта жолға шығады. Бұған жөндеу жұмыстары қосылады. Сол үшін полиция қыркүйектің алғашқы күндері білім беретін мекемелердің маңында күшейген режимде жұмыс істейді.

Әсіресе 1 қыркүйекте өте қатты көлік кептелісі болуы мүмкін. Департамент тұрғындарға барар бағытын алдын ала жоспарлап, мүмкіндігінше жеке автомобильмен емес, жаяу не қоғамдық көлікпен жүруге кеңес берді.

Тәртіп сақшылары мектеп маңындағы басты мәселе — ата-аналар жол ережесін елемей, машинаны рұқсат етілмеген жерге қоятынын айтты. Жаяу жүргіншілер өткеліне жақын тұрған машина балалардың жолды көруіне, ал жүргізушілердің жаяу жүргіншіні байқауына кедергі болады. Екі немесе үш қатар болып тұрақта тұрған көліктер жұрттың жүруіне бөгет жасайды.

Полиция департаменті қарбалас уақытта тәртіпті қамтамасыз ету үшін 700-ге жуық полицей мен 130-дан аса экипаж қызмет ететінін хабарлады. Машина көп жүретін жолдарда инспекторлар көлік легін қолмен реттеп, балалардың жолдан қауіпсіз өтуіне көмектеседі.