Салық кодексіне өзгеріс енгізу жобасын депутаттар мен мүдделі мекемелер қарап жатыр. Түзету қабылданған соң шыққанына 11–20 жыл болған жеңіл автомобиль үшін сұралатын салық мөлшері 30%, ал 20 жылдан асқан көліктікі 50 % азаяды. Өзгеріс күшіне енсе бюджетке түсетін қаражат азаятынына қарамастан, Салық кодексінде көлік иелеріне арналған жеңілдік сақталады деген жоспар болған. Бірақ жаңа норма биыл емес, 2026 жылы күшіне енеді.
Ештен кеш жақсы. Ескі көлік иелері салық жеңілдігін күтіп жүр. Бірақ биыл 28 қаңтардағы үкіметтің кеңейтілген отырысында Қасым-Жомарт Тоқаев «Қанша қиын болса да, үкімет жаппай үнемдеуге көшіп, бюджет қаржысын тек аса өзекті мәселелерді шешуге жұмсауы керек. Көрпеге қарай көсілетін уақыт келді» деп мәлімдеді.
Осыдан кейін шенділер қосылған құн салығын көтеру, оны төлеу шегін төмендету сияқты ұсыныстар айта бастады. Яғни, билік қазынаны толтыруға кірісті. Енді бюджетке түсетін ақшаны азайтатын нормаларға да қауіп төнуі мүмкін.
Kolesa.kz редакциясы Ұлттық экономика министрлігінің баспасөз қызметінен «Жаппай үнемдеу шешімі ескі көлікке салық жеңілдігін беру шарасына әсер ете ме?» деп сұрады. Мекеме Салық кодексіне өзгеріс енгізу жобасы өзгермегенін әрі шыққанына 11 жылдан асқан автомобильдерге жеңілдік жасау нормасын сақтап қалғанын айтты.
Бұл жауапқа қарап, билік көлік салығын реформалауға қатысты жобаны өзгертпейді деп үміттенуге негіз бар.
Комментариев: 0