Алғашқы жол апаты өткен сенбі таңғы сағат 8:30-да болды, Шығыс айналма жолдың Нұрмағамбетов көшесімен қиылысында екі көлік жолдан шығып кеткен. Екеуі де аударылып қалыпты. Бір адам медициналық көмекке жүгінді.
Осыдан сәл кейін Шығыс айналма жолдың бойында Оренбургская мен Брянская көшесінің қиылысында алты машина соғылды. КамАЗ және басқа бірнеше көлік жолдан шығып кетіпті.
Куәгерлер сол күні таңертең жол көктайғақ болып, қытайлық жүк көлігі тайып кеткенін айтты. Оған ештеңе болған жоқ, бірақ соңында келе жатқан көліктерге зақым келді. Ауыр техниканың тайғанақтап келе жатқанын көрген өзге көлік жүргізушілері тоқтауға тырысқан, бірақ көктайғақта тоқтау мүмкін болмай, алты автомобиль өзара соғылған. Абырой болғанда, адамдар аман.
Жұмадан сенбіге қараған түні қалада азырақ қар жауып, күн суытты. Коммуналдық мекеме қызметкерлер сол күні таңертең Шығыс айналма жолды тазалағанын хабарлады. Мәселе олардың жолды қалай тазалағанында болып тұр. Қолда бар мәліметке сенсек, Шығыс айналманы сенбі күні сағат 6:00-де шынымен тазартқан, бірақ құм-тұз қоспасын емес, су және натрий хлоридінен тұратын тұзды ерітінді төгіпті. Таңғы аяз бен жел тұзды ерітіндіні қатырып, жол апатына себеп болған сияқты.
Жол апаты болған соң шамамен сағат 9:30-да жұмысшылар Шығыс айналма жолға тұз бен құм септі. Ештен кеш жақсы деген осы болар.
Сәл кейін Коммуналдық инфрақұрылым басқармасының өкілдері Kolesa.kz редакциясына 24 ақпан күні апат болған жерді мамандар таңғы 6:52-де өңдегенін және тұзды ерітінді емес, ылғал тұз қолданғанын айтты. Ол кезде температура минус 7 градус шамасында болғандықтан, реагент қатып қалуы мүмкін емес. Сол себепті шенділер жол апатына жылдамдық режимін сақтамаған жүргізушілер кінәлі деп санайды.
Комментариев: 0