«Устинка» хабарлағандай, Өскемендік полицейлер мен блогер арасындағы дауға себеп болған YouTube желісінде жарияланған бейнероликтер екен. Оның авторы ереже бұзған патрульдік полиция қызметкерлерінің әрекетін жазып алыпты. Мысалы, бейнежазбалардың бірінен ШҚО ІІД қызметкерлерінің қауіпсіздік белдігінсіз әрі жарық шамдарын жақпастан рөлде отырғаны байқалса, тағы бірінде — қызметтік көлікте олардың ұйықтап жатқандарын байқауға болады. Бұл роликтердің төменгі тұсында тәртіп сақшыларына қатысты жазылған жағымсыз пікірлердің қаптап кеткендігі таң қалдырмайды әрине.
Осы жағдайға наразылық білдірген бес тәртіп сақшысы келген моральдық зиянның өтелуін талап етіп арыз жазған. Талап-арыз бергендердің әрқайсысы өзіне келген зиянды бір миллион теңгеге бағалапты. Тәртіп сақшыларының пікірінше, пікір жазғандардың сөздері олардың жеке абыройына ғана емес, бүкіл ШҚО ІІД-нің беделіне нұқсан келтірген. Оған қоса, блогердің өзі айтқан пікірді олар негізсіз әрі дәлелсіз деп атаған.
Сот тәртіп сақшылары келтірген дәйектермен келіспей, жауап берушінің полицейлердің ары мен намысына нұқсан келтірмегенін, ал үшінші тұлғалардың пікіріне қатысты наразылықты роликтердің авторынан емес, сол пікір білдіргендерден даулаған жөн деп шешкен. Айта кететін жәйт, даулы бейнежазбалар бүгінде желіде жоқ. Моральдық зиян үшін талап етілген өтемақыны өндіруден сот бас тартқанмен, ІІД-нің бұл үкіммен келіспей, қайта шағым түсіруге құқығы бар.
Комментариев: 0