Сарапшылар Қытай автоөнеркәсібінің болашағын болжады

UBS қаржы компаниясы хабарлағандай, Қытай автоөндірушілері үшін шетелдік нарықтың үлесі 20 %-дан аспайды, бірақ сыртқы нарық жалпы пайданың 50 %-ын қамтамасыз етеді. Ел ішінде демпинг соғысы жүріп жатқандықтан, Қытай брендтері үшін сыртқы экспансия аса маңызды болып отыр.

Шетелде орнығу үшін Қытай автоконцерндері өз өндірісін сол елдерге көшіруге дайын. Мысалы, SAIC, Great Wall, BYD, GAC, Changan және Chery-дің Таиландта зауыты бар. Great Wall мен BYD Бразилияда өндіріс орындарын іске қосты. BYD Еуропаға өнім жеткізу мақсатында Венгрияда ірі өнеркәсіп кешенін салып жатыр.

UBS сарапшылары Қытай маркалары өзге елдерде қарсылыққа тап болып жатса да, алпауыт компаниялардың үстемдігін айтарлықтай бәсеңдетеді деп болжады. Мысалы, қазір Volkswagen мен Toyota негізгі сегменттерде әлемдік нарықтың 81 %-ын қамтып отырса, 2030 жылға қарай олардың үлесі 58 %-ға қысқаруы ықтимал деп жазды Carscoops.

Қытайлар электромобильге басымдық беру, вертикаль интеграция және өз жеткізу тізбегін дамыту арқылы табысқа қол жеткізіп отыр. Олар соның көмегімен шығынды азайтып, өндірісті жеңілдетті әрі нарықтағы өзгерістерге тез бейімделуге мүмкіндік алды.

UBS мамандары әлемдік автөнеркәсіп консолидация мен унификация бағытында дамып жатқанын атап өтті. Электромобиль сегментінде болашақта небәрі 10–15 өндіруші қалатын шығар, олар бір қарағанда өзара байланысы жоқ сияқты көрінетін әртүрлі марканың автомобильдерін шығарады.